1 Kigono kimwi, Peteli na Yohani vakahelela Kukaye lya Nguluvi saa tisa pamunyi, kipindi ikyo ndikyo kikali kya kumsuka Nguluvi. 2 Na ukoya mu Kaye lya Nguluvi kukali na munu yumwi mtenda kuhuma peababilwe. Kila kigono vanu vakali vekumvika munu uyo mumlyangilo lya kaye lya Nguluvi weukemelwe, "Mlyangilo mnofu," neke asuke kinu kyokyonda kwa vanu vevikwingila mu kaye lya Nguluvi. 3 Yula mtenda peavawene Peteli na Yohani pevikwingila mukaye lya Nguluvi, akavasuka vamgavile kyokyonda. 4 Peteli na Yohani vamfulutulie meho, Peteli akamlongie, "Utulole!" 5 Mwene akavalola akahochile igavilwa kinu kuhuma kwavene. 6 Baho Peteli akamlongie, "Nene ndihela madini gya fesa vala sahabu, ila kyendinakyo nene ndikugavila. Kwa litawa lya Yesu Kilisito va Nasaleti, wime na ubite!" 7 Baho Peteli akamkolile liwoko lya kuliya, akamnamue. Bahobaho magulu na mafugamilo gyake gyapatile ludali. 8 Akang'etuka, akawime na kuvanga kugenda. Baho akaingile pamwinga navo mukaye lya Nguluvi, akigenda na kung'etukang'etuka kuno akimnjuma Nguluvi. 9 Vanu vonda vevakali bahala pevamwene egenda na kumnjuma Nguluvi, 10 vanu pevakammanyile kuva yula ndi yeakali isukasuka mumlyangilo mnofu va kaye lya Nguluvi, vakadudwive hilo makani gegamuhumile.

11 Yula mtenda yeananichwe peakali ilongochana na Peteli na Yohani, vanu vonda vakadudwive hilo, vakachile kuno vinyila mbaka muludamwa lweukemelwa, "Ludamwa lwa Solomoni." 12 Suwe, Peteli peavawene vanu avo akavalongie, vanu va Isilaeli, wuli mwiduduva na luchowo ulu? Wuli mukutufutulila meho muhocha kuva ndi kwa umwimike vetu awu kwa usanzi vetu tumgitile munu uyu awese kugenda? 13 Nguluvi va daada vetu, Ibulahimu na Isaka na Yakobo, ndive akamnjumile Yesu unyingendwa vake. Ila nyenye mukambatile neke adochwe, na nyenye mkamkanile pautalo lya Pilato, hata ngita Pilato asakile amleke abihile kuhigwa. 14 Akali Mng'alile na msanzi, ila nyenye mkamlema, mkamkela munu yungi yeakali mdochi adindulilwe. 15 Mkamdocha yula yakali mvangilo va wumii. Ila Nguluvi akamchulubuche na nefwe ndi valola va luchowo ulo. 16 Kwa kulidikila litawa lya Yesu munu uyu yemkumchela fihundo fya magulu fyake vigavilwe ludali. Mbatwa lyake kwa Yesu nde imnaniche ndakyene munu uyu ngita pemukumlola vonda. 17 "Nano lukololo vangu ndichela kuva, nyenye na vakomi venu mugitile ago kwakuva semkachelile. 18 Ila Nguluvi atimise gala gyealongile kuchumbila vavichi vake, imtakilwe Kilisito vake agudwe. 19 Suwe, muhogeche na mumuwuyile Nguluvi, neke mulekelwe sambi chenu. 20 Mukigita ndeni neke Mtwa avaongelechele umwimike kukeduka munumbula, mwene akuvaletela Yesu kilisito yeavahagulie nyenye. 21 Mwene itakilwa asigalie kuluhano mbaka njowo chonda pechivecha miya, ngita Nguluvi pealongie daha kuchumbila vavichi vake vang'alile. 22 Kwakuva Musa akalongie, ‘Mtwa Nguluvi ekuvaletela mvichi vake ngita peandiletile nene, uyu ihumila mugati lyenu nyenye. Mwitakilwa mupulike kila kinu kyeakuvalongela. 23 Munu yoyonda yeilema kumpulika mvichi uyo inengwa kuhuma kwa vanu va Nguluvi na idochwa.’ 24 Vavichi va Nguluvi vonda kuvangila Samweli na vala vachile kumbele lyake, vonda vakalagule njowo chechigitwa figono ifi. 25 Fupo ambalyo Nguluvi akahechile kuchumbila vavichi ndi kwa nyenye, na nyenye mwisiliki muliagano ambalyo Nguluvi akaligitile na paapo, ngita peamlongie Ibulahimu, ‘Kwa kuchumbila ulelo vako vanu va inyi chonda vifunywa.’ 26 Nguluvi peamchulubuche Yesu mnyegendwa vake, tandi amlagiliche kwa nyenye, avafunye na kumgita kila yumwinga venu aleke kugita mahofu."