1 Paulo akalongie, "Lukolo vangu na daada vangu, mpulikiche pendikwitasa." 2 Pevapulike akilonga kwa luga lya Kiebulania, vakachikile jii hilo. Paulo akaendelie kulonga.

3 Nene nde Myawudi, mubabwa va Taliso ku Kilikia. Ila ndaleliwe baha mu mwani va Yelusalemu ndikali mchulila va Gamalieli. Ndiwulanichwe kwa unofu kwibata malagicho gonda ambagyo Musa avagavie vagogolo vetu. Ndigangamalise kugita molofu kwa Nguluvi ngita nyenye pemugehe neng'uli. 4 Ndivagudisile na kuvadocha vanu yevafwatile ng'asi iyi. Ndikavapatile vagosi na vadala na kuvavika mukiwopo. 5 Mtekechi mkomi na ludamo lyonda lya vavaha vichela njowo icho. Ndikawanuke baluwa kuhuma kwavo kuvasindikila vala lukolo Vayawudi vevakali ukoya Damasiko, neke ndivabate vanu ava na ndivalete kuno vavopilwe mbaka Yelusalemu neke vatovwe.

6 Pendikali mung'asi kuhelela Damasiko, ikali saa sita pamunyi, bahobaho welu mkomi kuhuma kuluhano ukanilangachila lubali chonda. 7 Ndikague panyi, ndipulike lichwi yanilongie, Sauli, Sauli! Wuli ukuniguda? 8 Nene nikamuwucha, veve nde ani, Mtwa? Mwene akanihigile, nene nde Yesu va Nasaleti yeukuniguda. 9 Vala vayangu yendikali navo vakauwene welu, ila sevachelile lichwi lya yula yeakali elonga na nene. 10 Baho, nene ndikamuwucha, ndigite liki Mtwa? Mwene Mtwa akandilongie, wime na uhele ku mwani va Damasiko na ukoya dandikulongila fyonda fyeutakilwa kugita. 11 Kuhumila na wula welu wung'alike sendawesile kulola ifyo ikavang'ang'ile vala vayangu kunilongocha kwa kunikolelie liwoko mbaka ku Damasiko.

12 Ukoya kukali na munu yumwi ekemeliwe Anania, munu yeakumfunya Nguluvi, mwene kuginya malagicho gyetu na yeaginyangwe hilo pautalo lya Vayawudi vonda vevakali vakwikala Damasiko. 13 Mwene achile akaimile pepi na nene akalongie, lukolo lwangu Sauli, ulole kangi! Bahobaho ndalolile kangi. 14 Baho Anania akamlongie, Nguluvi va vagogolo vetu akuhague veve neke uchele lukelo lwake, umlole yula myigendwa vake mwidikila na kupulika luchowo lwake. 15 Kwakuva dawilonga njowo chake chonda kwa vanu vonda chila cheuchiwene na kuchipulika. 16 Nondee suwe, wichindila liki? Wime, ubatiswe na kuhechelwa sambi chako kwa kudikila litawa lyake.

17 "Pendawuyile ku Yelusalemu, pendikali ndifunya ku kaye lya Nguluvi, Nguluvi akaniwonesile kinu. 18 Ndikamwene Mtwa Yesu akanilongie, ‘Kisatu! Uhege ku Yelusalemu, kwakuva vanu va baha sedavadikila kugalonga geukugalola kutigila nene.’ 19 Nene ndikamhigile, ‘Mtwa, vavene vichela wachi kuva nene ndi yula yeakali echumba mukaye lya kufunyila Vayawudi neke kuvavika mukiwopo na kuvatova vala vevakwidikila. 20 Chipindi mswida vako Stefano peadochilwe, nene ndikali baha ndikidikila navo njowo icho na kugidima mikoti gya vala vevamdochile.’ 21 Mwene Mtwa akandongie, ‘Uhelele, dandikulagicha uhelela kutali kwa vanu se Vayawudi.’"

22 Vala vanu vekali vakumpulikicha, ila pealongie njowo chila, vakavangile kubwatuka, "Mumdoche uyo! Munu ngita uyu seing'ang'wa kwikala." 23 Vendelie kubwatika na kutaga mikoti gyao kuno vakitaga lifuna kukyanya. 24 Mkomi va vapuga akavaswitilicha vanu vake vamsindike Paulo muitwangilo, akavalongie vamtove ndomondo neke vapate kuchela nogwa lya Vayawudi kumbwatukila. 25 Ila pevasindile kumuwopa ndegei neke vamutove ndomondo, Paulo akamlongie mkomi va vapuga yumwi yeimile pepi, "Wuli nde unofu kwa nyenye kumtova ndomondo munu va Loma peakali ave seahigilwe?"

26 Yula mpuga peapulike njowo icho, akamhelelie mkomi va vapuga na kumlongela, "Wigita liki? Munu uyu ndi mwenekaye va ku Loma!" 27 Yula mkomi va vapuga akamhelelie Paulo na kumuhucha.

"Ndongele, wuli, veve ndi mwenekaye va ku Loma?"

Paulo akamhigile, "Ena."

28 Mkomi va vapuga akavalongie.

"Nene ndikali munu va Loma kwa kuhomba sendi cholofu."

Paulo akamhigile, "Ila, nene ndi munu va ku Loma va kubabwa."

29 Vala vanu ambawo vevakali vemlolela kwapepi Paulo, vakahegile pono ilyo kisatu. Hata yula mkomi va vapuga akaogwipe hilo peachele kuva Paulo ndi mwenekaye va ku Loma na akali vamuwopile ndegei kya kyuma.

30 Pamilau lyake, mkomi va vapuga akang'ang'ile kuchela malato lyolyonda gyevamlatile Paulo. Ifyo akamuwopue Paulo, akavaswitiliche vakomi va vatekechi na ludamo lyonda vaywange. Baho akamletile Paulo, akamwimicha pautalo lya ludamo.