1 Ndeni, valongu vangu, kwakuva Nguluvi agehe na lusungu hilo, ndikuvasuka kwa numbula lyangu yonda, muyihechile nyenye vavene muveche usembe veugehe uwumi lya kumkelesa Nguluvi. Nga mgita ndeni nde Ng'asi lya undkyene lya kumlumba Nguluvi. 2 Mubihile kuhocha awu kugita ngita vanu va inyi iyi, ila mulongele Nguluvi abadilise namna lyenu lya kuhocha mugati lyenu muwese kugachela gala geakela Nguluvi. Baho damuwesa kugachela geakela Nguluvi gala manofu na gegikumkelesa na chitimile.

3 Kwakuva Nguluvi andigavile usanzi vake, ndeni ndikuvalongela nyenye vonda, mubihile kwiwona kuva nyenye ndi vanu va komi hilo kuchumba pemung'ang'wa kuvecha, ila kila yumwi ayilolele ngita Nguluvi peamgavile kila munu kwa ludikilo lwake. 4 Ngita pemchela mvili ndeumwi ila ugehe fiwungo fyongofu, kila kimwi na kasi lyake. 5 Ndeni ndeni na nefwe tugehe volofu, ila nefwe kwa kwiwunga na Kilisito tuvechile mvili umwi na kila yumwi vetu nde kiwungo kya mweyage. 6 Suwe, kila munu agavile fupo lya usanzi va Nguluvi, yeagavilwe na Nguluvi umwimike va kuvalonga vanu unanzi va Nguluvi na agite ndeni kwa muludikilo lwake. 7 Munu yeagavilwe umwimike va kugundamika muleke agundamike. Na munu yeagavilwe umwimike lya kuwulanicha muleke awulaniche unofu. 8 Munya umwimike va kuvagangamicha vanu vangi na agite ndeni. Munya kumgavila mweyage kyenakyo na agite ndeni kwa numbula yonda. Munu yeavalongocha vanu avalongoche unofu. Munu yeavawonela vanu lusungu, agite ndeni kwa kukeduka.

9 Muvakele veyenu kwa lukelo va undakyene. Kangi muleke kugita sambi ila mugite manofu chipindi chonda. 10 Mwikele ngita lukolo na kila munu adoboke hilo kumginya mweyage. 11 Mugite kasi kwa kugangamala na mubihile kuva vagata. Mumgumbanikile Mtwa kwa numbula chenu chonda. 12 Mwikeduke kwakuva mukumhuvilila Nguluvi, mwigangamale pemwigudwa na mumsuke Nguluvi figono fyonda. 13 Muvatange vanu va Nguluviinu finu fyenu fyevisaka, muvawanuke vagenji kwa usanzi.

14 Muvagitile manofu vanu vala yevakuvagudisa nyenye, muvasukile manofu na mubihile kuvakotola. 15 Mukeduke na vevigehe na lukeduko, muvembe pamwi na vevavemba. 16 Mwikale kwa lutengamaso nyenye kwa nyenye. Mubihile kwidumba, ila mwiyidikile kugita kasi na vanu mukuvalola sekinu. Mubihile kwiwona muna luhala hilo.

17 Munu akikugitila nongwa, bihile kumuhomba unjanganifu. Mugite manofu pautalo lya vanu vonda. 18 Muyigangamiche kwikala kwa lutengmaso na kila yumwi. 19 Valongu vangu yendivakeliye, mubihile kumpwisila yeyonda ye akugitile nongwa, ila lukani ulo mulekele Nguluvi muvipo lyake amupulisiye, kwakuva isimbilwe mumasimbo, ilonga Mtwa, "Nene nde ndikuvapilusila vanu" 20 Ndeni ndeni masimbo gilonga, "Munu yeakuvipila peivecha na njala, mgavile kyakuliya, peivecha na ng'elu, mgavile malenga anyuwe. Kwakuva pewigita ndeni dakumgita apatile nyoni." 21 Bihile kulutalwa na unjanganifu, ila gawese uwofu kwa unofu.