1 Pambele, Paulo akahumile Atene na akahelele Kolinto. 2 Ukoya Kolinto, amwene Myawudi yumwi ikemelwa Akula, mubabilwa va Ponito. Akula pamwi na mdala vake yeakemelwa Pilisila, vakali vawuyile kuhuma ku Italia figono fidodo fyefichumbile kwakuva ng'achale Kilaudio akali avaswitiliche Vayawudi vonda vahume ku Loma. Paulo akahele kuvalola, 3 na kwakuva vonda vakali vahona kyama ngita mwene, Paulo akalile navo na kugita kasi pamwi navo. 4 Kila Kigono kya Kutulula Paulo akali eywanga na vanu mu kaye lya kufunyila Vayawudi akagechile kuvakwega Vayawudi na Vagiliki.

5 Sila na Timotewo pevafikile kuhuma inyi lya Mekadonia, Paulo akatumile chipindi chake chonda kwa kudalika, akivalongela Vayawudi kuva Yesu nde Kilisito Mkombosi. 6 Ila Vayawudi vakavanga kwipinjana na kumliga Paulo, akapumune myenda gyake pautalo lyawo akalongie, "Ngita muyagila manyi mwavene, nene ndihela nongwa lyolyonda mu njowo ichi. Kuvangila neng'uli ndikuvahelelea vanu se Vayawudi." 7 Baho akahegile na kwikala mu kaye lya munu yumwi yeseakali Myawudi akumdikila Nguluvi yeakemelilwe Tito Yusito, kaye lyake ikali pepi na kaye lya kufunyila Vayawudi. 8 Kilisipo, mkomi va kaye lya kufunyila Vayawudi, akamwidkila Mtwa pamwi na lukolo vake vonda. Vakolinto volofu vakapulikiche njowo icho vakamdikile Kilisito na kubatiswa.

9 Kigono kimwi pamie, Paulo akawoniswe kinu na Mtwa akamlongie, "Bihile kwogopa, endeliye kudalika vala bihile kuchika, 10 kwakuva nene ndigehe pamwi na veve. Kwihela munu daagecha kukulemacha kwakuva mu mwani ugu vagehe vanu volofu vevikunidikila." 11 Suwe, Paulo akakalile ukoya kwa chipindi cha mwaka umwi na myechi sita akiwulanicha luchowo lwa Nguluvi.

12 Chipindi Galio peagehe mkomi va mwani va Akaya, Vayawudi vevakali ukoya pamwi vakambatile Paulo, vakamsendike ku ludamo lwa vahiga. 13 Vakalongie, "Tukumlata munu uyu kwakuva kavawulanicha vanu neke vamnjume Nguluvi bila kufwata malagilicho ga Musa."

14 Paulo peahave seavangile kulonga, Galio akavalongie Vayawudi, "Mpulikiche nyenye Vayawudi, ngita mukumlata munu uyu kwakuva lya unjanganifu awu kwakuva lya uwofu ngandi wesile kuvapulikicha. 15 Ila ngita ndi njowo cha kulumbana kutigila njowo cha malagilicho gyenu, muswitiliche mwavene. Nene ndilema kuva mhiga va njowo icho!" 16 Baho, akavadagile kuhuma mu ludamo lwa kuhiga. 17 Vene vonda vakambata Sositenesi mkomi va kaye lya kufunyila Vayawudi, vakamtovile bahala pautalo lya ludamo lya kuhiga. Ila Galio akafiwene njowo icho se kinu.

18 Paulo akalile Kolinto kwa figono fyolofu. Baho avalagile vanu vevadikila Yesu, akakang'ie wato kuhelela Siliya pamwi na Pilisila na Akula. Pevafikile Kenikilea Paulo amogile fwili chake kutimisa lyagano lyeamlongie Nguluvi. 19 Vakafikile Efeso na baho Paulo akavalekile Pilisikila na Akula, akahele mu kaye lya kufunyila Vayawudi na akali iywangana na Vayawudi. 20 Vakamsukile akale navo kwa chipindi chitali, ila Paulo akavakanile. 21 Ila peakali ihega, akavalongie, "Nguluvi akikela ndikwacha kangi kwa nyenye," Akahegile kwa wato mbaka ku Efeso.

22 Peafikile ku Kayisalia, Paulo ahelile ku Yelusalemu kuvahungila lipinga lya vanu vevamdikie Kilisto, baho akawuyile akahele ku Anitiokia. 23 Akalile ukoya kwa chipindi chidodo, akahuma ukoya na kuchumbila mu mwani chingi cha ku Galatia na Fulugia kuvagangamacha vadikila vonda.

24 Myawudi yumwi yeakemelwa Apolo, mubabwa va Alekisandilia, akafikile Efeso. Akali munu mwene kuywanga unofu na mwene akali ichela unofu Masimbo ga Nguluvi. 25 Akali awulanichwe njowo cha Mtwa, kwakuva akali na lukelo munumbula lyake, aywagile unofu njowo cha Yesu, hata ngita akali ichela ubatiso va Yohani weka hela. 26 Apolo atalile kuywanga kwa ukakatima mu kaye lya kufunyila Vayawudi, ila Pilisila na Akula pevapulike vakamkemele mukaye lyawo vakamuwulanicha unofu hilo njowo cha Nguluvi. 27 Apolo pealamuwe kuhelela ku pono lya Akaya, vanu va Efeso vevamdikie Yesu vakamgangamache na vakavasimbile baluwa neke vamwanuke ukoya pono lya Akaya, peagehe ukoya akali mtangwa hilo kwa vanu ambawo kuhumila na usanzi va Nguluvi vakali vamdikie Kilisito. 28 Kwa umwimike mkomi, akavalakilile Vayawudi yevakali vipinja pawelu, akiwonesa kwa Masimbo ga Nguluvi kuva Yesu nde Mkombosi.