1 Kisigalie kigono kimwi kya lihungu lya Pasaka. Yesu akachelie kuva chipindi chake kikali kifikile kya kuhega ku inyi na kuhelela kwa Daada. Avakeliye vanu vake muinyi figono fyonda, avakeliye hilo ngajila mwiso!

2 Yesu pamwi na vachulila vake vakali kuliya kyakula kya palumiemie. Setani akaingile mugati lya numbula lya Yuda Isikalioti, mwana va Simoni Isikalioti, natilo amseduke Yesu. 3 Yesu akachelie kuva Daada avikile kila kinu kufilongocha, kangi akali ahumile kwa Nguluvi na ewuya kangi kwa Nguluvi. 4 Yesu akahegile pamesa, akafulile mwenda vake va kwivala, akategula kitambala na kwiwopa pakigudi. 5 Baho akavika malenga mulibakuli, akavanga kuvaogofecha vachulila vake mumagulu na kuifyangula na kitambala kyeawopile pakigudi. 6 Peafikile peakali Simoni Peteli, Peteli akamlongile, "Mtwa, veve usaka kundiwogofecha magulu nene?"

7 Yesu akamhigile, "Seuwesa kuchela kyendigitila nondee, ila wichela pambele." 8 Peteli akamlongie, "Veve seuwesa kuniogoficha nene magulu ha!"

Yesu akamhigile, "Ngita sendikukwogofecha veve daseuvecha na nene kangi."

9 Simoni Peteli akamhigile, "Mtwa, ndiogofiche semagulu hela, ila na mawoko gyangu na lituwe!"

10 Yesu akamlongie, "Munu yeogile suwe seing'ang'wa kwoga kangi ila ewesa kukalava magulu hela, kwakuva mvili vake vonda ndi mnofu. Nyenye ndi vanofu ila sekila yumwi venu." 11 Yesu akamchele ndi ani yeakumkana, nde kwakuva Yesu akalongile, "Nyenye ndi vanofu ila sekila yumwi venu."

12 Peasindile kuvawogoficha magulu, akafwalile kangi mwenda gyake, akawuyile kwikala pamesa pono pake, akavahucha, "Muchele gyendivagitile? 13 Nyenye munikemela Muwulanichi na Mtwa, nyenye mwilonga unofu, kwakuva ndi yune. 14 Nene Mtwa na Muwulanichi venu ndivawogofiche nyenye magulu na nyenye mwing'ang'wa mwihogofeche magulu. 15 Ndivagavie mufano, neke na nyenye mugite ngita pendivagitie nyenye. 16 Ndakyene ndikuvalongela, mnjagila semkomi kuchumba mtwa vake, vala mnjangila semkomi kuchumba yula yeamlagiliche. 17 Ngita mugachele ago, suwe, Nguluvi daavafunya ngita damugita.

18 "Aga gyendilongile se gyenu vonda, nene ndikuvachela vala ndivandiaguwe. Ila ging'ang'wa Masimbo ga Nguluvi gaveche, ngita pegilonga, ‘Yula yealiye kyakula pamwi na nene nde yeakunikana.’ 19 Nene ndivalongie makani aga salaisi pegavekuhumila, neke pegihumila muwese kudikila kuva, ‘Nene nde Yune.’ 20 Ndakyene ndikuvalongela, yeakumwanuka yula yeandilagiche akunimwanuka nene, yeakuniwanuka nene, akumwanuka yula yeandilagiche."

21 Yesu peamalile kulonga ago, numbula ikasugwime hilo, akalongile pawelu, "Ndakyene ndikuvalongela, yumwi venu ekunikanila!"

22 Vachulila viloline sevakachele kuva Yesu akumlongela ani. 23 Yumwi va vachulila, yeakali ikelwa hilo na Yesu, akali akalile pepi na Yesu. 24 Suwe, Simoni Peteli akamkonyesile muyage kuno ilonga, "Muwuche akumlonga ani?"

25 Mchulila yula akahegeliye pepi na Yesu, akamuhucha, "Mtwa, ndi ani?"

26 Yesu akahigile, "Yula yendikumgavila kipande kya libubunda nde mwene." Baho akategule kipande kya libumunda akachwikile mulibakuli, akamgavila Yuda, mwana va Simoni Sikaliyoti. 27 Yuda peawanuke kipande ikyo, baho Setani akamwingile. Suwe, Yesu akamlongie, "Kyeukela kugita, gite kisatu!" 28 Ila kuhela munu ata yumwi yeakalile pamesa yeachelile wuli akamlongiye ndena. 29 Kwakuva Yuda akali mvika lusanja, vamonga vawo vakacheliye kuva Yesu amlongile agule finu fya lihungu awu vacheliye amlongie akaheche kyekyonda kwa vahangala.

30 Suwe, Yuda akawanuke kila kipande kya libumunda, baho akahumile kwivala. Ikali pamie.

31 Yuda peahegile, Yesu akalongile, nondee ukomi vangu nene Mwana va Munu ugehe pepi kuwoneka pawelu. Kangi dauwoneka pawelu ukomi va Nguluvi kuchumbila mumagito gyangu. 32 Mwana daakuvawonesa vanu Nguluvi peagehe mkomi, baho Nguluvi daakumnyamula Mwana na kuvawonesa vanu Mwana peagehe mkomi. 33 "Vana vangu, ava ndigehe na nyenye kwa chipindi chidodo hela. Mukunisaka, ila nondee ndikuvalongela gala gyendivalongele vakomi va Vayawudi, ‘Kwendihelela nyenye semuwesa kuhelela!’ 34 Ndikuvagavila lulagicho lumiya, muyikela ngita pendivakeliye nyenye. 35 Pemukwikela, vanu vonda vichela kuva nyenye ndi vachulila vangu."

36 Simoni Peteli akamuhucha, "Mtwa, wihelela kwii?" Yesu akamhigile, "Kwendihelela seuwesa kunifwatila nondee, ila ukunifuatila pambele." 37 Peteli akamlongie, "Mtwa, kwa liki sendiwesa kukufwatila nondee? Nene dandifuwa kwakuva lya veve." 38 Yesu, akahigile, Ndakyene veve wifuwa kwa kuva lya nene? Ndakyene ndikulongela, livisi pelyave selivika uvecha unikanile mala chidatu!