1 Peteli na Yohani pevakali veywanga na vanu, vatekechi na mkomi va vadima va kaye lya Nguluvi na vasadukayo vakafikile. 2 Vakavipie hilo kwakuva vala vanjagila vavili Peteli na Yohani vakali vekuvawulanicha vanu kuva Yesu achulubuke, njowo lyeliwonesa wachi kuva vanu yevafuwe vichulubuka. 3 Ifyo peifikile palumie vakavabata Peteli na Yohani na kuvikwa mukiwopo mbaka pamilau lyake. 4 Ila vanu volofu yevapulike unanzi wula wevalongile Peteli na Yohani vauwidikie na vakali ngita vakigosi elufu chihano.

5 Kilau lyake, vakomi va Vayawudi na vagogolo na vawulanichi va Malagilicho vakatang'anile pamwinga ukoya ku Yelusalemu. 6 Palidamo ulo kukali na mtekechi mkomi Anasi pamoja na Kayafa na Yohani na Alekisanda na vangi vakali vakololo va mtekechi mkomi. 7 Pevakavahimiche Peteli na Yohani pautalo lyawo, vakavawuchile, "Nyenye mwigitile njowo ichi kwa umwimike va ani na kwa litawa lya ani?"

8 Baho Peteli, kuno akilongochwa na Muhe va Nguluvi, akahigile, "Nyenye valongochi na vagogolo va vanu. 9 Ngita neng'uli tuwuchwa chila njowo chinofu cheagitilwe yula munu yeakali mtenda na ananichwe wuli, 10 nyenye na vanu vonda va Isilaeli muchele kuva munu uyu ikwima palutalo lyenu akiva ananile ni kwa umwimike va Yesu Kilisito va Nasaleti. Uyo nde Yesu yemkamdochile mukamvambile mulipindilihicho na Nguluvi amchulubuche kuhuma kwa vevafuwe. 11 Uyu nde yula Masimbo Mang'alili gakumlonga,

‘Liganga lyemulikanile nyenye vachengaji,

nano nde liganga likomi lya kuchengela.’

12 Wokofu seupatikana kwa munu yungi yeyonda, kwakuva kuinyi yonda, vanu sevagavilwe litawa lya munu yungi lyeliwesa kutukombola nefwe."

13 Vala vakomi va ludamo, kuno vichela kuva Peteli na Yohani vakali vanu vesevimbile, vakadudwive pevavapulike viywanga kwa ukakatima ifyo vakavachela kuva vagehe na Yesu. 14 Ila kwakuva vamwene yula munu yeananichwe imile pamwi na Peteli na Yohani, vakalemwile kulonga kinu kyokyonda. 15 Ifyo, vakavaswitilicha vahume kwivala lya ludamo, baho vakomi va ludamo vaywangine kwa lupwepo. 16 Vakomi va ludamo vahuchine, "Tugite liki na vanu ava? Kwakuva vanu vonda vevikala ku Yelusalemu vichela kuva vagitile njowo ngomi na nefwe setuwesa kukana njowo ichi. 17 Lakini neke tuchikane njowo ichi chibihile kulutala kwa vanu, tuvakanile vabihile kumlongela kangi na munu yeyonda kwa litawa lya Yesu."

18 Baho vakavakemele kangi mgati na kuvaswitilicha vabihile kulonga kangi na kuwulanicha kwa litawa lya Yesu. 19 Ila Peteli na Yohani vakahigile, "Mlonge nyenye ngita ndeunofu kuvapulikicha nyenye awu kumpulikicha Nguluvi? 20 Kwakuva nefwe setuwesa kuleka kugalonga gala getugawonile na getugapulike." 21 Vavaha va ludamo vakavakanile hilo, baho vakavaleka vahelele. Sevakawesile kuvagavila asabu, kwakuva vanu vonda vakali vakimnjuma Nguluvi kwa gala kegakali gahumie. 22 Munu uyu yeananichwe akali na miyaka yeigine alobaini.

23 Bahobaho Peteli na Yohani pevalekilwe, vakawuyile kwa vayawo, vakavalongie gala gegalongilwe na vatekechi vakomi na vagololo. 24 Vanu avo pevapulike ago, vakamsukile Nguluvi kwa pamwinga, vakilonga, Mtwa veve yeumbile luhano na inyi na inyanza na finu fyonda fyefigehe. 25 Ukalongile kwa umwimike va Muhe va Nguluvi kwa kuchumbila mnyigendwa vako, daada vetu Dawudi,

"Wuli vanu se Vayawudi vavipile?

Wuli vanu vihocha njowo chiwofu. 26 Vang'achale va inyi viandalise,

na vilongochi vatang'ane pamwinga,

kumlema Mtwa na Kilisito vake."

27 Kwakuva Helode na Ponito Pilato na vanu va inyi lya Isilaeli na vanu sevakali Vayawudi vatang'anile ku mwani ugu va Yelusalemu, kumkana Yesu, mnyegendwa vako mng'alile, yemuhagule aveche mkombosi. 28 Ndakyene vatang'anile neke kugagita gala geugakeliye na kupanga kuhuma pamwandi kwa umwimike vako na kwakukela veve. 29 Ndonde Mtwa lole vekutuogofya, ututange nefwe vanyigendwa vako, tuvese kulonga njowo chako kwa ukakatima. 30 Veve wonese ludali lwako lwa kuvananicha vatamwa na ututange neke tugite umanyitu golofu kuchumbila litawa lya Yesu mnyigendwa mng'alile.

31 Pevamalile kusuka, pono pala pevatang'ane pakahogosilwe, Muhe va Nguluvi akavalongocha vonda, vakaendeliye kulonga njowo cha Nguluvi kwa ukakatima.

32 Vanu vonda vevadikie vakali na numbula yimwi na lihocho limwi. Kwihela hata yumwi yeakali na kinu kyokyonda na kuvika kuvecha kinu kyake yumwene, ila vagavine finu fyonda fyevakalinafyo. 33 Vanjagila vaendeleliye kulonga kwa ukakatima kuchulubuka kwa Yesu na Nguluvi akuvafunyile hilo. 34 Kwihela munu yoyonda yeakali ihela kinu, kwakuva vanu yevakali na migunda awu kaye vaguchile na kusindika sendi chonda chevakaguchilile, 35 na kuvagavila vanjagila, navo vanjagila vakavagavie vanu ngita kila yumwi pevakeliye.

36 Kukali na Mlawi yumwi yeahumile mwani va Kupulo, litawa lyake Yusufu, vanjagila vamkemeliye Balinaba mana lyake, "Munu va kuvakolela mawoko vanu." 37 Akaguchile mgunda yeakalinalyo, akasindike chila sendi cheapatile na kuvagavila vanjagila.