1 Nene Paulo, mchulila va Kilisito Yesu, yendihaguliwe na kukemelwa na Nguluvi kwa kuvadalikila vanu Njowo chake Chinofu.

2 Njowo ichi Chinofu nde chejangile Nguluvi kuhuma dahila, kuchumbila vavichi vake, ngita peisimbilwe mu masimbo ga Nguluvi. 3 Njowo ichi Chinofu chikumuhumulila Mwana va Nguluvi, Mtwa vetu Yesu Kilisito, mwene akali munu kwa kubabwa mulukolo lwa Dawudi. 4 Kwa umwimike va Muhe va Nguluvi akamuwonesile kuva Mwana va Nguluvi kwa uchulubuko vake kuhuma kwa vanu vevafuwe, uyu nde Yesu Kilisito Mtwa vetu. 5 Kuchumbila mwene Kilisito, anigavile usangi ndiveche mnjagila, ndivalongoche vanu va inyi yonda neke vawese kudikila na kupulikicha. 6 Ndeni ndeni nyenye yemwikala ku mwani va Loma, yemukemeliwe muveche vanu va Yesu Kilisito.

7 Nondee, ndikuvasimbiliya nyenye vonda yemwikala ku mwani va Loma yemukeliwe na Nguluvi, akavahaguwe muveche vanu vake.

Ndikuvasukila kwa Nguluvi Daada vetu na Mtwa vetu Yesu Kilisito avagavile usanzi na lutengamaso.

8 Ndikumuhongecha tandi Nguluvi vangu kuchumbila Yesu Kilisito kwakuva lya nyenye vonda, kwakuva vanu vonda va inyi vapulike ludikilo lwenu. 9 Nguluvi yendikumgumbanikila kwa numbula lyangu lyonda kwa kudalika Njowo Chinofu cha Mwana vake, ndi mswida vangu kuva ndikuvawiwuka, 10 kila pendisuka. Ndikumsuka Nguluvi agite ngita peikela, anigite ndiwese kuvagendelela nyenye. 11 Kwakuva ndidoboka hilo kuvagendelela nyenye, neke ndipatile kuvatanga muludikilo lwenu neke muveche vakangafu. 12 Ndisaka kulonga endee, vonda nyenye pamwi na nene twigangamiche, ludikilo lwangu lwa Nguluvi livagangamiche nyenye na ludikilo lwenu kwa Nguluvi linigangamiche nene. 13 Valongo vangu, ndisaka muchele kuva mala chongofu dandisakile kuvagendelela, ila kigehe kinu kyekinikanile mpaka nondee. Nganikela ndivapate vanu yevakumdikila Kilisito kuhuma kwa nyenye ngita pendivapatile vanu vevamdikiye Kilisito yese Vayawudi. 14 Nding'ang'wa kuvadalikila vanu Njowo chinofu vala Vagiliki na yese Vagiliki na vala vevakwimbile na sevakwimbile. 15 Ndeni nene, ndidoboka hilo kuvadalikila Njowo Chinofu kwa nyenye yemwikala ukoya ku mwani va Loma.

16 Sendiwona nyoni kudalika Njowo chinofu, kwakuva chigehe na ludali lwa Nguluvi kuvalowa kila munu yeakuidikila, kwa Vayawudi tandi, kangi kwa vanu se Vayawudi. 17 Kwakuva Njowo chinofu chiwonesa wachi kuva Nguluvi peavakuvagita vanu kuva vasanzi pautalo lyake kwa ng'asi lya kudikila, kuvangila pamwandi mbaka kumwiso, ngita peisimbilwe mumasimbo ga Nguluvi, "Munu musanzi pautalo lya Nguluvi dakwikala kwa kudikila."

18 Nguluvi agubutile luvipo lwake kuhuma paluhano kwa vanu vonda vevagita sambi na uwofu vonda va vanu vevakuwupinja undakyene ubihile kucheleka kwa uwofu vawo. 19 Kwakuva, makani gyonda gyegikumugita Nguluvi achelwe kwa vene gagehe wachi. Nguluvi yumwene agawonese wachi kwa vene. 20 Kuvangila Nguluvi peawumbile inyi, umwimike vake va mbepali na unguluvi vake, uvikilwe wachi ata ngita vibihila kuwoneka kwa meho, ila vanu viwesa kuchela umwimike va makani ago kwa kugalola finu fyawumbile. Ndeni vanu seviwesa kwitasa. 21 Ata ngita vakumchela Nguluvi, ila sevakumginya ngita Nguluvi vala sevakumuhongecha, ila luhala lwao lwavikilwe kisi ata sevawesile kuchela unanzi va Nguluvi. 22 Vakwidumba kuva vana luhala ila vapufi. 23 Vilekile kumnjuma Nguluvi yeakwikala mbepali, ila vakunjuma vang'omong'omo chechigalanichwa ngita munu yesekwikala mbepali na vang'omong'omo ga vang'oko na fidege na fiwumbe fyefikwambala.

24 Ndeni, Nguluvi akavalekile vadoboke hilo munumbula chawo na vayigitile makani ga nyoni mumivili gyawo. 25 Vakalekile kudikila undakyene va Nguluvi na kufwata udesi, vakalekile kumginya na kumgundamila Nguluvi yeing'ang'wa kunjumwa mbepali! Ndakyene.

26 Kwa ndeni, Nguluvi avalekile vakovikele ludoboko chawo njanganifu. Ata vadala valekile kugona na vagosi vawo ngita Nguluvi peikela, vakayidobokile vavene kwa vavene. 27 Ndeni ndeni vagosi valeka kugona na vadala vao ngita Nguluvi pevavawumbile, vakayidobokela vavene kwa vavene. Vagosi vayigitile makani ga nyoni, ndeni vakayikovekele vavene lihigilo kwa mawofu gevagitile. 28 Kwakuva vanu avo vakakanile kumchela Nguluvi, Nguluvi akavalekile vakovikele luhala chawo chihofu, vakagitile gala segang'ang'ilwe kugitwa. 29 Vanu ava, vamemile makani manjanganifu, uwofu, kusaka kila kinu kiveche kyako, ludobokelo njanganifu, wifu, kudocha vanu, ndewo, kuchanga vanu, mahocho manjanganifu na kuheha, 30 na vakwilata kwa udesi na vakumvipila Nguluvi na yevagehe na kidada na vikwinjuma na kwidumba na veving'ang'a mawofu na sevakuvadikila vasasi vawo, 31 na vihela luhala na vevidenya lyagano na sevakwikela na vihela lusungu kwa vanu vangi. 32 Na vachela kuva malagilicho ga Nguluvi, isimbilwe kuva vanu vevigita makani ngita aga vang'ang'wa kudochwa. Ila sevigita makani ago hela, ila vakwidikila navo vevigita makani ngita ago.