1 Chipindi icho, Sauli akaendeliye kuvaogopecha vadikilwa va Mtwa kwa kuvalongela ekuvadocha. Sauli akahele kwa mtekechi mkomi, 2 akasuka agavilwe balua daikumgita achelilwe ukoya mu Kaye lya kufunyila Vayawudi ukoya ku Damasika, neke peifikila ukoya avabate vagosi na vadala vevadikie Luchowo lwa Nguluvi na kuvapilusa ku Yelusalemu.

3 Suwe peagehe mung'asi pepi kufikila ku Damasika, bahobaho lung'ali kuhuma kuluhano lukamng'aliche kubali chonda. 4 Akague panyi na akapulike lichwi yamlongie, "Sauli, Sauli! Wuli ukuniguda?"

5 Sauli akahucha, "Ndi ani veve Mtwa?"

Mwene akamhigile, "Nene ndi Yesu yekumguda. 6 Suwe, wime nondee ubite kumwani ukoya kugehe na munu yekulongela kyakugita."

7 Vala vanu vevalongichile na Sauli vihimile bahala kuno vihela kyakuywanga, vakapulike yila lichwi ila semwene munu. 8 Sauli akaimile na akadindula meho gake ila seavesile kulola kyokyonda, suwe vakambate liwoko vakamlongoche mbaka kumwani ku Damasika. 9 Sauli ikalie figono fidatu seavesile kulola na kuliya na kunyuwa kinu kyokyonda.

10 Ukoya ku Damasika kukali na mchulila va Yesu, litawa lyake Anania. Mtwa akamlongie Anania kwa kulota njosi, "Anania!"

Anania akahigile, "Ena, Mtwa."

11 Mtwa akamlongie, "Wime ubite ku ng'asi ikemeliwe, ng'asi igolwike, ukamuhuchililiche munu yumwi yeahumile Kutaliso litawa lyake Sauli. Agehe mu kaye lya Sauli nondee ekumlumba Nguluvi, 12 Nguluvi akamuwonisile Sauli lukani, akamwene munu yumwi yeikemelwa Anania ikwacha na kumvikila mawoko neke aveche kulola kangi."

13 Anania akahigile, "Mtwa ndipulike njowo cha munu uyo kuhuma kwa vanu volofu, ndipulike unjanganifu yeagitile kwa vanu vako ukoya ku Yelusalemu. 14 Mwene achile baha kwa mamlaka kuhuma kwa vatekechi vakomi, avese kuvabate vonda vevakukufunya veve."

15 Ila Mtwa akamlongie Anania, "Ubite hela, kwakuva ndimhaguwe munu uyu anikumbanikile, alanduche litawa lyangu kwa vanu vonda seva Vayawudi na vang'achale vawo na kwa vanu va Isilaeli. 16 Nene damuwonesa namuna peing'ang'a kugudika kwa litawa lyangu."

17 Anania akahele akaingile mugati, baho akamvikile mawoko Sauli, akalongie, "Mkolo vangu Sauli, Mtwa Yesu, yeakuhumie mung'asi peukali ukwacha baha, anilagiliche neke uvese kulola kangi na ulongochwe Muhe va Nguluvi." 18 Bahobaho finu ngita mipalapato fikaguwe kuhuma kumeho gwa Sauli na akavesile kulola kangi, baho akawime na akabatiswa. 19 Pealie kyakuliya, ludali chake chikamuwuyile.

Sauli ikalile kwa figono fidodo na vanu vevamdikie Yesu ukoya ku Damasika. 20 Bahobaho Sauli akavangile kudalika mukaye cha kufunyila Vayawudi, kuva Yesu mwana va Nguluvi.

21 Vanu vonda vevampulike vakadudwive, vakilonga, "Wuli, munu uyu se yuyula yeavadochile vala vevakali vamdikie Yesu Kilisito ukoya ku Yelusalemu? Kangi achile baha akiva ing'ang'a kuvabata vanu ava na kuvasindika kwa vatekechi!" 22 Sauli akawongekile ludali na akavawonesa Vayawudi vevagehe Damasika, kwa kuvawonesa wachiwachi kuva Yesu ndi Kilisito. 23 Pefipitile figono fyolofu, Vayawudi vikakung'ese na kusaka ng'asi lya kumdocha Sauli. 24 Ila Sauli akachelile njowo chawo. Pumie na pamunyi Vayawudi vakumlolela mumilyangilo mikomi gya kwingilila kumwani neke vapate kumdocha. 25 Ila pamie vanyigendwa vake vakamnyamue Sauli, vakamvikile mugati lya lindilu na kumkwisa kuchumbila libwenge lyelikali kulukanji lwa mwani.

26 Sauli peafikile ku Yelusalemu akageche kwiunga na vala vachulila. Ila vonda vamwogwipe kwakuva sevavesile kumwidikila kuva mwene ndi mchulila. 27 Balinaba akamnyamule Sauli akamsindika kwa vanjagila. Akavalongie Sauli peamwene Mtwa peakali kung'asi na Mtwa peaywangile nave. Akavalongie kangi pealanduliche litawa lya Yesu kwa ukakatima ukoya ku Damasika. 28 Sauli ekalile pamwi navo, akagendile Yelusalemu yonda na kudalika luchowo lwa Mtwa kwa ukakatima. 29 Kangi aywangile na kulumbana na Vayawudi veviywanga Kigiliki, ila vavo vakageche kumdocha. 30 Vala lukolo vevamdikie Yesu pevapulike njowo icho vakamsindike Sauli ukoya Kaisalia, vakamleka ahele ku Taliso.

31 Chipindi icho lipinga lyelikumdikila Kilisito lyaendelie kugangamala ponda muinyi lya Yudea na Galilaya na Samalia. Na kumginya Mtwa na vakaongelike kwa umwimike va Muhe va Nguluvi.

32 Peteli peakali echumba kila pono, kigono kimwi akahele kuvagendelela vanu va Nguluvi vevakali vakwikala ku Lida. 33 Ukoya akamwene munu yumwi yeakemelwa Ainea yeagonile pauli li kwa myaka minane kwa utamwa va lugaso. 34 Peteli akamlongie, "Ainea, Yesu Kilisito akunaniche. Lamuke nyengeleche kitefu kyako." Bahobaho Ainea akalamwike. 35 Vanu vonda vevikwikala Lida na mulivindi lya Saloni pevamwene Ainea, navo vakamdikila Mtwa Yesu.

36 Kukali na mchulila yumwinga mkidala ku mwani va Yopa yeakemelwa Tabita kwa Kigiliki ndi Dolikasi, mana lyake "Libato" Mkidala uyo akali ikigita manofu figono fyonda na kuvatanga vahangala. 37 Chipindi kila mkidala yula akatamike na afue, vanu vakauwogofiche mfimba gwake na vakausindike mulilingo. 38 Yopa sepatali na mwani va Lida, vachulila pevapulike kuva Peteli agehe ku mwani va Lida, akavalagiliche vanu vavili kwa mwene, neke vamsuke, "Ache kwa vene nondee." 39 Peteli akahele pamwi navo. Peafikile vakasindikwe kulilingo, mumo mukali na vagane vonda vakamchungutile Peteli kuno vakivemba na kumwonesa myenda gyeahonile Dolikasi peakali wumi. 40 Peteli avahechile kwivala vonda, baho akafugamile akamsuka Nguluvi. Akailolile yila lifimba, akalongie, "Tabita wime." Tabita akadindue meho gyake na peamlolile Peteli, akalile. 41 Peteli akamkolela liwoko akamnamue, pambele akavakemele vala vanu va Nguluvi na vala vagane akavagavila yula mkidala akiva wumi. 42 Njowo icho chikachelilwe ku mwani yonda lya Yopa, vanu volofu vakamdikie Mtwa. 43 Peteli akalile figono fyolofu ukoya Yopa, akalile kwa munu yumwi yeigelanicha finu fya ngwembe, yeakemelwa Simoni.