1 Pefichumbile figono fihano Anania mtekechi mkomi, akafikile Kaisalia pamwi na vagogolo vamonga pamwi na munu yeakuvatanga vanu mumalato yeakemeliwe Tetulo. Vamuhelelie yula Mkomi va inyi Felikisi na kumlongela malato gyawo pakyanya ya Paulo. 2 Paulo akakemeliwe na Tetulo akavanga kumuhiga, akalonga ndeni.

"Mkomi va inyi Felisi ulongochi vako mnofu uletile ulutengamaso kwa figono fyolofu kuutavala vako na makani golofu gyegasakilwe kugitwa muinyi lyetu. 3 Suwe, twianuka njowo ichi kwa lukeduko hilo na kuhecha luhongecho kwa veve pono poponda na kwa ng'asi lyolyonda yila. 4 Ila bila kuyagicha muda vako, tukukusuka kwa usanzi vako, utupulikiche kwa udodo. 5 Twichela kuva munu uyu ndi msugu hilo. Mwene uvangicha ndewo kwa Vayawudi vonda mu inyi yonda na kilongochi va lipinga lya Vanasaleti. 6 Kangi akang'ang'ile kugita Kaye lya Nguluvi libihile kuvecha ngita Nguluvi peikela, nefwe tukamubatile. Twasakile kumuhiga kufwatila malagicho gyetu. 7 Ila Lusia, mkomi va vapuga, achile na akamnyamula kwa ludali kuhuma mu mawoko getu. 8 Ngita ukimuhucha munu uyu, dawivesa kuchela njowo ichi chonda chetukumlata nefwe." 9 Vayawudi navo vakadikile gala malato, vakilonga, aga gonda gakali ndakyene.

10 Baho, Mkomi va inyi Felikisi peamugololie kyala Paulo neke ayitase, Paulo akalongie.

"Ndikelie kwitasa pautalo lyako ndichela kuva veve ukali muhiga va inyi kwa myaka myolofu. 11 Wiwesa kwihakikisila kuva sefichumbile figono kumi na fivili hela kuvangila pendihelele kufunya ku Yelusalemu. 12 Vayawudi sevaniwene ng'odo pendilumbana na munu yeyonda, Sevaniwene ndikivaswitilicha vanu ku kaye lya Nguluvi, hata mu kaye lya kufunyila Vayawudi awu pono pangi poponda mu mwani ugo. 13 Vala seviwesa kwonesa malato gyao kuva gandakyene kwa nene. 14 Ndikwidikila pautalo lyako kuva. Nene ndikumfunya Nguluvi va vagogolo vetu kwa kufatila ng'asi yila ambalyo vene vakuikemela kipinga kya vanu ndikwidikila fyonda fye fisimbilwe mu kiganilo kya Musa na vavichi va Nguluvi. 15 Nene ndekumuhuvilila Nguluvi, ngita vawo pevakumuhuvilila, kuva vanu vasanzi na vanjanganifu, davichulubuka. 16 Ifyo ndikangala figono fyonda kuva na numbula nofu pautalo lya Nguluvi na pautalo lya vanu.

17 "Badala lya kwikala kutali kwa myaka fidodo, ndikawuyile ku Yelusalemu neke kuvatanga vayangu na kuhumicha litambiko. 18 Vakaniwene mukaye lya Nguluvi pendikali ndigita njowo icho na vakaniwene nimalile suwe lufunyo lwa kyuwofoga. Sendikali na lipinga lya vanu vala sendagitile ndewo. 19 Ila kukali na vamonga lya Vayawudi kuhuma ku Asia, avo ndi veng'ang'wa kuvecha baha pautalo lyangu na kuhumicha malato gyawo kwa nene. 20 Awu valeke ava vanu vevagehe baha valonge nongwa yevaiwene kwa nene pendimile pautalo lya ludamo likomi, 21 ila ndikalongile njowo ichi pautalo lya vene, ‘Nene ndihigilwe kwakuva ndikwidila vanu vevafuwe davichulubuchwa!’" 22 Baho, Mkomi va inyi Felisi ambaye mwene akali akuichela Ng'asi iyo unofu, akavalongie. "Ndihiga nongwa iyo chipindi Lusia, mkomi va vapuga peikwacha baha." 23 Baho akamswtiliche yula muhimilicha va vapuga amdime kwa unofu Paulo na kuvaleka vaganja vake vamtange kyekisaka.

24 Pefichumbile figono fidodo, Mkomi Felikisi akafikile pamwi na mdala vake Dulisila, ambalye akali Myawudi. Akaswitilicha Paulo asindikwe, akampulikicha peilonga pakyanya lya kumwidikila Yesu Kilisito. 25 Ila vakati Paulo peavangile kuywanga pakyanya lya unofu na pakyanya kuva fidodo na pakyanya lya kigono kya luhigo kyekikwacha, Felikisi akaogwipe na akalongie, "Leke tandi, ndikukemela kangi." 26 Chipindi icho akali ihuvilila kuva Paulo akumgavila sendi, kwakuva amkemelie Paulo mala chonda na kuywanga nave.

27 Pegichumbile myaga givili kuchumba, Poliko Fesito akatolile fwasi lya Felikisi, ila kwakuva Felikisi akakelie kwiwonesa msanzi kwa Vayawudi, akamlekile Paulo mukiwopo.