1 Paulo na Sila mulugendo lwawo vakachumbile ku Amfipoli na Apolonia na vakafikile ku Tesolonike, ambako kukali na kaye lya Kufunyila Vayawudi. 2 Paulo ngita peachovie, akaingile mu kaye lya Kufunyila Vayawudi, mufigono fya Kutulula fyefilongachine, akaywanga navo kwa kutumila Masimbo ga Nguluvi. 3 Akaywangile na kuwonesa kuva ing'wang'wa Kilisito agudwe na baho achulubuke, akalonga, "Uyu Yesu yendikuvalongela ndi Kilisito." 4 Vayawudi vamonga vamdikie Yesu na kwiwunga na Paulo na Sila, filafila na Vagiliki yevamwidikie Nguluvi na vadala volofu vene ludali na vilongochi vakomi navo vamdikile Yesu.

5 Ila Vayawudi vangi vevakali sevamdikie Kilisito vakawonile wifu, vakahele musoko, ambawo vakavakung'ese vanu volofu, navo vakavangile kugita ndewo ku mwani. Vakahele vakaingie kwa ludali mu kaye lya Yasoni vakivasaka Paulo na Sila, neke vavasindike ku mwani va vanu Vayawudi. 6 Ila sevakavawene vakavakwega Yasoni na lukololo vangi pautalo lya vahiga nogwa va ku mwani, vakabwatwike, "Vanu ava nde vala yevaseduche inyi lyonda na vachile kuno, 7 Yasoni avawanuke mukaye lyake. Vonda sevadikile malagilicho gya mkomi va ku Loma, vakalonga, ‘Agehe ng'achale yungi yeakemelwa Yesu.’" 8 Pevapulike ago vakavaogofiche vahiga nogwa va mwani na vanu vevapulike. 9 Vakavalongela Yasoni na vayage vahombe kyokyonda cheching'ang'ilwa, pevahombile, vakavaleka vahele.

10 Pamie peufikile, vanu vevamdike Yesu vakavasindika Paulo na Sila ukoya ku Beleya. Pevafikile ukoya vakahele mu kaye lya kufunyila Vayawudi. 11 Vanu va ukoya vakali vakumpulikicha Nguluvi kuvagina vala va ukoya ku Tesalonike. Avo vanu va Beleya vakawanuke wula unanzi na kugakwimba na kugaganula masimbo ga Nguluvi kila kigono, neke kulola ngita gegalongilwe na Paulo gakali ndakyene. 12 Vayawudi volofu vakamdikile Yesu pamwi na vadala vene ludali va Kigiliki na vagosi va Kigiliki vakamdikile Yesu. 13 Ila Vayawudi va Tesoloniki pevachele kuva Paulo akali idalika luchowo lwa Nguluvi ukoya Beleya, vakahele ukoya na kugayovelecha mapinga gya vanu vagite ndewo. 14 Vala lukolo vakamsindike Paulo mung'umbung'umbu lya inyanza ila Sila na Timotewo vakasigie Beleya. 15 Vala vanu vakamsindike Paulo mbaka Atene. Baho vawuyile na malagicho kuhuma kwa Paulo kuva Sila na Timotewo vamfwate kisatu hilo.

16 Paulo peakali akuvachindila Sila na Timotewo ukoya Atene, akavipile hilo peawene mwani ugo umemile ming'omong'omo gya valungulu. 17 Ifyo vakaywangile na Vayawudi na vanu vangi vevamdikile Nguluvi mu kaye lya kufunyila Vayawudi, kila kigono akali eywanga na vanu yevakali itang'ana navo pono pasoko. 18 Vamonga vevafwatile mawulanicho ga Epikulo na Sitoiki, vakalimbine nave.

Vangi vakalongie, "Elonga liki uyu ndwangamlomo?" Vangi vakalongie, "Iwonika elonga njowo cha valungulu va vagenji." Vakalongie ndeni kwakuva Paulo akali akidalika Njowo cha Yesu na kuchulubuka. 19 Vakamnyamule Paulo na kumsindika ku ludamo lya kuchela lya kutang'anila Aleopagu, vakalongie, "Wuli twiwesa kuchela mana ga mawulanicho aga gamiya geukugatuwulanicha. 20 Finu fyolofu fyetupulike mumasigicha getu fiwonekana kuva filuilui kwa nefwe. Twikela kuchela njowo ichi china na mana liki." 21 Vanu va Atene na vagenji vonda vevikalile ukoya vakali vakutumila chipindi chawo chonda kuhumulila na kupulika njowo miya.

22 Baho Paulo akaimile pautalo lya ludamo lwa Aleopagu akalongie, nyenye vanu va Atene! Ndikuvalola kuva kwa kila luchowo nyenye nde vanu yemwing'ang'a hilo kumfunya Nguluvi. 23 Kwakuva pendikali ndichumba kuno na kuno ndikawene ming'omong'omo gyenu gya kufunyila, ndikawene pono yimwi lya kufunyila isimbilwe, kwa Nguluvi Yeseachelanike. Suwe, uyo yemkumfunya bila kumchela, nde ndikumdalika kwa nyenye. 24 Nguluvi yeaumbile inyi na fyonda fyefigehe, ndi Mtwa va kuluhano na inyi, mwene seakwikala mu kaye lya kufunyila lelichengilwe na vanu. 25 Vala seitumikilwa kwa mawoko gya vanu, kuhocha kuva mwene ekela kyokyonda kila, kwakuva mwene nde akuvagavila vanu wumi na muhe na kuvagavila kila kinu. 26 Kuhuma kwa munu yumwi yeavagitile vanu va inyi chonda, neke vakale mu inyi yonda. Aswitiliche kuhuma daha pandili na kwiya vanu va inyi icho davakale. 27 Nguluvi agitile ifyo, neke vanu va inyi ilyo veveche kumfwatila hata kwa kumbyalisa pangi vampate. Ila Nguluvi seagehe patali na kila yumwi vetu. 28 Ngita yealongile munu yumwi,

mugati lyake mwene twikwikala, twigenda na kuvecha na wumi,

ngita saili pelilonga,

efwe nde vana vake.

29 "Kwakuva nefwe ndi vana va Nguluvi, setutakilwa kuhocha kuva Unguluvi vake uwana na ling'omong'omo lyelihongilwe kwa sahabu awu lya fesa awu lya liganga lihongwile. Igyo ming'omong'omo ihongilwe kwa luhala lwa vanu. 30 Nguluvi akagitile ngita seilola kipindi kila kya vanu vevakali vapufi, ila nondee akuvalagicha vanu vonda kila pono valeke sambi na vamsedukile Nguluvi. 31 Kwakuva avikile suwe kigono ambakyo akuvahinga vanu va inyi lyonda kuchumbila munu yumwi yeamuhague. Nguluvi avawonisile vanu vonda lukani ulu kwa kumchulumbucha munu uyo." 32 Vangi pevapulike Paulo akiywanga njowo cha uchulubuko, vanu vamonga vakambedile, ila vangi vakalongie, "Twikela kupulika kangi njowo ichi." 33 Paulo akavaleka, akahuma mu ludamo. 34 Vanu vamonga viwungile na Paulo na vakamdikila Yesu mugati lyawo akali Dionisio mnanzi va ludamo lya Aleopago, kangi kukali na mdala yumwi yeakemeliwe Damali na vanu vamonga.