1 Paulo akafikile ku Delibi na Lisitila, kukali na mchulila yumwi yeakemelwa Timotewo. Maye vake akali Myawudi, yeamdikie Yesu, ila daada vake akali Mugiliki. 2 Timotewo akanjumilwe na vanu vonda vevamdikie Yesu ukoya Lisitila na Ikonio. 3 Paulo akasakile Timotewo alongochane nave, ifyo akamnyamule na kumdumula bina. Paulo agitile ndena, kwakuva Timotewo achelinike na Vayawudi vonda vevikwikala pono pala kuva daada vake akali Mugiliki. 4 Pevakali vechumba pa kila mwani valivagavila vanu vevamdikie Kilisito malagilicho yegalongilwe na vanjagila na vavaha vala vevamdikie Kilisito va ukoya ku Yelusalemu, vakavalongie mugakolele. 5 Ifyo vanu vevamdikie Yesu vakali vakakatima mu mbatwa na lipinga lya vanu lyahongilike kila kigono.

6 Paulo pamwi na vayage vakachumbile ku mwani va Fulugiya na ku Galatia, vakali vakanilwe na Muhe va Nguluvi vabihile kudalila luchowo lwa Nguluvi mu inyi lya Asia. 7 Pevagehe pepi Misiya, vakagechile kwingila ku mwani va Betania, ila Muhe va Yesu akavakanile kubita. 8 Baho vakachumbie ku Misiya, vakakwikiliye ku mwani va Tiloya. 9 Pamie Nguluvi akamwonise Paulo munu ukoya Makedoniya ahimile na kumsuka, akilonga, "Chabuke, wache Makedoniya wututange!" 10 Paulo peamuwonile kila kyewonisilwe na Nguluvi, tukayandalise kwa lugendo, tukiva tumdikie Nguluvi katukemile ukoya Makedoniya kudalika Njowo Nofu.

11 Kuhuma Tiloya, tukakang'ie wato mbaka ku inyi lya Samotilaki, pakilau lyake tukafikile ku mwani va Neapoli. 12 Kuhuma ukoya, tukahele mbaka ku Filipi, mwani mkomi va Makedoniya, inyi yeikali panyi lya utavala va Valumi, nefwe tukakalile baho kwa figono fyolofu. 13 Kigono kya Kutulula tukahele kwivala lya mwani mung'umbu lya mgoka, tukahochile twipata pono lya kumsuka Nguluvi. Twikalile, tukaywangile na vadala vekung'esile pono bahala. 14 Kukali na mdala yumwi yeamdikie Nguluvi, yeikemelwa Lidiya, mwenekaye va mwani Tiatiliya. Mwene akali igucha myenda kwa sendi ngomi, Mtwa akamdinduwe numbula lyake, agawanuke gala geakali ilonga Paulo. 15 Suwe peabatiswe mwene na vanu va mukaye lyake, akatuwanuke mukaye mwake akilonga, "Ngita muwene ndakyene nene ndimdikie Mtwa, mwache mkale mukaye lyangu." Akatuyovelela hilo tuhelele kukaye lyake.

16 Kigono kimwi, petukali twihelela pono pa kufunyila, mhinja yumwi yeali na lihoka munya ludali cha kulagula akatang'ane na nefwe. Mhinja uyo avagitile vakomi vake vapate umosi kwa kasi lyake lya kulagula. 17 Baho mhinja amfwatile Paulo na nefwe, kuno ibwatuka na kulonga, "Vanu ava ndi vanyigendwa va Nguluvi yeagehe Kukyanya Hilo. Vakuvalanduchila ng'asi lya uwokosi." 18 Akali egita ifyo kwa figono fyolofu hata kigono kimwi Paulo akavipile na kumsedukila na kumlongela uyo lihoka, "Ndikuswitilicha kwa litawa lya Yesu Kilisito, muhume munu uyu!" Bahobaho lihoka akamhumile. 19 Vamosi va yula mhinja pevawene kuva sevawesa kangi kwipatila sendi, vakavabatile Paulo na Sila vakavakwega mbaka ku soko, pautalo lya vahiga va mwani. 20 Pevavasindikile palutalo lya vahiga nongwa vakavalata vakilonga, "Vanu ava vileta ndewo ku mwani lyetu, na vene ndi Vayawudi. 21 Vewulanicha malagilicho kwa nefwe Valumi setukuchidikila vala kuchifwata." 22 Lipinga lyeligehe pala lyaunganile kumtova Paulo na Sila na vala vahiga nongwa vakavafule myenda gyao kwa ludali, vakavaswitilicha vatovwe ndomondo. 23 Pevatovilwe hilo, vakavavika mu kihopo na kumlagilicha mkomi va vapuga avadime unofu. 24 Kuhumila na malagilicho ago, yula mdima va kihopo akavavikile mukyumba kya mugati hilo na magulu gyawo gikahopilwe mumibiki mikomi.Vanu vavili vawopilwe magulu gyao palibiki likomi

25 Pepi na mulogati, Paulo na Sila vakali vakimlumba Nguluvi na kwimba lusambo lwa kumnjuma Nguluvi, kuno vadindwa vangi vakiva vapulikicha. 26 Bahobaho pakahumile litetemeko likomi lya mganga, hata msingi va kihopo ukahogosike. Baho milyangilo gyonda gikadinduke na minyololo gyevawopilwe chikadundwike. 27 Yula mdima va kihopo, pealamke na kulola milyangilo gya mukihopo gidundwike, akahomola lipanga lyake akasakile kwidocha, akahochile kuva vasutu vonda vanyilile. 28 Paulo akabwatile akalongie, "Bihile kwidocha, nefwe vonda tugehe baha."

29 Yula mdima va kihopo, akalagiliche agavilwe lwenge, akaingile mugati kya kyumba, akafugamile kuno itetema, palutalo lya Paulo na Sila. 30 Baho akavahumiche kwivala akilonga, "Vatwa vangu, ndigite liki neke ndipatile kwokoka?"

31 Vakamhigile, "Mwidikile Mtwa Yesu nave wiwokolewa pamwi na lukololo vako vonda." 32 Vakamdalikie luchowo lwa Mtwa mwene pamwi na vanu vangi va mu kaye lyake. 33 Pamie wulawula yula mdima va kihopo akavanyamula, akavawogofecha fikong'o fyawo. Bahobaho akabatiswa mwene pamwi na vayage vonda yevakali mu kaye lyake. 34 Baho vakavasindika Paulo na Sila mu kaye lyake, vakavagavila kyakulia. Mwene na lukolo vake vonda vakagitile lihungu kwakuva vakali vamwidikie Nguluvi.

35 Pamilau lyake, vala vahiga nongwa vakavalagilicha vanyigendwa vawo kwa mdima va kihopo, akilonga, "Muvaleke vanu avo vahege."

36 Yula mdima va kihopo akamlongie Paulo, "Vahiga nongwa, vatulagilicha kuva tuvaleke muhege. Nondee mwiwesa kuhuma na kuhelela kwa mbatwa." 37 Ila Paulo akamhigile, "Ingava setukagitile nongwa lyolyonde, vakatutovile ndomondo pawelu kwa vanu, baho vakatuvikile mukihopo, kwakuva nefwe ndi vanu va Loma, nondee vikela kutuhecha kwa lupwepo! Hamu, ving'wang'wa vene vache baha kutuhecha." 38 Vala vadima va kihopo vakavalongie chila njowo vahiga nongwa na pevapulike kuva Paulo na Sila ndi vanu va Loma vakogwipe hilo. 39 Ifyo vakahele kuhongecha na vakavahumicha mukihopo na kuvasuka vahege mu mwani wula. 40 Baho Paulo na Sila pevahumile mukiwopo, vakahele mu kaye lya Lidia. Ukoya vakatang'anile na Vakilisito na vakavagangamisa, baho vakahega.