1 Petulagine navo, tukakang'ie wato kukahela mbaka ku Kosi. Kilau lyake tukafikile ku Lodi na kuhuma ukoya tukahele ku Palata. 2 Ukoya tukauwene wato yeuhelela ku Foiniki, tukakang'ie na kuhega. 3 Petufikile pono petukali tukawesile kuwona kigunguli kya Kupilo, tukachumbile lubali lwa kwivindi kwelela Silia. Petufikile ku mwani va Tilo tukaimile vakwisile michigo gyegikali muwato. 4 Ukoya tuvawene vanu vevamdikie Yesu, tukakalile pamwi navo kwa figono saba. Vadikila avo vakali viywanga kwa ludali lwa Muhe va Nguluvi, vakamlongie Paulo ubihile kuhelela ku Yelusalemu. 5 Ila chipindi chetu pekifikile tukahegile. Vonda pamwi na vadala na vana vawo tukehelela pamwi mbaka kwivala lya mwani, tukafungamile mung'umbung'umbu lya inyanza tukamlumba Nguluvi. 6 Petulaganile navo, tukakang'ie muwato, vene vawuyile kukaye chawo.

7 Baho tukaendelie na lugendo kuhuma ku Tilo mbaka ku Tolemai ukoya tukavahungila vanu vevamdikie Yesu na tukakalile navo kwa kigono kimwi. 8 Pamilau lyake tukahegile kuhelela ku Kayisalia. Ukoya tukahele mukaye lya Filipo mdalika wa Njowo cha Nguluvi. Mwene akali yumwi va vala saba yevahaguliwe ukoya Yelusalemu. 9 Akali na vahinja vatai ambawo vakali na umwimike va kulonga njowo cheilonga Nguluvi. 10 Petukalile ukoya figono fidodo, mvichi yumwi yeakemeliwe Agabo afikile kuhuma ku inyi Yudeya. 11 Peatufikile akanyamuwe lufunga lya Paulo, akajiwopile mawoko na magulu, akalongie, "Muhe va Nguluvi elonga ende, ‘Vayawudi va ku Yulasalemu vakumuwopa ndena munu munya lufunga ulu na kumsindika kwa vanu se Vayawudi.’" 12 Petupulike njowo ichi nefwe na lukololo vangi tukamsukile abihile kuhelela ku Yelusalemu. 13 Ila Paulo akahigile, "Mwisaka kulonga liki? Muli mwivemba na kutenya numbula? Ndiandalise suwe se hela kuvikwa mukiwopo ukoya Yelusalemu, ila hata kufwa kwa kuva lya Mtwa Yesu."

14 Petulemwile kumswitilicha neke abihile kuhelele tukachikile, tukalonga hela, "Cheikele Mtwa kigitwe!"

15 Petukalile baha kwa figono, twawopile michigo gyetu, tugaendelela na lugendo kupita ku Yelusalemu. 16 Vamonga va vala vachulila mwani va Kayisalia vakahele pamwi na nefwe, vakatusindika mu kaye lya munu yeakemeliwe Mnasoni ambalye tukakalile kwa mwene kwa chipindi. Mnasoni uyo akali munya kaye va Kupilo na akali mchulila va figono fyolofu.

17 Petufikile ku Yulasalemu, lukolo vevamdikie Kilisito vakatwanuke unofu hilo. 18 Pamilau lyake Paulo akahelele pamwi na nefwe kumhungila Yakobo na vavaha vonda va lipinga vevamdikie Kilisito vakali baha. 19 Petuvahugie, Paulo akavangile kuvalongela luchowo lumwi hadi lungi ambacho Nguluvi akagitile kwa vanu se Vayawudi kwa ng'asi lya mnyigedwa vake. 20 Pevapulike ago, vakamjumile Nguluvi. Baho vakamlongie Paulo, "Lukolo vetu wilola kugehe na Vayawudi vevimwidikie Yesu na vonda vakakolele malagicho gya Musa kwa unofu. 21 Vakapulike kuva ukivawulanicha Vayawudi vonda vevikwikala mu inyi lya vanu se Vayawudi, kuva vabihile kukolela malagicho ga Musa kuvadumula bina vana vawo vala kufwata machovelelo gya Vayawudi. 22 Nondee tugite liki? Ndakyene davipulika kuva wachile ku Yelusalemu. 23 Kwa ifyo gite ngita petukukulongela. Kugehe na vanu vatai baha vihopile vavene kuva vakumgavila Nguluvi kinu. 24 Uhelele navo kulufunyo lya kuwofoga na uvahombe fila fyevatumie fyonda neke vamoge fwili chawo. Neke kila munu achele kuva kwihela undakyene pakyanya lya njowo chonda chechilongwa bali wikwikala kwa kugaginya malagicho gya Vayawudi. 25 Ila vala vanu se Vayawudi vevakali vadikila, tuvasindikie suwe balua tukivalongela njowo yeulamuwe, Mbihile kuliya chochonda kyekitambikilwe kwa valungu va udesi, mbihile kunyuwa danda mbihile kuliya huchi lya mung'oko yeafue mwene na mtane ugoni." 26 Baho, pamilau lyake Paulo akavanyamue vala vanu vatai na kugitila lufunyo lya kwiwofogecha pamwi nawo. Baho akaingie mu kaye lya kufunyila neke avalongele njowo lya figono fyefimalila kwiwofoga na kigono kya kuhecha usembe lya kila yumwinga vao.

27 Figono ifyo saba pefikali pepi kusilila, Vayawudi vevakali vahumile ku mwani va ku Asia vakamwene Paulo ku kaye lya Nguluvi. Baho vakavaswitiliche vanu vonda na vakambatile Paulo kwa ukakatima. 28 Vakabwatile, "Nyenye vanu va Isilaeli, mututange! Mwene nde munu yeichumba kila pono na kuvawulanicha vanu vonda, njowo chechikuvakana Vaisilaeli, malagicho gya Musa na pono baha pang'alile. Nondee avaingiche vanu se Vayawudi ku kaye lya Nguluvi na kwananga pono baha pang'alile." 29 Valongile ifyo nde kuva vakali vamwene Tilofimu, munu va Ifeso, akali pamwi na Paulo ku mwani, vakachele kuva Paulo akali amuyingiche ku kaye lya Nguluvi.

30 Mwani vonda ukamema ndewo, vanu kuhuma lubali lyonda, vakambatile Paulo, vakamukwega, vakamuhumicha kwivala lya ku kaye lya Nguluvi na baho milyangilo lya kaye lya Nguluvi idindilwe. 31 Chipindi vanu avo veng'ang'a kumdocha, njowo chawo chikamfikie mkomi va vapuga va ku Loma kuva mwani vonda va Yelusalemu kugehe mundewo. 32 Baho mkomi va vapuga avanyamue, vahimilicha va vapuga, akanyilile kuhelela ku lila lipinga. Vanu va lipinga lila pevamwene mkomi yula na vapuga vake, vakaleka kumtova Paulo. 33 Mkomi va vapuga akamhelelie Paulo, akambatile na kuvaswitilicha avopwe ndegei cha kyuma. Baho akawucha, "Uyu munu liki na egita liki?" 34 Vanu vamonga mulipinga lila vakali veywanga kinu iki na yungi kinu kila, yula mkomi va vapuga peawene kuva seiwesa kupatila undakyene lya luchowo kwakuva lya ndewo, yula mkomi va vapuga akaswitiliche Paulo asindikwe mu itwangilo. 35 Paulo peafikile palikwelelo, vapuga vamunyamule kwakuva vanu vendelie kugita ndewo. 36 Kwakuva lipinga lya vanu likaendelie kubwatuka vakilonga, "Mumdoche uyo!"

37 Vapuga pevakali vakumwingicha mugati lya itwangilo, Paulo akamsukile mkomi va vapuga na akamlongie, "Ndiwesa kulonga kinu?"

Yula mkomi va vapuga akamhigile, "Wuli, wichela kuywanga Kigiliki? 38 Wuli, veve se yula Mmisili ambaye ifi machuchi ukagitile uwofu na kuvalongocha vanu elufu chitai vevagehe na kyalukilo mbaka kukwelu?"

39 Paulo akavahigile, "Nene nde Myahudi, mbabwa va Taliso ukoya Kilikia mwani mkomi hilo. Ndisuka, mnileke ndeywange na vanu."

40 Yula mkomi va vapuga akamlekile. Ndeni, Paulo emile pakwelelo, akahungie vanu kwa kupunga miwoko na pevayigale, akavangile kuywanga nawo kwa Kiebulania.