1 Yesu akavalongie, "Ndakyene ndikuvalongela, munu yeyonda seikwingila mukivingilili lya ng'ondolo kwa kuchumbila mulwichi, ila ekwingila kuchumbila ng'asi yingi, uyo mwichi na mnyaga. 2 Ila yeikwingila kwa kuchumbila kumlyangilo, uyo ndi mkwamila va ng'ondolo. 3 Mdima va likivingilili ekumdindulila mkwamila lwichi na ng'ondolo vakumpulika lisauti lyake. Ekuvakemela ng'ondolo vake kwa matawa gyao na kuvahumicha kwivala. 4 Peakuvahumicha ng'ondolo vonda kwivala, ilongola kuutalo lyao na ng'ondolo vakumfuatila kwakuva vaichela lisauti lyake. 5 Ila ng'ondolo seviwesa kumfuatila mgenji, ila vekumyila kwakuva sevaichela lichwi lyake."

6 Yesu avalongie mfwano ugo, ila vao sevachele gyeakali akuvalongela.

7 Yesu akavalongela kangi, "Ndakyene ndikuvalongela, nene ndi lwichi lwa ng'ondolo. 8 Vala vangi vonda yevandilonguwe nene ndi vahichi na vanyaga na ng'ondolo sevakavapulike. 9 Nene ndi mlyangilo. Munu yeyonda yeikwingila kwa kuchumbila nene dailowolwa, daikwingila na kuhuma na daipata kila kyeing'ang'a. 10 Mwichi ikwacha neke ahiche, adocha na ahanange. Ila nene ndachile neke vapatile uwumi va mbepali.

11 "Nene ndi mkwamila msanzi. Mkwamila msanzi ihumicha uwumi vake kwakuva lya ng'ondolo chake. 12 Munu yeagita kasi lya kukwamila neke ipatile sendi na ng'ondolo sevake, peilola likeve likwacha, akuvaleka kondolo na kunyila, baho likeve akuvabata na kuvayaganisa mudasi. 13 Mkwamila inyila kwakuva ilolela sendi ng'ani, ila seakuvalola unofu ng'ondolo avo. 14 Nene ndi mkwamila msanzi. Ndikuvachela ng'ondolo vangu na vevagehe va nene vakundichela. 15 Ngita ndeni Daada peakundichela nene, ndenindeni na nene ndikumchela Daada. Ndidikila ata kufuwa neke ng'ondolo vangu vabihile kuyaga. 16 Kangi ndigehe na ng'ondolo vangi, vala sevagehe mukivingili ilyi. Na nene nding'ang'wa kuvalongocha. Ng'ondolo avo davakuichela lichwi lyangu, ndeni dakuvecha lipinga limwi na mkwamila yumwi.

17 "Daada akundikela, kwakuva nene dikuhumiche kufuwa neke ndipatile uwumi kangi. 18 Kuhela munu yeakundinyaga uwumi vangu, nene ndikuhuhecha pendikela nene. Ndigehe na umwimike va kuhuhecha na kuwutegula kangi. Ndeni nde ndilagichwe na Daada vangu kugita."

19 Pevapulike njowo icho Vayawudi vinengile kangi. 20 Volofu vawo vakalongie, "Agehe na lihoka, kangi ana lukwale! Wuli tukumpulika?"

21 Vangi vakalongie, "Malichwi aga se gya munu munya lisoka. Lihoka liwesa kudundula meho ga munu yaebofwife meho?"

22 Ukoya ku Yelusalemu kukali na lihungu lya kuwiwuka kung'alicha unofu Kaya lya Nguluvi, chipindi ichi kikali cha ng'ala. 23 Yesu akali igendagenda ku Kaye lya Nguluvi muludamwa lwa Solomoni, 24 suwe, Vayawudi vakamchungatile, vakamuhucha, "Ukutufwiya undakyene mbaka pandili? Utulongele undakyene tuchele ngita veve ndi Kilisito yeaguliwe na Nguluvi?"

25 Yesu akavahigile, "Ndikavalongie, ila nyenye semudikila. Kasi ichi chendigita nene kwa umwimike va Daada vangu ndechikunilongela nene ani. 26 Ila nyenye semdikila kwakuva nyenye seng'ondolo vangu. 27 Ng'ondolo vangu vipulika lichwi lyangu, nene ndikuvachela, navo vakundifutila. 28 Nene ndikuvagavila uwumi va mbepali, vene sevayagila mbepali, vala kuhela munu yeiwesa kuvahecha mumawoko gyangu. 29 Daada vangu yeandigavile ava ndi mkomi kuchumba vonda na kuhela yeiwesa kuvahecha mumawoko gya Daada vangu. 30 Nene na Daada ndi kinu kimwi."

31 Vayawudi vakahola maganga neke vamtovile neke vamdoche. 32 Yesu akavalongie, "Ndigitile kasi cholofu kuhuma kwa Daada. Kasi liki mugati gya igo gyekuvagita munditove maganga?"

33 Vayawudi vakamuhigile, "Setukutovela maganga kwakuva lya kasi nofu gyeugitile, ila tukutova kwakuva lya kumliga Nguluvi! Ukwigita kuva Nguluvi kuno veve munu hela ngita vanu vangi."

34 Yesu akavahigile, "Wuli, seisimbilwe Mumalagilicho gyenu kuva, Nguluvi alongile, ‘Nyenye ndi vanguluvi vangi?’ 35 Nguluvi avakemeliye vanguluvi vangi vala vevagavilwe unanzi vake, nefwe tuchela kuva Msimbo gya Nguluvi gilonga undakyene figono fyonda. 36 Wuli mwilonga kuva, mwene Daada akamuhaguwe na kumlagicha ku inyi, nyenye mukumlongela, akumliga Nguluvi kwakuva ndilongie, Nene ndi Mwana va Nguluvi? 37 Ngita sendigita kasi cha Daada vangu, mbihile kundidikila. 38 Ila pendikuchigita kasi cha Daada, ata ngita semukundidikila nene, suwe, muchidikile icho kasi, neke mpatile kuchela kuva Daada agehe mugati lyangu na nene ndigehe mugati lyake."

39 Vakagechile kangi kumbata ila akacholopwike mumawoko gyawo.

40 Yesu akahelela kangi kumwambu lya mgoka Yolidani, kula kweakali ibatisa Yohani, akakalile ukoya. 41 Vanu volofu vamuheleliye vakamlongie, "Yohani seagitile umanyitu wowonda. Ila makani gonda ga Yesu cheakali achilongile chikali cha undakyene." 42 Suwe, vanu volofu vevakali pala vakamdikila Yesu.