1 Paulo akavahulutulie meho vala valunasi va ludamo, akavalongie, "Lukololo lwangu, mbaka neng'uli ndikwendelela kugita manofu pautalo lya Nguluvi." 2 Baho Anania mtekechi mkomi akavaswitiliche vala vevakali vemile pepi na Paulo vamtove limande kumlomo. 3 Ila Paulo akavalongie, "Nguluvi yumwene akukutova veve yeukwigita mnofu ngita lukanji weubakilwe chokaa! Wiwesa wuli kwikala baho neke kunihiga kwa malagicho na kuno veve yumwene ukugadenya malagicho kwa kuswitilicha nditovwe?"

4 Vanu vevakali vemile pala na Paulo vakamlongie, "Ukumliga mtekechi mkomi va Nguluvi!"

5 Paulo akahigile, "Lukolo vangu, sendachelile ngita mwene ndi mtekechi mkomi. Kwa kuva isimbilwe, ‘Ubihile kulonga liwofu kwa mtavala va vanu vako.’"

6 Paulo peachelile kuva lipinga limonga lya Masadukayo na vangi Mafalisayo akalongile kwa lichwi lyake kutalo lya ludamo, "Lukolo vangu, nene nde Mfalisayo, mwana va Mfalisayo. Nene ndiletilwe ku ludamo lya vahiga kwakuva ndihuvila kuva vanu vevafue davachulubuka."

7 Pealongile ago, malumbano weuhumie pagati lya Vafalisayo na Vasadukayo na ludamo likomi likagavanyike. 8 Kwakuva Masadukayo vilonga kuva kwihela uchulubuko, vala kwihela ndumindumi lwa kuluhano kwa Nguluvi kwihela muhe. Ila Mafalisayo vakwidikila ifi fyonda fidatu. 9 Pakahumie na mabwatuko makomi, vamonga va vawulanichi va malagicho va lipinga lya Mafalisayo wakaimile na kulonga kwa lichwi, "Setuwene nogwa lyolyonda lyeagitile munu uyu, daivecha muhe awu ndumindumi va kuluhano kwa Nguluvi aywagile nave."

10 Ndewo ukalutale kuva mkomi hilo hata mkomi va vapuga akawogwipe kuva davamdumula Paulo fipande fipande, akavaswitilicha lipinga lya vapuga vingie na kumhecha Paulo pagati lyawo na kumsindika muitwangilo.

11 Pamie peufikile, Mtwa emile pepi na Paulo, akamlongie, "Uwime kwa ukakatima ngita peuvalongie njowo changu vanu va baha Yelusalemu, ndeni nde ying'ang'wa kuvalongie ukoya ku Loma."

12 Pekukie, Vayawudi vamonga vakagitile kikawo kya lupwepo. Vikilapiye "Setwilia vala kuywa mbaka petukumdocha Paulo." 13 Vanu avo vevasakile kumdocha vakali vakaginile alobaini. 14 Baho, vakahelele kwa valongochi va vatekechi na vagogolo vakalongie, "Nefwe twilapie kuwa setuliya kinu vala kuyuwa kyokyonda mbaka petukumdocha Paulo. 15 Nondee, nyenye pamwi na ludamo mlagiche unanzi kwa mkomi va vapuga neke amlete Paulo kwa nyenye mwisingisie ngita mwikela kupatila unofu njowo chemchipulike. Nefwe tukumchindila mung'asi na kumdocha hata peave seafikile pepi."

16 Mpwa va Paulo peapulike kukyanya lya mpango ilyo liwofu, akahelele kula kuitwangilo na kumlongela Paulo. 17 Baho Paulo akamukemela yumwi va muhimilicha vavapuga akamlongie, "Msindike mdimi uyu kwa mkomi va vapuga, agehe na njowo lya kumlongela." 18 Yula muhimilicha va vapuga akamnyamue yula mdimi, akamsindike mbaka kwa mkomi va vapuga, akalongie, "Yula muwopwa Paulo anikemele na akunisuka ndimulete mdimi uyu kwa veve, mana agehe na njowo lwa kukulongela."

19 Mkomi va vapuga akamkolela liwoko yula mdimi, akamsindike pono pa weka, akamuwuchile, "Wisaka kundilongela liki?"

20 Mdimi akamhigile, "Vayawudi vapatine vakusuke, kilau umsindike Paulo kuludamo lyawo kwa vakwisingisila kuva vesaka kumlola hilo pakyanya nogwa lyake. 21 Ila veve uvakanile kwakuva kuna vanu vaginile alobaini vipagile suwe kumfyamila neke kumdocha. Vilapile seviliya vala kuyuwa kinu mpaka pevakali vamdocha. Nondee vagehe suwe kumchindila hela ulamuchi vako."

22 Yula mkomi va vapuga akamlongie "Ubihile kumlongela munu yeyonda kuva anilongei njowo ichi." Akamlekile yula mdimi ahelele.

23 Baho, mkomi va vapuga akavakemele vahimilicha vavili va vapuga akavalongie, "Muvike unofu vapuga mia chivili, vakang'ala falasi sabini na vapuga mya chivili va migoha, vahelele Kaisalia, mwitayalise saa chidatu pamie muve muhegile suwe. 24 Kangi mwandalise falasi yeakugumbanikilwa na Paulo, mumsindike akiva unofu kwa Mkomi va inyi Felikisi."

25 Pambele mkomi yula va vapuga akasimbile baluwa ifi.

26 "Nene Kilawudia Lusia ndikuhungila, mtavala Felikisi Mkomi va inyi. 27 Munu uyu akaibatike na Vayawudi vasakile kumdoche, ila ndahele na lipinga lyangu lya vapuga ndikamwokuwe, kwakuva ndicheliswe kuva mwene ndi munu va inyi lya ku Loma. 28 Ndikamsindike pautalo lya lidamo lyao likomi ndakele kuchela lukani lwevakumlatia. 29 Ndikawene vamlatile kwa nogwa lwa malagicho gyawo, ila sendawene nogwa lyolyonda lyelimgitile adochwe awu awopilwe mukiwopo. 30 Pendicheliswe kuva Vayawudi vakali vagitile mpango lya kumdocha, ndiswitiliche kumsindika kwa veve. Kangi ndivalagiche valete malato gyawo kwa veve."

31 Ifyo vapuga vamnyamuwe Paulo ngita pevalongilwe, vakamsindika pamie ulaula mbaka mwani va Anitipatili. 32 Pamilau vala vapuga vevigenda kwa magulu vakawuyile kuitwangilo, vakavaleka vapuga vakang'ala falasi vahele pamwi na Paulo. 33 Pevafikile ku Kaisalia vakamgavie baluwa yila yula Mkomi va inyi Felikisi, vakamkabisile Paulo. 34 Mkomi va inyi Felikisi peimbile balua akavawuchile, "Paulo ihumila kwiya?" Peacheliswe kuva ihumila inyi Kilikia, 35 akalongie, "Dandipulikicha nongwa lyako valata vako pevafika." Baho akaswitilicha Paulo avikwe panyi lya vapuga mukaye lya ng'achale Helode.