1 Pevalamuwe kuhega mbaka ku Italia, vamvikile Paulo pamwi na vasutu vangi panyi lya udima lwa Yulio yeakali mkomi va lipinga lya vapuga kyekikemeliwe, "Kipinga kya Kaisali Agusitino." 2 Tukakang'alie kinu kikomi kyamumalenga kekikemelwa meli yeihumile Adilamito yeikali mulugendo ikali ichumbila pono pakuimilicha meli mu inyi cha Asia, tukavangile lugendo. Alisitaliko mwenekaye va mwani va Tesolonike veugehe inyi lya Mekidoniya akali mu meli pamwi na nefwe. 3 Pamilau lyake, twimile pono lya kukwimilicha meli ku Sidoni. Yulio akamgitie Paulo manofu kwa kumuleke atang'ane na vaganja vake na kupata finu fyeikela. 4 Kuhuma ukoya tukaendelile na lugendo, ila kwakuva lukala ukali upuga hilo kuhumila kutalo, tukachumbile lubali lwa ligunguli kya Kupilo ambako lukala seukali wolofu. 5 Pambele tukahagime mu inyanza yeigehe palubali lya Kilikilia na Pamfulia, tukakwimile ku Mula, mwani va Lukia. 6 Ukoya yula mkomi va vapuga akawene meli imwi yeihumile mu mwani va Alekesandia yeikali ihelela ku inyi lya Italia na akatukang'iche mumeli igo.

7 Kwa figono fyolofu tukagendelile molemole kwa magudo tukafikile pepi na Nido. Kwakuva lukala ukali vave ukutupinja, tukaendeliye kuutalo kuchumbila lubali lwa ku Kilete pepi na Salimoni ambako lukala seukali wolofu. 8 Tukachumbile palubali lwake kwa magudo tukafikile pono peikemelwa "Pono nofu lya kwimilicha meli," Pepi na mwani va Lesea.

9 Tukali tugendile kwa figono fyolofu lihungu lya kwikala bila kuliya ikali ichumbile. Kwakuva pefichumba figono fya kwikala bila kuliya inyanza itimbwike ifyo se unofu kwendelela na lugendo. Paulo akavalongela, 10 "Vagosi, ndilola kuva lugendo ulu daivecha se nofu na misigo dachiyaganika se pamwi na meli hela, ila na uwumi vetu." 11 Ila yula mkomi va vapuga akakwegilwe hilo gealongile na mguba meli na mwene meli kuchumba gala gyealongile Paulo. 12 Kwakuva pono pa kwimichila meli sepakali panofu kwikala chipindi cha ng'ala, vanu vangi vakakeliye kwendelela na lugendo, ngita ikiwesekana vafike ku Foinikia. Foinikia ikali pono pa kwimichila meli, mukigunguli kya Kilete kyekikali palubali lwa kwivindi pelidibala lichuwa na kukyanya pelidibala lichuwa na ukoya viwesa kwikala chipindi cha ng'ala.

13 Suwe, lukala weuchikile peuvangile kupuga kuhuma palubali lwa kwivindi, vakachele kuva viwesa kuhega, vakavanga lugendo kuchumbila ng'umbung'umbu lya kigunguli lya Kilete. 14 Ila seichumbile muda, lukala likomi weukemelwa, "Lukala lwa kuhumila palubali lwa kukyanya" Ukavangile kupuga kuhumila ku kigunguli. 15 Lukala mkomi ukautovile paubali lya meli na setuwesile kuguba, tukaulekile usung'we na lukala. 16 Tukachumbile mu kigunguli kidodo weugehe palubali lwa kwivindi, kyekikemelwa Kauda, tukawesile kuchumba ila kwa magudo tukawesile kuukwega wula meli weugehe mumeli mkomi kwa kuvawokolea vanu. 17 Vala vaguba vakaukwegile wato mugati, baho vakawopile kwa ndegei panyi lya meli. Vakaogwipe kugomela mung'umbung'umbu lwa inyanza, kigunguli kya Libiya. Kwa ifyo, vakakwisile kinu kisito neke kutanga meli igende molemole na kuleka wula meli usung'we na lukala. 18 Lukala ukaendeliye kupuga na pamilau lyake vakavanga kutaga misigo gyegikali mu meli. 19 Kigono kya Udatu, vakavangile kangi kutaga mu malenga finu fya mumeli kwa mawoko gyawo vavene. 20 Kwa figono fyolofu setuwesile kulola lichuwa vala nondwa, lukala uendeliye kupuga hilo, hata tukawene setuwesa kunana kangi.

21 Petukalile kwa muda wolofu bila kuliya kinu, Paulo akakwimile pagati lyawo akavalongie, "Vagosi, ikavang'ang'ile ngamkunipulikicha na kuleka lugendo kuhuma Kilete. Semungewesile kupata magudo igi na kupata asala ichi. 22 Ila nondee ndikuvasuka mbihile kogopa, kwihela hata yumwi venu yeiyagicha uwumi vake ila meli weka hela daidibala. 23 Nene ndi munu va Nguluvi, kangi ndi mnyigendwa vake, neng'uli pamie ndumindumi vake akanihumie, 24 akanilongie, Paulo bihile kogopa! Ndi ung'ang'ilwa wime pautalo lwa ng'achale mkomi va Loma. Kangi uchele kuva vonda veugenda navo, Nguluvi dakuvawokola kwa usanzi vake. 25 Ifyo, vagosi mwikangiche! Kwakuva ndikumdikila Nguluvi kuva daiwesa ngita peandongilwe na Nguluvi. 26 Ila datugomela mung'umbung'umbu mwa kigunguli kingi."

27 Pamie va kigono kya chumi na utai, tukali tukwegwa na lukala kuno na kuno mu inyanza lya Adilia. Pepi na mwilogoti vaguba vakahochile kuva pepi na inyi ng'afu Italiya. 28 Ifyo vakasakile utali va inyanza kwa kukwisa ndegei yeikali ihopilwe kinu kisito, vakapitile utali va mita alobaini. Pambele vakapimile kangi vapatile mita selasini. 29 Kwa kukogofya kugoma mu liganga likomi, vakahopile finu fisito fitai kumbele lya meli na vakasukile kutandamuke kisatu. 30 Vaguba vasakile kutolwika na vakakwisile wato mdodo mumalenga va kuwokolela vanu, vakayigita kuva vihela kukwisa finu fisito fya kwimicha meli. 31 Ila Paulo akamlongie mkomi va vapuga na vapuga vake, "Ngita vaguba meli ava sevasigala mumeli, sedamuwokoliwa." 32 Baho vala vapuga vakachidumule ndegei chechikali chiwopile wula wato mdodo, vakauleka uhele na malenga.

33 Pepi na kinyola sagala, Paulo akavalongie vanu vonda valie kyakula, akilonga, "Neng'uli ndi kigono kya kumi na utai mugehe na wogofi na semuliye kinu kyokyonda. 34 Suwe, ndikuvasuka muliye kyakulia, neke muwese kwikala. Kwakuva kwihela daefua vala kulemachwa." 35 Peasindile kulonga ago, Paulo akanyamule libumunda, akamlumba Nguluvi pautalo lyawo, akaudumule, akavanga kulia. 36 Baho vonda vakapatile ludali na kila yumwi akavangile kulia. 37 Vanu vevagehe mumeli vakali miya chivili na sabini na sita. 38 Pevaliye na kuguta, vakapwemuse usito va meli kwa kutaga mabebelo mu inyanza.

39 Pekukie, vaguba sevawesile kuichela inyi yila, ila vakawene kigunguli kimwi kya muhanga, vakahochile kusindika meli ukoya ngita iwesekana. 40 Ifyo vakadumule ndegei chechihopile finu fisito na kufilekela mu inyanza, vakadinduwe ndegei chechihopile pondo. Baho vakadinduwe mgololo neke lukala usung'e meli kwelela kukigunguli. 41 Ila pevakafikile pono lya kukimelo cha inyanza, meli ukagomie. Pono lya kuutalo ikali idibale mumuhanga bila kuhongoseka. Pono lya kumbele lya meli ikavangile kudenyeka fipande fipande kwa kutovwa na madaba genye ludali.

42 Vapuga vakasakile kuvadocha vasutu vonda kwa kuwogwipa kuva vangesugila mbaka kukigunguli na kutolwika. 43 Ila kwa fila yula mkomi va vapuga akasakile kumuwokola Paulo, ifyo akavakanile vapuga vake vabihile kugita ndeni. Akaswitiliche vala vapuga vevichela kusugila vadaluke kuhuma mumeli na kusugila mbaka mung'umbung'umbu lya kigunguli, 44 na vangi veseviwesa kusugila mung'umbung'umbu lya lihiva na vanyamule mbawo awu ipande fya meli fyefidenyike. Ndeni, vonda tukachabuke tukiva wumi.