1 Suwe, Mtekechi Mkomi akamuwuchile Sitefano, "Wuli, njowo ichi ndi ndakyene?"

2 Sitefano akavahigile, lukololo vangu na daada vangu, mnipulikiche! Mgogolo vetu Ibulahimu pehave kuhelela kwikala Halani Ukomi va Nguluvi ukamuhumie ukoya ku Mesopotami. 3 Nguluvi amlongie, uhege muinyi lyako na uvaleke vanu vako na uhelele mu inyi dandikuwonesa! 4 Ibulahimu akailekile inyi lya Vakalidayo, akahele kwikala Halani. Peafue daada vake, Nguluvi akamuhumiche Halani na kumleta akale muinyi iyi yemwikwikala nondee. 5 Nguluvi seamgavile hata pono padodo pa inyi iyi iveche lyake, ila Nguluvi akamlongie kuva mwene na ulelo vake, akumgavila inyi iyi, angava chipindi ikyo Ibulahimu seakali na mwana. 6 Nguluvi akamlongie ndeni, filelo fyako fisindikwa muinyi ambayo se yavo navo vigitwa vasutu na kugitwa unjanganifu kwa myaka miya chitai. 7 Ila nene ndikuvatova vanu va inyi ilyo yeikuvagita nyenye kuvecha vasutu, baho ndikuvahumicha ku inyi ilyo vache pono baha vanilumbe. 8 Nguluvi amlagiliche Ibulahimu kudumula bina iveche kimanyilo kya Lyagano lyake. Ifyo Ibulahimu amdumule bina Isaka kigono kya nane peababilwe. Na Isaka amdumule bina mwana vake Yakobo. Yakobo agitile ndeni kwa vala vavaha vetu kumi na vavili. 9 Kwakuva vavaha vetu vamwonilie wifu Yusufu lukololo vawo, vakamguchile, ngita msutu ku Misili. Ila Nguluvi akali pamwi na Yusufu, 10 akamwokola kuhuma pamagudo gyonda. Nguluvi akamgavile umwimike na akamkelise Falaho ng'achale va ku Misili, hata Falaho akamvikile aveche mkomi va inyi lyonda na mkomi va kaye lya king'achale. 11 Pambele kukahumie na lumyai muinyi yonda lya Kumisili na Kanani, yeigitile kuhumila utatala mkomi na kyakuliya kikavasilie vagogolo vetu. 12 Yakobo peapulike kuva ukoya ku Misili kigehe kyakula, akavalagiche vana vake, ndi vagogolo vetu vahele ukoya ku Misili kwa mala lya kwanja. 13 Pevahelele mala lya uvili, Yusufu ichelise kwa lukololo vake, Falaho ng'achale va ku Misili akavachela lukolo va Yusufu. 14 Yusufu akalagicha vanu vakamkemele Yakobo daada vake pamwi na lukololo vake, vonda vakali vanu sabini na vahanu. 15 Ndeni Yakobo akahele ku Misili, mwene na vagogolo vetu vonda vakafue ukoya. 16 Mifimba gwao ikawuyiswe Shekemu, ikasiilwe pa likabuli yeagulile Ibulahimu, kuhuma kwa vana va Hamoli ukoya Shekemu kwa sendi ndodo.

17 Chipindi pekifikile kya Nguluvi kugita kila kyeamlongie Ibulahimu, vanu vetu vakababile na kwongeleka ukoya ku Misili. 18 Baho ng'achale yumwi yeseamchelile Yusufu akavangile kulongocha ukoya ku Misili. 19 Ng'achale uyo avagitile vakolo vetu uwakata na vakavaswitilicha vagogolo vetu vavatage fyali fwao kwivala neke vafue. 20 Muchipindi chila Musa akababilwe na akali mwana mnofu hilo, alelilwe mukaye lya daada vake kwa myechi chidatu, 21 pevalemwile kumfiya vakamtagile, muhinja va Ng'achale Falaho akamholile na kumlela ngita mwana vake. 22 Musa akawulanichwa njowo chonda chauginyange cha Vamisili na akavechile munu yeakali na umwimike kwa kulonga na kwa kugagita.

23 "Musa peakali na myaka alobaini akalamue kuhelela kuvagendelela vakolo vake Vaisilaeli. 24 Ukoya amwene lukolo vake yumwi igitilwa uwofu na Misili, akahele kumutanga, kwa kupilusa kisasi akamtova yula Mmisili na kumdocha. 25 Musa akahochile lukolo vake vangichela kuva Nguluvi amlagiche mwene kuvawokola, ila vawo sevachele. 26 Pamilau lyake, avawene Vaisilaeli vavili vikwitova, akagecha kuvapatanisa akilonga, ‘Nyenye nde lukolo, wuli mwikwigitila unjanganifu mwavene?’ 27 Yula yeakali akumtova muyage akamsung'ile Musa palubali, akamwucha, ‘Ndi ani yeakuvikile veve kuva mkomi na mswitilicha vetu? 28 Wuli, wikela kunidocha ngita golo peumdochile yula Mmisili?’ 29 Musa peapulike njowo icho, akanyilila ukoya ku Midiani peakalile ngita mgenji na ukoya akababile vana vavili va kigosi.

30 "Peichumbile myaka alobaini, ndumindumi va kuluhano va Nguluvi akamuhumie Musa pakisako kyekikali kikwaka lyoto ukoya kukwelu, pepi na kidunda Sinai. 31 Musa akaduduve hilo kulola kinu ikyo akahegelile pepi neke alolele unofu, ila akapulike lichwo lya Mtwa. 32 ‘Nene ndi Nguluvi va daada vako, Nguluvi va Ibulahimu, Isaka na Yakobo.’ Musa akaogwipe hilo na seagechile kulola. 33 Mtwa akamlongie, ‘fule makobasi gyako, kwakuva pono baha pewimile ndi pono pang'alile. 34 Niyawene magudo gevigitilwa vanu vangu ukoya ku Misili. Nipulike kivembo kyao, nene ndikile kwacha kuvawokola, suwe nondee dandikulagicha ku Misili.’

35 "Uyu ndi Musa yula vamkanile vakilonga, ‘Ndi ani akugitile uveche mkomi na mswiticha vetu?’ Nde yula yealagilichwe na Nguluvi kuva mkomi na muwokola kuchumbila ndumindumi va kuluhano kwa Nguluvi yeamuhumie Musa pakisako kyekikali kikwaka lyoto. 36 Yeavalongochile vanu va Vaisilaeli kuhuma ku Misili, kwa kugita filuviluvi na umanyitu myolofu ku inyi lya Misili na ku inyanza lya Shamu na kwa myaka alobaini kukwelu. 37 Musa mwene avalongie vanu Vaisilaeli, ‘Nguluvi akuvaletela mvichi vake ngita peaniletile nene kuhuma mugati mwa vakolo venu.’ 38 Musa akali pamwi na vagogolo vetu mulipinga kukwelu, yeaywangile na ndumindumi va kuluhano kukidunda Sinai, akawanuke njowo cha wumi neke atugavile nefwe.

39 "Ila vagogolo vetu vakanile kumpulikicha Musa, badili lyake vakamkana na kudoboka kuwuya ku Misili. 40 Vakamlongie Haluni, ‘Tugitile valungu vangi vatulongoche mu ng'asi, kwakuva Musa yeatulongoliche kuhuma ku Misili setuchela gegamhumie ukoya.’ 41 Baho vakagitile lig'omong'omo ngita ngwada, vakakihumichie usembe va kunyanya na kugitila lihungu kinu kyevagitile kwa mawoko gyawo vavene. 42 Ila Nguluvi akahegile pagati lyao, akavalekile vafunye nondwa na finu fya kuluhano, ngita peisimbilwe mukiganilo kya vavichi va Nguluvi,

nyenye vanu va Isilaeli!

Se nene yemunihumichile usembe va vang'oko na usembe,

kwa myaka alobaini ukoya kukwelu! 43 Nyenye mlikitegula kyama kya mlungulu Moleki,

Na ling'omong'omo lya nondwa lya mlungulu venu Lefani.

Fing'omong'omo fyemfigitile nde mkafifunyile.

Kwa ifyo ndikuvasindika vasutu kutali kuchumba Babeli."

44 Ukoya kukwelu vagogolo vetu vakali na kyama kya kuvawonesa kuva Nguluvi agehe pamwi navo. Lyeligalanichwe ngita Nguluvi peamlongie Musa agite, kuwananisa ngita peawoniswe. 45 Baho vagogolo vetu vanjanukine kyama ikyo vene kwa vene, mbaka chipindi cha Yoshua, pevategule inyi yila kuhuma kwa vanu yesevakali Vaisilaeli, yevadagilwe na Nguluvi, kyama kila kikasiglie bahala mbaka chipindi cha Dawudi. 46 Dawudi akamkelise Nguluvi, nave Dawudi akamsuka Nguluvi amleke amchengie kaye mwene Nguluvi va Yakobo. 47 Ila Solomoni nde yeamchengie Nguluvi kaye. 48 Ata ndeni, Nguluvi yeagehe kukyanya hilo seakwikala mukaye chechichengilwe na vanu, ngita mvichi vake pealongie,

49 Mtwa ilonga,

kuluhano ni kigoda kyangu kya ung'achale,

na inyi ndi pono panene pakuvikila magulu,

Kaye yeigehe wuli dakunichengela nene kwikala,

awu pono pakutulula nene kwivecha kwiya?

50 Wuli, se nene yendigitile finu fyonda ifyo?

51 Pambele Sitefano akaendeleye kulonga, "Nyenye vanu ndi vapuva! Masigicha na numbula chenu ndi ngita vanu yesevakumchela Nguluvi, nyenye ngita vagogolo venu. Figono fyonda mukumkana Muhe va Nguluvi. 52 Wuli, kugehe na mvichi yeyonda yeseagudwe na vagogolo venu? Navo vakavadocha, Nguluvi avalagiliche vala valanduche kwacha kwa mwene yula yeakali msanji, nondee nyenye mumkanile na mumdochile. 53 Nyenye muwanuke malagilicho gya Nguluvi lyeliletilwe kwa nyenye kuchumbila vandumindumi va kuluhano kwa Nguluvi, ila semwidikie."

54 Vala vagogolo va ludamo pevapulikile ago, vakavipile hilo na vakakekene kumeho. 55 Ila Sitefano kwa kulongochwa na Muhe va Nguluvi, akalolile kukyanya kuluhano, akauwene ukomi va Nguluvi na Yesu agavilwe unginyange kuchumba vonda. 56 Akalonga, "Lole! Ndiwene kuluhano kudinduliwe na Mwana va Munu imile palubali lya ndewo kwa Nguluvi!"

57 Vakakanile kumpulikicha, vakadinda matu gyao, vakabwatile navo vakamng'etukila Sitefano. 58 Vakamhumicha kwivala lya kumwani, vakamtovile kwa maganga. Vala vevakali vakumtova vakafulile mikoti gyawo na vakavika panyi pamagulu gya mdimi yeikemelwa Sauli. 59 Pevaendeliye kumtova kwa maganga Sitefano akamlumba Nguluvi, "Mtwa Yesu iyanuke muhe vangu!"Munu idochwa kwa maganga 60 Baho akafugame, akavembile kwa lichwi likomi akalongile, "Mtwa, vambonile lusungu sambi iyi." Peamalile kulonga ago, akafue.