1 Kigono kya lihungu lya Pendekositi pekifikile, vanu vonda vevamwidikie Yesu vakatang'anile pamwinga. 2 Bahobaho, lichwi yapulikike kuhuma kuluhano, likali ngita lukala lyelipuga hilo, ikaimemiche yila kaye yonda yevakali vakalile. 3 Baho vikahumile finu fyawonike ngita miyale gya lyoto, figawanyike na kutula kwa vanu vonda yevakali mula. 4 Vonda vamemichwe Muhe va Nguluvi vakavangile kulonga kwa luga yingi ngita Muhe va Nguluvi peuvatangile kulonga.

5 Ukoya ku Yelusalemu kukali na Vayawudi, vanu yevamfunyile na kumnjuma Nguluvi, yevahumile kila inyi. 6 Pevapulike lichwi ilyo, lipinga likomi lya vanu litang'anile pamwi. Vonda vakadudwive hilo, kwakuva kila munu avapulike vadikila vakilonga kwa luga chawo chakubabwa. 7 Vakadudwive hilo vakalonga, "Wuli, vonda vetukuvapulika vilonga ndena, sevanu va ku Galilaya? 8 Ivecha wuli, kila yumwi vetu akuvapulika vakilonga kwa luga chawo cha kubabwa? 9 Vamonga vetu vihuma, ku Palisi na ku Amedi na ku Elamu na vangi ni venyekaye Mesopotamia na ku Yudeya na ku Kapodokia na ku Ponito na ku Asia, 10 Fulugia na Pamfulia na Misili na pono cha Libiya pepi na Kulene. Vangi mugati lyetu vagenji va kuhuma Loma, 11 Vayawudi na vanu yevaingie mudini lya Vayawudi na vamonga vahumila ku Kelete na ku Alabia. Nefwe vonda tukuvapulika vakilonga makani makomi gya Nguluvi kwa luga chetu cha kubabwa!" 12 Vonda vakadudwive na kulunguvala kuno vakwiwucha, "Iyi ivecha na mana liki?"

13 Ila vangi vakavabeda vala vadikila, vakilonga, "Ava vanu vagalile difwayi miya!"

14 Baho Peteli akahimile pamwinga na vala vanjagila kumi na yumwi na akavanga kuvadalikila vanu kwa lichwi likomi akalonga, vakolo vangu Vayawudi na nyenye vanu vonda yemwikwikala baha ku Yelusalemu, mpulikiche unofu njowo chedandikuvalongela. 15 Vanu ava sevagalile ngita pemwihocha, nonde saa chidatu pamilau hela. 16 Ndakyene makani aga ndi gala gealongile Yoeli mvichi va Nguluvi.

17 Nguluvi alongile, mufigono fila fya mwiso,

Ndikuvasukulila Muhe vangu Ung'alile.

Vana venu vakigosi na vakidala davakuvalongela vanu njowo changu,

Vadimi venu vilola maono gya njowo dachechihumila pambele,

na vagogolo venu vilota njosi. 18 Hata kwa vanyigendwa vangu vakigosi na vadala,

ndikuvamemicha Muhe vangu mufigono fila,

navo filanducha unanzi vangu.

19 Ndigita umanyitu kuluhano,

na kimanyilo panyi muinyi,

kuvecha na Danda na lyoto na lyosi tii,

20 lichuwa litabadilika kuvecha kisi,

na mwechi uvecha mdung'u ngita danda,

peyave kufika kigono kila kikomi kya Ukomi va Mtwa.

21 Baho yeyonda yeisuka kwa litawa lya Mtwa, iwokolelwa.

22 Peteli akaendelie kulonga, nyenye vanu va Isilaeli, mpulikiche njowo ichi unofu! Nguluvi akavawonise nyenye kuva igita kasi kuchumbila Yesu va Nasaleti nyenye mwichela kuva kuchumbila uyo Yesu akaonise fimanyilo fyolofu kwa nyenye. 23 Kuhumila na mpango vake Nguluvi yumwene akali asakile kuva Yesu ibatwe na nyenye, nyenye mukamdochile kwa kuvaleka vanu vahofu vamuvambe mulipindilihicho. 24 Ila Nguluvi akamchulubuche, akamuhecha mukiwopo kya kufua, ili abihile kukolelwa na kufuwa. 25 Dawudi alongile njowo cha Yesu,

Ndimwene Mtwa pautalo lyangu figono fyonda,

kwakuva mwene agehe pepi na nene sendivecha na wogofi ng'oo.

26 Kwa ifyo, numbula lyangu ukeduka,

Kangi ndikeduka kwa mlomo gwangu,

na muvili vangu wikwikala kwa uhuvilo

27 kwakuva veve Nguluvi seukunileka muinyi lya vanu vevafuwe,

vala kumleka mng'alili vako awole ukoya kwa vanu vevafuwe.

28 Uniwonise genditakilwa kugita na gyegikunilongocha kuwumi,

daukundigita ndikeduke kwakuva ugehe pamwinga na nene.

29 Vakolo vangu, ndikela kuvalongela ndakyene gala gegampatile daada vetu Dawudi, akafue na kusilwa na likabuli lyake ligehe baha mbaka neng'uli. 30 Lakini kwakuva ng'achale Dawudi akali Mvichi, achele kuva Nguluvi amlapie kilapo, kuva akumuhagula yumwi kuhuma mukilelo kyake aveche mhala vake. 31 Dawudi agawonile suwe makani gyegagitwa na Nguluvi na akalongile uchulubuko va Kilisito chipindi pealongile,

Sealekilwe muinyi lya vanu vevafuwe,

na mvili vake seuwola mulikabuli.

32 Nguluvi akamchulubuche Yesu na nefwe tuvalolaji va luchowo ulo. 33 Baho Daada Nguluvi akamgavile unginyange kuchumba vonda neke atavale pamwi nave, akawanuke Muhe va Nguluvi kuhuma kwa Daada atuletie Muhe va Nguluvi ambaye Nguluvi akatulongie, nde kyemukiwona na kupulika nonde. 34 Kwakuva Dawudi seanyamuliwe kuhelela kuluhano, ila alongile,

Mtwa akamlongile Mtwa vangu,

kale lubali lwangu lwa kuliya,

35 mbaka pendikuvagita machundwama vako vaginywe panyi lya magulu gyako.

36 Peteli akalongile "Vanu vonda va Isilaeli ndakyene ving'ang'wa kuchela kuva, uyu Yesu yevamukong'oliche mulipindilihicho, Nguluvi amgitile kuva Mtwa na Kilisito Mkombosi."

37 Vanu pevapulike njowo icho, vakasugwime hilo munumbula chao, vakavahucha Peteli na vala vanjagila vayawo, "Vakolo vetu, tugite liki?"

38 Peteli akavahigile, "Kila yumwi venu ahongeche sambi chake na abatiswe kwa litawa lya Yesu Kilisito, Nguluvi akuvawonela lusungu sambi chenu. Na nyenye mwikwanuka fupo lya Nguluvi ambalyo ndi Muhe va Nguluvi. 39 Kwakuva, fupo ilyo ivikilwe kwajili lyenu na vana venu na vanu vonda yevagehe kutali na vala vonda ambavo Nguluvi daavakemela yumwene."

40 Kwa njowo cholofu Peteli avakanyile vanu, akilonga, "Mujiwokole mukilelo iki kiwofu!" 41 Vanu volofu vakadikile njowo chake, vakabatiswa. Kigono kila vanu ngita elufu chidatu vakahongelike mulipinga lila lya vamdikie Yesu. 42 Ava vonda vakaendeliye kuwulanichwa na vanjagila, kwikala pamwi na kuliya kyakuliya pamwi na kumsuka Nguluvi.

43 Vanjagila vagitile umanyitu na filuwiluwi fyolofu, vanu volofu vakadudwive hilo na kumginya Nguluvi. 44 Vonda yevamdikie Yesu vakaendeliye kwikala pamwi na finu fyawo vagavine pamwi. 45 Vakali vegucha mali na finu fyawo na kugavana munu sendi ngita peakela mwene. 46 Figono fyonda vakali vikutang'anila mu Kaye lya Nguluvi. Ila chipindi kya kuliya, vakatang'anila mukaye chawo na kuliya kyakula kwa lukeduko na numbula lwa uwekelelo, 47 vamunjuma Nguluvi na kukelwa na vanu vonda. Kila kigono Mtwa akali iluticha lipinga lya vanu yevakali vekuwokoliwa.