1 Petufikile ku inyi ng'afu, tukachela kuva kigunguli kila kikemelwa Malita. 2 Venekaye va kigunguli kila vakali vasanzi hilo kwa nefwe. Ndonya ikali ivangile kutonya na kukali na ng'ala, ifyo vakakochile lyoto, vakatuwanuke. 3 Paulo akaholile msigo mdodo va sagala akafungachila mulyoto. Liyoka akahumile mulyoto kwakuva lya lyoto mwene sumu akamnyengelela muliwoko lya Paulo. 4 Vala venekaye va kila kigunguli pevawene yula liyoka akwinumbisa mumuwoko va Paulo vakamlongie, "Munu uyu mdochaji, hata ngita aokwike kufua mu inyanza, suwe, nguluvi akumuhomba kwa mawofu gyake!" 5 Ila Paulo akampumunile mu lyoto yula liyoka na seamlamiche hata kidodo. 6 Vala vanu vakali vihocha kuva daatupe awu aguwe panyi na kufua. Ila pevachindile kwa chipindi cholofu na pevawonile kwihela kinu kinjanganifu kyekimuhumie, vakaseduche mahocho gyawo vakalongie kuva Paulo ndi yimwi va valungulu.

7 Pepi na pono yila, pakali na mgunda mkomi va munu yumwi mkomi va kigunguli kila, yeakemeliwe Pubilio, akatuwanuke na kutukumbanikila kwa usanzi mkomi kwa figono fidatu. 8 Daada vake Pubilio akali avasile paulili, akiva itamika uvauwa na kuhalisa danda. Paulo akaingile mugati neke amlole na pevamalile kumlumba Nguluvi, akavikile mawoko pakyanya lyake na akananichwe. 9 Luchowo lula pelihumile, vanu vonda va kigunguli kila vevakali vatamwa vachile, navo vakananichwe. 10 Vanu vakatugavila fupo chogofu na chipindi petuvangile lugendo kangi, vakavikile mumeli kila kinu kyekisakile mulugendo.

11 Pegichumbile myechi midatu tukavangile lugendo kwa meli wehumile ku Alekesandia yeukemelwa, "Valungulu pacha". Meli ugo ukahimilichwe baha Malita kwa chipindi chonda cha ng'ala. 12 Kuhuma ukoya tukafikile ku mwani va Silakusa, tukakalie baho kwa figono fidatu. 13 Baho tukahumile baho tukafikile mu mwani lwa Legio. Kigono kyekifikile lukala lukomi ukapugile kuhuma palubali lya kwivindi na pefichumbile figono fivili tukafikile Potioli. 14 Ukoya tukawawene vanu vevamdikie Yesu, vakatusukile twikalile navo kwa figono saba. Baho tukaendeliye na lugendo mbaka Loma. 15 Vanu vevamdikie Yesu va ukoya ku Loma pevapulike luchowo lwetu, vachile mbaka ku soko lya Apio na Kaye chidatu chakwikala vagenji. Paulo peawawene, akamuhongecha Nguluvi, akakedukile hilo munumbula lyake.

16 Petufikile Loma, Paulo aswitilichwe kwikala wekahela akiva na mpuga yumwi va kumdima.

17 Kigono kya udatu Paulo akavakemela vilongochi va Vayawudi pamwi va pono pala. Pevakung'ese akavalongie, "Vayawudi vayangu, ingava sendigitile kyokyonda kinjanganifu kwa vanu vetu vala kupinja njowo chechituchovile kuhuma kwa vagogolo vetu, ndibatilwe ukoya ku Yelusalemu na kusindikwa kwa vilongochi va Loma. 18 Pevanihuchile na kulola kuva ndihela na malato gyogyonda, vakasakile kunileka. 19 Ila Vayawudi vangi vakalipinjile luchowo ulo na nene ndikasikale kuhelela kuhigwa nongwa kwa ng'achale mkomi va Loma, ingava sendikali na kyokyonda kya kuvalata Vayawudi vayangu. 20 Kwakuva ndikasukile kutang'anila na nyenye na kuywanga na nyenye, kwakuva ndiwopilwe ndegei cha kyuma igi kwakuva lya uhuvililo lila lyeichindilwa na vanu va Isilaeli."

21 Vonda vakalongie, "Nefwe setuwanuke baluwa yoyonda kuhuma ku Yudeya, vala kwihela munu yeyonda yeahumile ukoya na kutulongela njowo chako njanganifu. 22 Ila twisaka tukupulike veve mweme wilonga liki, kwakuva twichela kuva kila pono twipulika vanu vilonga njowo njanganifu kutigila lipinga ilyi."

23 Ifyo vakalonganile kigono kya kutang'ana na Paulo, na vanu volofu vakafikile pekwikala Paulo. Kuhuma pamilau mbaka pamie Paulo avalongie na kuvaganulila kukyanya lya Ung'achale va Nguluvi na kwa malagilicho gya Musa na masimbo gya vavichi va Nguluvi, akigecha kuvagita vamdikie Yesu. 24 Vamonga vawo vakadikila njowo chake, ila vangi sevamwidikie. 25 Ifyo kukali na malimbano vene kwa vene na vakavanga kuhega, Paulo akalonga lukani ulu, "Muhe va Nguluvi akavalongie undakyene vagogolo venu kuchumbila mvichi va Nguluvi Isaya, 26 akilonga,

‘Hele kwa vanu ava, ukavalongie,

kupulika damwipulika, ila sedamwichela,

kulola damwilola, ila sedamwilola kinu.

27 Kwakuva luhala lyawo chipugile,

masigicha gyawo gidindile,

meho gyawo gidindile,

vangelolile kwa meho gyawo,

na kupulika kwa masigicha gyawo,

na kuchela kwa luhala lwawo,

na kuchileka njowo chawo njanganifu,

neke ndivananiche.’"

28 Baho Paulo akamalile kwa kulonga, "Ndisaka mchele kuva lunjowo lwa ukombosi va Nguluvi usindikwe kwa vanu se Vayawudi, navo davaupulikicha!"

29 Paulo peamalile kulonga ago, Vayawudi vakahegile kuno vakiva vakwihucha njowo chongofu. 30 Kwa chipindi cha myaka givili gyonda Paulo akakalile mu kaye lyakuhomba sendi, akiva akuvawanuka vonda vevafikile kumuhungila. 31 Akali akudalika Ung'achale va Nguluvi na kuwulanicha kukyanya lya Mtwa Yesu Kilisito kwa ukakatima na kwihela munu yeamkanile.