1 Vanjagila na vevamdikie Yesu yevakalile ku Yudea vakapulike kuva vanu se Vayawudi validikie luchowo lwa Nguluvi. 2 Ndeni, Peteli akawuyile ku Yelusalemu, vanu vevamdikie Kilisito vevakali vadumulwe bina vakamupinjile Peteli vakilonga, 3 "Veve ukahele kwikala na vanu sevadumulwe bina na ukaliye navo!" 4 Baho Peteli akavanga kuvalongie wachiwachi kila kinu kyekihumie kuhuma pamwandi.

5 Akalongie, "Kigono kimwi pendikali ku mwani Yopa pendifunya, Nguluvi akandiwonise njowo wachiwachi, kinu ngita mgololo mkomi ikwika panyi kuhuma kuluhano ikiva ibatilwe mulupembo chake chita, ikavikilwe pepi na nene. 6 Ndikang'omelela mugati kwa unofu ndikawene, vang'oko vonda vevali na magulu mitai na vang'oko vevikwava na fidege fya kululanga. 7 Baho ndikapulike lichwi yikundongela, ‘Peteli namuke, hinje, uliye.’ 8 Ila nene ndikalongie, ‘Hamu Mtwa! Sendiwesa kuliya kinu kinjanganifu na kyekikanilwe na Nguluvi na seking'ang'ilwe kulilwa.’ 9 Ila lichwi yapulise kangi kuhuma kuluhano, ‘Bihile kufikemela fihofu kuliya finu ambafyo Nguluvi afigitile filiwe.’ 10 Njowo ichi ikahumile mala chidatu na pambele yila mgololo ikawuyile kangi kuluhano. 11 Bahobaho vanu vadatu vevakali valagilichwe kwa nene kuhuma Kaisalia vakahimile pakaye yendikali ndikwikala. 12 Muhe va Nguluvi andongile ndihele na vene ndibihele kwiwuchahucha. Ava lukolo sita vakalongochine na nene kuhelela ku Kaisalia na ukoya tukaingie mukaye mwa Kolineli. 13 Kolineli akatulongie akali awene ndumindumi va Nguluvi peihimile mukaye lyake na kumlongela, ‘Uvalagiliche vanu ku mwani va Yopa, vakamkemele Simoni yeichelwa kwa litawa lya Peteli. 14 Mwene dakulongela njowo chechikuwokola veve na kaye lyako lyonda.’ 15 Pendivangile hela kulonga, Muhe va Nguluvi ukavakwikila ngita peatubwitukie nefwe pamwandi. 16 Baho ndikawiwuke njowo chealongile Mtwa, ‘Yohani akabatise kwa malenga na nyenye mwibatiswa kwa Muhe va Nguluvi.’ 17 Suwe, ikiva Nguluvi avagavile fupo vanu se Vayawudi ngita yiyila yeatugavile nefwe petumdikie Yesu Kilisito, nondee nene ndi ani mbaka ndigeche kumpinja Nguluvi?"

18 Pevapulike ago, vakalekile kumpinja Peteli, vakamnjuma Nguluvi, vilonga, "Nguluvi avagavile vanu se Vayawudi fwasi lya kuhongecha sambi chawo neke vapatile uwumi va mbepali!"

19 Vala yevayanganike kuhumana na magudo gegahumile kwa kufua kwa Setefano vala vadikila vevayaganike vangi vakahele kutali mbaka Foinike na Kipilo na Anitiokia, vakidalika njowo cha Yesu kwa Vayawudi hela. 20 Ila vamonga vadikila vevahumile ku Kipilo na Kilene, navo vakahele Anitiokia vakavadalikie vanu se Vayawudi njowo cha Yesu. 21 Nguluvi akavatangile na vanu volofu vakamdikila na kumsedukila Mtwa.

22 Njowo icho cha vanu avo chikafikile kwa vanu vevemdikile Kilisto ukoya Yelusalemu, navo vakamlagicha Balinaba ahele ku Anitiokia. 23 Balinaba peafikile na kuwona Nguluvi peavafunyile kwa vanu avo, akakedukile hilo na kuvalongela vagangamale vaendelise kumnjuma Mtwa. 24 Balinaba akali munu mnofu na alongochilwe na Muhe va Nguluvi na akamdikie Nguluvi, lipinga likomi lya vanu likakwegilwe kwa Mtwa.

25 Pambele Balinaba akahele ku Taliso kumsaka Sauli. 26 Peampatile Sauli, akamsindike Anitiokia. Navo vonda vavili vekalile na vanu vevamdikie Kilisito kwa mwaka wumwi na kuwawulanicha vanu volofu. Ukoya Anitiokia ndi vachulila vakavangile kukemelwa Vakilisito.

27 Chipindi icho vamonga vavichi va Nguluvi yevahumile ku Yelusalemu, vakafikile Anitiokia. 28 Yumwi vawo, litawa lyake Agabo, ahimile na kwa umwimike va Muhe va Nguluvi, akalagule kuva daihumila lumyai ngomi ku inyi yonda ambacho Valumi vitavala. Lumyai ulo yahumie chipindi cha ng'achale Kilaudio. 29 Vala vachulila, vakalamue kila munu kwa uwimike vake, asindike kyokyonda neke kuvatanga vala vanu vevamdikie Yesu, yevakalile inyi lya Yudeya. 30 Suwe, vakagitile ifyo na vakavalagiliche Balinaba na Sauli, vasindike kwa vagogolo va lipinga lya vanu vevamdikie Kilisito.