1 Kwa veve mkomi Teofili.

Mukiganilo kyendikavangile kusimba ndikasimbile makani gyonda gyeagitile Yesu na kuwulanicha kuhuma pamwandi lya kasi lyake, 2 mbaka kigono kila peanyamuliwe kuluhano kwa Nguluvi. Pehave kunyamuliwa kuluhano kwa Nguluvi akavagavile malagilicho kwa umwimike va Muhe va Nguluvi vala vanjagila yeavahaguwe. 3 Mufigono alobaini kuhuma kufuwa kwa mwene avahumiye kwa namuna cholofu chechimchelise kuva akali wumi. Yevamuwonile, vaywangile na mwene njowo cha Ung’achale va Nguluvi. 4 Kigono kimwi peali iliya pamwi navo akavalongela ndeni, "Mbihile kuhega ku Yelusalemu, mbaka pemuwanuka gala gyeavalongie Daada, pemunipulike ndilonga njowo chake. 5 Yohani avabatisile kwa malenga, ila mufigono fidodo fyefikwacha nyenye mwibatiswa kwa Muhe va Nguluvi."

6 Vanjagila pevatang’anile pamwi na Yesu, vakamuhuchile "Wuli Mtwa, figono ifi ukuvawuyisila Vaisilaeli Ung’achale?"

7 Yesu akavahigile, "Figono na majila gya njowo ago gagehe muumwumike va Daada vangu na nyenye semdikilwa kuchela gihumila pandili. 8 Ila Muhe va Nguluvi peakuvakwikila nyenye, mukwanuka ludali na mwivecha mwilonga njowo changu mu mwani lya ku Yelusalemu na inyi cha Yudeya na Samalia na ku inyi chonda." 9 Peamalile kulonga ago, akanyamuliwe kuhelela kuluhano kwa Nguluvi, kuno vonda vikumlola, baho lifunde likamfihile navo sevamwene kangi.

10 Pevakali vafulutule meho kuluhano, Yesu peagehe ihelela, bahobaho vanu vavili vafwalile myenda mivalafu pe vimile pepi navo, 11 vakalongie, "Nyenye vanu va ku Galilaya, wuli mwimile baha kuno mwilolela kuluhano kwa Nguluvi? Yesu uyu yeanyamuliwe palutalo lyenu kuhelela kuluhano kwa Nguluvi, iwuya kangi ngita pemuwonile ihelela kuluhano kwa Nguluvi."

12 Baho vanjagila vakawuyile ku Yelusalemu kuhuma pakidunda weukemelwa kidunda kya Miseituni, weugehe utali va kilomita yimwi kuhuma kumwani va Yelusalemu. 13 Pevafikile kumwani va Yelusalemu vakaingile mulilingo pevakali vikwikala, vakali Peteli na Yohani na Yakobo na Andelea na Filipo na Tomasi na Batolomeo na Matayo na Yakobo mwana va Alifayo na Simoni yeikemelwa Selote, yeacheliwe mtovanila inyi lya Isilaeli na Yuda mwana va Yakobo. 14 Avo vonda vaendelie kutang’ana pamwi kumsuka Nguluvi, pamwi na vadala vamonga na Maliya maye vake Yesu na vakolo vake Yesu.

15 Kigono kimwi mufigono ifyo. Peteli akahimile mugati lya vala vaidikila miya na isilini. 16 Peteli akavalongie, "Lukolo vangu, ndelasima Masimbo Mang’alili gatimile, ambagyo Muhe va Nguluvi akalongile kuchumbila Dawudi, akalagula njowo cha Yuda yeavalongoche vala vanu kumbata Yesu. 17 Yuda akali yumwinga vetu, kwakuva akahaguliwe Yesu agite kasi iyi."

18 Mwene akagulile mgunda kwa chila sendi cheapatile kuhuma mulukani lwake lihofu, peagehe koya kumgunda akaguwe ufuma puu! Lileme likabachuke na mitima gyake gikahumile. 19 Vanu vonda mu Yelusalemu pevapulike makani ago, ifyo vakaukemela wula mgunda, "Akelidama." Mana lyake, "Mgunda va Danda."

20 Peteli alongie "Ngita peisimbilwe mukiganulo kya Sabuli,

‘Kukaye lyake isigale mahame,

kwihela munu yeikala mugati lyake.’

Kangi isimbilwe mukiganulo kya Nguluvi,

‘Munu yungi ahale fwasi lyake lya kugita kasi.’

21 "Nonde tumuhagule munu yungi mugati mwa vala vevakali pamwinga na nefwe chipindi chonda cha Mtwa Yesu peakali pamwinga na nefwe. 22 Uyu aveche yumwi va vala yevalongochine na nefwe kuhuma Yohani peakali ibatisa mbaka kigono kila Yesu peanyamuliwe kuhuma kwa nefwe kuhelela kuluhano kwa Nguluvi. Uyu itakilwa aveche pamwinga na nefwe kulanducha kuchulubuka kwa Yesu."

23 Baho vakahaguwe matawa gya vanu vavili, yumwi Yusufu yeakemeliwe Balisaba awu Yusito na yungi ndi Matiya. 24 Baho vakamsuka Nguluvi, "Mtwa, veve wichela mahocho gya kila munu. ndeni ndi ani yehukumuhagula mugati lya ava vavili, 25 neke ategule fwasi lya unjagila yealekile Yuda yeahele pono peing’ang’wa aveche." 26 Vakatovile gudugudu, gudugudu ikampatile Matiya na akaongechwa kwa vala vanjagila vangi kumi na yumwi.