1 Agilipi akamlongie Paulo, "Ugavilwe fwasi lwa kwitasa." Baho Paulo akagololise liwoko neke vachike na akavangile kwitasa endee, 2 "Ng'achale Agilipi, ndikwiwona ngiba kwima pautalo lyako, pendikwitasa kulonga malata gyonda ambagyo Vayawudi vakandogilege. 3 Kwakuva veve uchela unofu machovelo chonda cha Vayawudi na malumbano gyao gyonda. Ifyo ndisuka unipulikiche kwa ufumilifu.

4 "Vayawudi vonda vakuchela njowo changu kuhuma pauwana vangu, namuna pendikalile kuhuma kutali mu inyi lyangu na ukoya ku Yelusalemu. 5 Vakunichela kuhuma pamwandi na viwesa kulonga undakyene ngita vikela, ndikali munu yendidikiye hilo dini lya Vafalisayo. 6 Nondee, ndihigwa neng'uli, kwakuva ndikuhuvilila kila kyealongile Nguluvi kwa daada vetu. 7 Ilyo ndi kyealongile Nguluvi, ndikila kyekihuvililwa na makabila kumi na gavili va inyi lyetu kwa fipindi fyonda pamunyi na pamie. Mkomi ng'achale, Vayawudi vakunilata kwakuva lya luhuvilila ilyo. 8 Kwa liki nyenye mwiwona kuva Nguluvi sedaiwesa kuvachulubucha vanu?

9 "Ndakyene nene yune ndikadikie kuva nding'ang'wa kugita makani myolofu kulipinja litawa lya Yesu va Nasaleti. 10 Makani ago ndigo ndikagagitile ukoya ku Yelusalemu. Nene yune, ndikiva ndigavilwe umwimike kuhuma kwa vatekechi vakomi, ndikavavikile mukiwopo vanu wolofu va Nguluvi. Nawo pevahigilwe kudochwa na ndikadikile vadochwe. 11 Mala chongofu ndikavaswitilichwe vatovwe mukaye lya kufunyila Vayawudi chechigehe pono chingi, ndikivaswitilicha vaileme mbatwa lyawo. Luvipo lyangu kwavene ikali ngomi, hata ndikavasakile mbaka mumwani cha uhenja.

12 "Kigono kimwi ndikang'ang'we kuhelela ku Damasiko kuno ndikiva ndigavilwe umwimike na malagilicho kuhuma kwa vatekechi vakomi. 13 Veve mutwa, pendigehe mung'asi saa sita pamunyi, ndikawene welu mkomi kuchumba va lichuwa ukilangacha kuhuma kuluhano, ukanichungutile nene na vala veyangu. 14 Nefwe vonda tukague panyi, nene ndikapulike lichwi yandongele kwa luga kya Kibulaniya, ‘Sauli, Sauli! Wuli ukuniguda? Ukwilemecha hela ngita senga yeitova kwa ligulu lubiki lwa mtwa vake.’ 15 Nene ndikahuchile, ‘Nde ani veve Mtwa?’ Mwene akanihigile, ‘Nene ndi Yesu ambaye ukunigudicha, 16 Nondee wime, ndikuhumie neke ndikuvike uveche mnyigendwa vangu. Dauvecha ukivalongela vanu njowo cheuchilolile neng'uli na chila ambacho chave, dandikuwonesa. 17 Dandikudima na vanu va Isilaeli na vanu se Vayawudi vangi, ambawo nene ndikulagilicha kwa vene. 18 Dakuvagubutula meho gyawo na kuvawesesa vahume mukisi na kwingila muwelu, vahege mu utavala va Setani na kumgumbanikila Nguluvi. Kwa kudikila davavesa kuhechelwa sambi chawo na kutegula pono pawo pagati lya vala yevamdikie.’

19 "Ifyo, ng'achale Agilipi sendikavesile kugadikila gala Nguluvi gyeandiwonise. 20 Ila ndikavangile kulanducha tandi kwa vanu va ku Damasiko, kangi kwa vala vanu vevakali ku Yelusalemu na inyi yonda lya Yuda na kwa vanu se Vayawudi. Ndikavaswitiliche vamsedukile Nguluvi na kuwonesa wachi wachi kwa kugagita gala gyeakugakela Nguluvi. 21 Kwa kugagita ago, Vayawudi vakanibatile pendikali ku kaye lya Nguluvi, vakagechile kunidocha. 22 Ila Nguluvi akanitangile, mbaka kigono kya neng'uli ndimile baha, ndikilonga gala gyonda gendigalole, vakomi na vadodo. Gendilonga gala ambagyo vavichi va Nguluvi na Musa vakalongile dagihuma, 23 kuva ikamng'ang'ise Kilisito agudwe na kuva va kwanja kuchulubuka, neke alanduche kuva welu va ukombosi ukuvang'alicha nondee vanu vonda, Vayawudi na vala se Vayawudi." 24 Paulo peafikile baha kwitasa, Fesito akabwatile, "Paulo! Una, lukwale! Kukwimba kwa figono fyolofu, ikugitile uveche na lukwale!" 25 Ila Paulo akahigile, "Nene, ndihela lukwale mkomi Fesito. Kyendikulongela ndi undakyene. 26 Veve ng'achale Agilipi ukugachela makani ichi, kwa ifyo ndiwesa kuywanga bila wogofi pautalo lyako. Ndihela masaka kuva makani ago gichelwa kwa veve kwakuva lukani ulu selikagitilwe mufyama. 27 Ng'achale Agilipi, ukuvaidikila vavichi va Nguluvi? Ndichela kuva ukuvaidikila."

28 Agilipi akamhigile Paulo, kwa chipindi ichi chidodo dawivesa kunigita ndi mdikie Kilisito.

29 Paulo akamhigile, "Ndikumlumba Nguluvi kuva, iveche kwa chipindi chidodo awu chitali, se veve hela bali vonda vevakunipulikicha neng'uli vawese kuva ngita nene, ila se na ichi mindegei gya kyuma."

30 Baho ng'achale Agilipi, mkomi va mwani na Beliniki na vala vevakali pamwi navo, vonda vakakwimile. 31 Pevahegile, vakalonganile, "Munu uyu seagitile kyokyonda kye kumgita kudochwa awu kuwopwa." 32 Nave Agilipi akamlongie Fesito, "Munu uyu ngavamlekile ngita sengaasukile kuhelela kuhigwa kwa Kaisali ng'achale mkomi va Loma."