1 Sauli mwene awonile njowo chila cha kumdocha Sitefano kuva nofu.

Kigono ikyo ikyo lipinga lya vadikila va Kilisito va ku Yelusalemu vavangile kugundwa. Vadikila vonda vakanyilie mufijiji fya Yudea na Samalia, vakasigalie vanjagila hela. 2 Vanu vevimfunya Nguluvi vakamsihile Sitefano na vakamvembile hilo.

3 Sauli akagechile kuvadocha lipinga lya vadikila va Kilisito. Akahele kaye kwa kaye na kuvahecha kwivala vadikila vagosi kwa vadala na kuvavika mukiwopo.

4 Vanu vala yevayaganile vakahele kila pono kudalika Njowo cha Nguluvi. 5 Filipo akahele ku mwani va Samalia na kuvadalikila vanu Njowo Nofu cha Yesu Kilisito. 6 Vanu vikung'ise na kumpulikicha Filipo kwa unofu na kulola gila umanyitu geagita. 7 Mihoka ikavahumile vanu volofu kuno vibwatika na vanu venye lugaso na vatenda vananichwe. 8 Vanu va mwani wula vakakeduke hilo.

9 Kukali na munu yumwi litawa lyake Simoni, mwene akali igita uhavi mu mwani ugo kwa chipindi kitali na kuvaduduva va ku Samalia. Akali akwinjuma mwene nde munu mkomi, 10 vanu vonda, vakomi kwa vadodo, vampulikiche kwa unofu valongie, "Simoni nde uwimike va Nguluvi yeichelwa ngita, ‘Uwimike Mkomi’" 11 Vanu vakali vakumpulikicha, kwakuva akali akuvadudwiva kwa kasi lya uhavi vake kwa chipindi kitali. 12 Ila vanu pevadikie Njowo Nofu cha Ung'achale va Nguluvi na Njowo cha Yesu Kilisito weudalikilwe na Filipo, vanu vonda vakabatiswa, vagosi na vadala. 13 Nave Simoni akadikila na kubatiswa, akali akwilongocha na Filipo kila pono, akiduduva na fimanyilo na fimanyitu fikomi fyeafiwene figitwa.

14 Vala vanjagila vevakali ukoya ku Yelusalemu pevapulike kuva venyekaye va Samalia navo vakalidikile luchowo lwa Nguluvi, vakavalagilicha ukoya Peteli na Yohani. 15 Pevafikile, vakavasukilila vala vadikila kwa Nguluvi, neke vamwanuke Muhe va Nguluvi. 16 Kwakuva chipindi ikyo Muhe va Nguluvi seakali amwikie munu yeyonda pagati lyao, ila vakabatiswe kwa litawa lya Mtwa Yesu weka hela. 17 Baho Peteli na Yohani vakavavikile mawoko gyao na kuvalumbila kwa Nguluvi, navo vakawanuke Muhe va Nguluvi.

18 Simoni peawonile kuva vanu vamwanuke Muhe va Nguluvi kwa kuvikilwa mawoko na vanjagila. Ifyo akang'alile kuvagavila sendi Peteli na Yohani, 19 akalongie, "Mnigavile na nene umwimike ugo, neke munu yeyonda yendikumvikila mawoko, amuwanuke Muhe va Nguluvi." 20 Ila Peteli akamhigile, "Uyage patali pamwi na Sendi chako, wihocha kuva wivesa kugula umwimike va Nguluvi. 21 Wihela fwasi yeyonda mukasi ilyo, kwakuva numbula lyako seumkeliye Nguluvi. 22 Kwaifyo, hongiche unjanganifu vako na umsuke Mtwa mwene ivesa kukumbonela lusungu mahocho ga dumbula lyako. 23 Kwakuva ndiwene umemile uvasi na udindilwe na sambi!"

24 Simoni akahigile, "Mnisukile kwa Mtwa ago gamlongie gibihile kunihumila."

25 Peteli na Yohani pevamalile kuvalongela njowo cha Yesu, vakawuyile ku Yelusalemu. Pevakali vewuya vadalikile Njowo Nofu mu fijiji fya Samalia.

26 Ndumindumi va Mtwa akamlongie Filipo, "Bite lubali lwa kwivindi ku ng'asi lya kukwelu yeikwika kuhuma ku Yelusalemu kwelela ku Gasa." 27 Baho Filipo akavangile lugendo. Peagehe mung'asi vakatang'anile na munu yeafue kumagulu munu uyo akali kilongochi mkomi va kuvika finu fya Kandaki kwa ng'achale mdala va Esiopia. Munu uyu akahele ku Yelusalemu kumlumba Nguluvi. 28 Peakali iwuya kukaye kuno akang'ie muligeleti, akali ikwimba kiganulo kya mvichi va Nguluvi yeikemelwa Isaya. 29 Muhe va Nguluvi akamlongie Filipo, "Ubite pepi lila ligeleti ulongochane nalyo." 30 Filipo akanyilile pepi na lila ligelete na kumpulika munu uyo ekwimba kiganulo kya mvichi va Nguluvi yeikemelwa Isaya. Filipo akamuwucha, "Ifi fyewukwimba ukuvichela?" 31 Yula munu akamhigile, "Ndewesa wuli kuchela bila munu kuniwulanicha?" Akamlongie Filipo akang'ale muligelete neke vakale pamwi. 32 Yula munu yeafuwe kumagulu akali ekwimba masimbo aga mang'alila,

"Akali ngita kondolo yeisindikwa kuhinjwa,

ngita Mwanang'ondolo,

peichika peidumulwa magala

na mwene seilonga kinu kyokyonda.

33 Abedilwe na kuwonelwa,

kwihela yeiwesa kulonga makani gya kilelo kyake,

kwakuva uwumi vake uhechilwe kuinyi yonda."

34 Yula munu akamuwuchile Filipo, "Unilongele, uyu mvichi ilonga kwa njowo chake yumwene awu kwa njowo cha vanu vangi?" 35 Baho Filipo akavangile bahala pa Masimbilo Mang'alila, akamlongie Njowo Nofu cha Yesu. 36 Pevave mulugendo, vakafikile pono pakali na malenga, yula munu akalonga, "Pono baha kugehe na malenga, kinu liki kyekinikanila kubatiswa?" 37 Filipo akamlongie, "Ngita udikila kwa numbula lyako lyonda wiwesa kubatiswa." Yula munu akamhigile, "Ena, ndidikila kuva Yesu Kilisito ndi Mwana va Nguluvi." 38 Yula mkomi akaswitilicha lila ligeleti lime, baho Filipo na yula mkomi vakwikile, vakaingile mumalenga na Filipo akambatisa. 39 Pevahumile mumalenga, bahobahao Muhe va Mtwa ukamnyamule Filipo, yula mkomi seamuwene kangi, yula mkomi akaendeliye na lugendo lwake kuno ihekelela hilo.Munu ibatiswa 40 Filipo akawonikile kumwani lya Asoto, kumwani konda peakali ichumba akali idalika Njowo Nofu mbaka peafikile ku mwani va ku Kaisalea.