1 Figono fidatu pefichumbile, Fesito akahumile ku Kaisalia na akahele ku Yelusalemu. 2 Ukoya vatekechi vakomi pamwi na vilongochi va Vayawudi vakaachile pautalo lya Fesito na kumlata Paulo. 3 Vakamsukile hilo Fesito, avagitile lusungu kwa kumsindika Paulo ku Yelusalemu kwakuva vakasakile kumfyamila na kumdocha mung'asi. 4 Ila Fesito akahigile, "Paulo adimwa kwa unofu ukoya ku Kaisalia na nene ndihelela ukoya figono fidodo fyefikwacha. 5 Muvaleke filongochi venu vahelele ukoya ku Kaisalia pamwi na nene vakahumiche malato gyawo kukyanya lyake ngita agitile kyokyonda kiwofu."

6 Fesito akwikala navo kwa figono finane awu kumi ifi, baho akawuyile kuhelela ku Kaisalia. Kilau lyake akahele mulidamo, akaswitiliche Paulo asindikwe mu ludamo. 7 Paulo peafikile, vala Vayahudi vevachile kuhuma ku Yelusalemu vakamchungutile na vakavangile kuhumicha malato makomi ambagyo segigawanine. 8 Paulo akayitasile na kulonga, "Nene sendigitile nongwa lyolyonda kutigila malagicho gya Vayawudi, vala ku kaye lya Nguluvi, vala ku Kaisalia."

9 Fesito akasakile kuvakelisa Vayawudi, ifyo akamuwucha Paulo, "Wuli, wikela kuhelela ku Yelusalemu na ukoya ukahigilwe pautalo lyangu kwa malato aga?"

10 Paulo akahigile, "Ndimile pautalo lya muhiga nongwa ambalye yeavikilwe na Kaisali mkomi va Loma, baha nding'ang'wa kuhigilwa. Ngita peuchela unofu, sendigitile uhofu wowonda kwa Vayawudi. 11 Ngita nene ndena malato lya kugita nongwa lyolyonda yenditakilwa kudochwa, sendikana kufua. Ila ngita kwihela undakyene pa malato yeyalongilwe na vanu ava, kwihela yeiwesa valongela vanigitile kyevisaka kunigita. Ndisuka mnisindike kwa mkomi va Loma akanihige!"

12 Ila Fesito peasindile kuywanga na vanu va ludamo lyake lya kuhiga nongwa akamlongie Paulo, "Usukile uhelelekupulikichwa kwa mkomi va Loma, suwe, dawihela kwa mkomi va Loma."

13 Figono fidodo pambele, ng'achale Agilipi na Beliniki vakafikile Kaisali, neke vahumiche uginyange vawo kwa Fesito. 14 Na pevakali ukoya figono fyolofu, Fesito akamhumulila ng'achale njowo cha Paulo akalongie, baha kuna munu yumwi ambalye Felikisi akamlekile adimwe kwa unofu. 15 Pendihelele ku Yelusalemu vakomi va vatekechi na vavaha va Vayawudi vakanilongie njowo chake na vakanisukile ndimuhige nongwa. 16 Ndikavahigile kuva se machovelelo gya Valoma kumuhecha munu yeyonda ahigilwe kabula lya kutang'ana na valatwa vawo na kugavilwa fwasi lwa kwitasa. 17 Ifyo vonda pevatang'ane baha sendichelewile kigono kye kyachile ndikahigile nongwa, ndikalagiliche munu uyo aletwe. 18 Na vala vevamlatile pevimile sevalongile luchowo lyolyonda liwofu ngita pendihochile, 19 Ila vakali na malumbano myolofu cha dini chawo hela na njowo cha munu yumwi yeafuwe yeikemelwa Yesu ila Paulo akali akilonga kuva munu uyo agehe wumi. 20 Kwakuva sendichelege lya kugita kutigila malato ago. Ila ndikamuwucha Paulo ngita ukela kuhelela ku Yelusalemu na kuhigwa malata ago. 21 Ila Paulo akasakile akapulikichwe na ng'achale mkomi va ku Loma, ifyo ndikalagiliche vamdime kwa unofu mbaka pendikumsindika kwa ng'achale mkomi va ku Loma. 22 Agilipi akamulongie Fesito, ndikela kumpulikicha munu uyu, Fesito akamlongie, "Dampulikicha kilau."

23 Pamilau lyake, Agilipi na Beliniki vakafikile kwa lukeduko mkomi muludamo vakiva vilongochine na vakomi va vapuga na vilongochi va mwani. Fesito akaswitiliche Paulo aletilwe mugati lwa ludamo. 24 Fesito akalongie, "Ng'achale Agilipi na vanu vonda vemugehe baha, mukumlola munu uyu? Vayawudi vonda va ukoya ku Yelusalemu na vevali baha Kaisalia vakanisukile ndimuhumiche munu uyu adochwe. 25 Ila nene sendiwene kuva seagitile luchowo lwa kung'ang'ilwa kudochwa. Ila Paulo yumwene akasukile akapulikichwe na ng'achale mkomi va Loma ndikaswitiliche kumsindika ku Loma. 26 Ila nene ndihela luchowo kwa mwene ambalyo lya ngandisimbe kwa ng'achale mkomi va Kaisali. Ifyo ndimletile baha pautalo lyenu na pautalo lyako veve ng'achale Agilipi pemsinda kumuhucha ndipate kinu kya kusimba. 27 Kwakuva ndilola seunofu kumsindika msutu kwa ng'achale va Loma, bila kuwonesa malatwa gyake."