1 Ndewo chila pechisilile ukoya Ifeso, Paulo alivakemelie pamwi vala vadikila, akavalagile na akahele ku Makedonia. 2 Peakali ichumbila mu inyi chila akali akuvagangamisa mbaka peafikile ku Ugiliki. 3 Ekalile ukoya kwa chipindi cha myechi midatu. Peakali ikwiandala kuhelela ku Siliya kwa ng'asi lya inyanza, akachele kuva Vayawudi vakali vang'ang'a kumgitila mwofu, ifyo akalamuwe kuwuya kwa kuchumbila ku Makedoniya. 4 Paulo akali afwatine na Sopatu mwana va Pilu, kuhuma Beleya na Alisitaliko na Sekundo kuhuma Tesoloniki na Gayo munu va Delibe na Timotewo pamwi na Tukiko na Tilofimo vevihuma Asia. 5 Vanu ava vakatulongue na vakatuchindila Tiloa. 6 Peichumbile lihungu lya mibumunda yeseivikilwe lisimika, nefwe tukakang'ala wato kuhuma Filipi na pefichumbile figono fidatu tukafikile ukoya Tiloa. Ukoya tukakalile kwa chipindi cha figono saba.

7 Mukigino kya kwanja kya wiki tukatang'anile kuliya kyakulia. Paulo akaywangile na vanu mubaka mwilogati, kwakuva asakile kuhega kilau yake. 8 Mu kyumba kya lilingo kwetukali tutang'anila kukali na lwenge fyolofu hilo. 9 Mdimi yumwi litawa kyake Yutiko, akali ekalile pa lidilisa chipindi Pauli ekwendelela kudalika. Yutiko avangile kusinjila molemole mbaka avasile tulo akaguwe panyi kuhuma mulilinga lya udatu. Pevamuholile vakamwene afuwe suwe. 10 Paulo peikile panyi, akangundamile na kumkumbatila yula mdimi, akalongie "Mbihile kwogopa, kwakuva mdimi ndi wumi." 11 Baho Paulo akakang'ie kangi mulilingo, akalie kyakuliya, endelie kudalika chipindi kitali mbaka nyolasagala, baho akahegile. 12 Vanu vamkamsindike yula mdimi mbaka kukaye lyake akiva wumi, navo vakagangamalichwe hilo.

13 Nefwe tukakang'ala wato kulongola kuhelela ku Aso, neke tukatang'ane na Paulo, atulongie tugite ndeni kwa kuva mwene akali ihelela ukoya kwa magulu. 14 Baho, akatuwene kula Aso, tukamkang'ase muwato, tukahelela Mituleni. 15 Kuhuma kula tugagedile na tukafikile Kio pamilau lyake. Kigono kya uvili tukahagama kwelela kukigunguli kya Samo na kilau lyake tukafikile Melito. 16 Paulo akali alamuwe kwendelela na lugendo kwa wato bila kuchumbila Ifeso neke abihile kwikala hilo koya Asia. Akali na kisatu lya kufika Yelusalemu kwa lihungu lya Pendekosite ngita peiwesekane.

17 Paulo peali ku Melito, akalagiche unanzi ukoya Ifeso kwa vagogolo va Kanisa wache kutang'ana navo. 18 Pevafikile akavalongie, mwichele wuliwuli petukalile na nyenye figono fyonda kuhuma kigono kya kwanja penifikile ku Asia. 19 Mwichela pendemgumbanikie Mtwa kwa unyenyekefu gonda, kwa mihochi na utatala gendigapatile kuhumila na uwofu va Vayawudi. 20 Mwichela kuva sendisitile kuvadalikila pawelu na ku mukaye chenu na kuvawulanicha kyokyonda ambakyo kyekuvatanga. 21 Ndikavakanie Vayawudi wonda, pamwi na vanu va se Vayawudi, vamsedukile Nguluvi na kumwidikila Mtwa vetu Yesu. 22 Nondee, Muhe va Nguluvi akunilongocha kuhelela ku Yelusalemu bila kuchela ndeliki kyekindihumila ukoya. 23 Kinu kimwi chendichela Muhe va Nguluvi akundongela undakyane kuva kila mwani wendichumba fiwopo na magudo vikunichindila. 24 Ila hata ngita ndifuwa se kinu kwa nene, kinu kikomi kwa nene ndisindiliche ula unjagila vangu na yila kasi yeanigavile Mtwa Yesu ndigite, ende ndilonge Njowo Nofu lya usanzi va Nguluvi.

25 Nichumbile kuno na kuno kwa kila vanu vonda ndikidalika ung'achale va Nguluvi. Ila ndichela kwihela hata yumwi venu daakunilola kangi. 26 Kwa ifyo ndikuvalongelela neng'uli kuva ngita peiyaga munu yumwi venu, nene ndihela nongwa yoyonda. 27 Kwakuva sendikanile kuvalongela gala ambago Nguluvi akugakela. 28 Mwidime nyenye vene na mulidime lila lipinga lyonda ambalyo Muhe va Nguluvi avavikile nyenye kuva vadima vake. Muvagavile kyakula lipinga lya vanu vevamdikie Kilisito, ambalyo Nguluvi avapatile kwa danda lya Mwana vake. 29 Ndichela kuva pendihega nene, vawulanichi va udesi davikwacha kwa nyenye, davivecha ngita mikeve na dasevawonela lusungu lipinga lya vachulila va Mtwa. 30 Hata kuhumila pagati lyenu, vehumila vanu ambawo velonga njowo cha udesi neke kuvachanga vanu na kuvagita vavadikile vene. 31 Ifyo mwidime! Mkichela kuva kwa muda va miaka midatu, pamie na pamunyi, sendichokile kuvakanila kila yumwinga venu kwa mihochi.

32 Nondee, ndikuvavika mumawoko gya Nguluvi na luchowo lyake lyeligehe na usanzi vake, ambalyo ligehe na ludali lwa kuvagangamicha na kuvagavila uhala ambawo avavikile nyenye pamwi na vanu vake vangi vonda. 33 Nene sendikadobokile sendi vala sahabu vala myenda gya munu yoyonda. 34 Nyenye mwichela kuva mawoko gyangu igi igumbanikile kwa finu fyangu na veyangu vala vevakali pamwi. 35 Mufyonda fyendikitile ndikali ndikuvalolesa kuva twing'ang'wa kugita kasi ng'angafu nefwe, neke tuveche kuvatanga wevagehe na sida, chipindi petugitile ndeni tuveche twikwihuka njowo ambacho Mtwa Yesu yumwene akalongile, "Ngiba kutawula kuchumba kwanuka."

36 Paulo peamalile kuloga akafugamile pamwi navo akamlumba Nguluvi. 37 Vonda vakavembile, vakamlaga kwa kumbatila Paulo na kumnonela. 38 Kyekivasugwimiche hilo ni kwa gala njowo chealongile kuva sevakumlola kangi uso vake. Wakahele nave mbaka mu wato.