1 Chipindi chilachila, Ng'achale Helode akavabatile vanu vamonga yevamdikie Yesu Kilisito na kuvagudisa. 2 Akamdochile Yakobo, mkolo vake Yohani kwa lipanga. 3 Peawene Vayawudi vakeliwe na kila kyeagitile, akaendeliye, akambate Peteli. Lichowo ulo lukagitilwe chipindi cha lihungu lya mibumunda seivikilwe lisimika. 4 Peteli peabatilwe akavikilwe mukihopo, panyi lya vadima va fipinga fitai fya vapuga vatai vatai. Helode akasakile peichumba Pasaka amuhumiche Peteli palutalo lya vanu neke amuhige nongwa. 5 Peteli peakali mukihopo, vanu vevamdikie Yesu, vakali vikumsukia kwa Nguluvi kwa lengo limwi.

6 Payave kufikila kigono kyeasakile Helode, kumuhumicha Peteli palutalo lya vanu, pamie Pateli avasile pagatigati lya vapuga vavili, akiva ahopilwe milegei gya kyuma givili, kuno vapuga vakali vidima mlyangilo mkomi va kihopo. 7 Bahobaho ndumindumi va kuluhano va Nguluvi akahumie na welu ukang'alika mgati lya kihopo. Yula ndumindumi va Nguluvi akamuhogosile Peteli mubafu na kumlandamusa, akalongie, "Wime kisatu!" Bahobaho chila ndegei gya kyuma chechihopilwe mumawoko chikague. 8 Ndumindumi va kuluhano kwa Nguluvi akamlongie, "Fwale myenda gyako na makobasi gyako." Peteli akagitile ifyo. Baho akamlongie, "Uyiwope mwenda vako na unifwate." 9 Peteli akamfwatile ndumindumi va kuluhano kwa Nguluvi na kuhuma kwivala mukihopo. Seachele gyegihuma gakali ndakyene awu Nguluvi akumwonesa kinu. 10 Peteli na ndumindumi uyo va kuluhano kwa Nguluvi vakachumbile kwa vadima vevakali vidima mulyangilo va kwanja na va pili, vakafikile mumlyangilo va kyuma va kuhumila mukiwopo na vakwingilila ku mwani. Ugo mlyangilo ukadundwike uwene, navo vakahumile kwivala. Pevakali vigenda ng'asi yimwi na bahobaho ndumindumi uyo va kuluhano kwa Nguluvi akamlekile Peteli weka hela.

11 Baho Peteli peachele gyegihumile akalongie, "Nondee ndichela ndakyene kuva Mtwa amlagiliche ndumindumi vake va kuluhano kwa Nguluvi, anihumiche mumawoko gya Helode na kuhuma mu njowo chonda chevahochile Vayawudi gihumile."

12 Peachele ifyo akahele kukaye lya Maliya, maye va Yohani litawa lyake lingi Maliko. Vanu volofu vakali vekekung'esile mula kumsuka Nguluvi. 13 Peteli akakong'ola mlyangilo va kwivala na mnyigendwa yumwi muhinja yekemelwa Loda, akahele pamumlangilo kumpulikicha. 14 Uyo mhinja peachele lichwi lya Peteli, akahekelela hilo, akawuyile kuno seadinduwe mlyangilo na kuvalongela kuva, "Peteli agehe pa mlyangilo!" 15 Vakamlongie yula mhinja, "Una lukwale!" Ila mwene akaendeliye kulonga kuva ndakyene. Nawo vakamlongie, "Uyo ndi ndumindumi vake kuhuma kukyanya kwa Nguluvi." 16 Peteli akali ahendeliye kung'ola mlyangilo. Pambele vakadindue mlyango vakamwene, pevamwene vakadudwive hilo. 17 Peteli akagolise liwoko lwake neke vachikile chii, akavalongie wuliwuli Mtwa peamuhumiche mukihopo, "Baho akavalongie kuva mlonge njowo ichi kwa Yakobo na vadikila vangi." Baho akahuma akahele pono yingi. 18 Pekukie, kukahumie wogofi mkomi pagati lya vapuga kutigila gegampatile Peteli. 19 Helode akaswitiliche vamsake kila pono, ila sevawese kumubata. Akavawuchile vala vapuga sevawesile kumhiga unofu, baho akaswitiliche vahechwe pono pa udimo.

Baho Helode akahumile Yudeya na kuhelela kwikala ku Kaisiliya.

20 Ng'achale Helode avipilichwe hilo na vanu va inyi lya Tilo na Sidoni, ifyo vanu va inyi lya Tilo na Sidoni ndi vanu va mwani iyo vakiungene kuhelela kuywanga nave, vakaswitilicha Bulasito yeakali munu va pepi na mwimilicha va finu fya ng'achale aveche pamwi navo. Baho vakamweleliye ng'achale Helode kumsuka kuveche na lutengamaso mugati lyao, kwakuva vanu va mwani igo vakwipatila kyakula kuhuma ku inyi lya ng'achale uyo.

21 Kigono kimwi kyekihaguliwe, Helode akiva afwalile myenda gyake gya ung'achale na kwikala pakigoda kya ng'achale, akavadalikila vanu. 22 Vala vanu vakalongile kwa lichwi likomi, "Iyi ndi lichwi lya Nguluvi na se lya munu." 23 Bahobaho ndumindumi va kuluhano akamgwisa panyi Helode kwakuva seamgavile Nguluvi wula unjuma. Fikoko fikamliye, akafua.

24 Luchowo lya Nguluvi likaginile na kulutala.

25 Balinaba na Sauli pevamalile yila kasi yevahele kuigita, vakawuyile ku Yelusalemu vakiva pamwi na Yohani litawa lyake lingi Maliko.