1 Nondee, tudikilwe na Nguluvi kwa kudikila, suwe, tukwikala kwa lutengmaso na Nguluvi kwa ng'asi lya Mtwa vetu Yesu Kilisito. 2 Kwa ng'asi lya kumdikila Yesu, Nguluvi atugavile usanzi vake, ata nondee twihendelela kwikala muusanzi ugo. Suwe, tuhekelela hilo kwakuva tukuhuvilila datukwingila pamwi na Nguluvi muukomi vake. 3 Ndakyene, se ago hela, ndeni ndeni tuhekelela mumagudo tukichela kuva magudo gitutanga tuveche vachindila, 4 na luchindilo luletela tubihile kuwogopa na kubihila kogopa ikutuletela luhuvililo. 5 Luhuvililo ulo, seliwesa kutugavila nyoni, kwakuva Nguluvi katusukulila suwe lukelo lwake munumbula chetu kwa ng'asi lya Muhe va Nguluvi yetugavilwe nefwe.

6 Petukali setuwesa kwilowa vavene musambi, chipindi pechitimiye, Kilisito akafuwe kwakuva lya nefwe vawofu. 7 Seupefu kwa munu kufuwa kwakuva lya munu yeadikilwe pautalo lwa Nguluvi, ila munu iwesa kufuwa kwakuva lya munu mnofu. 8 Ila Nguluvi awonesile kuva akutukela, kwakuva petukali musambi, akamuhechile Kilisito afuwe kwakuva lya nefwe. 9 Kwakuva nondee tudikilwe pautalo lya Nguluvi kwa danda lya Kilisito, ndi ndakyene kuva daatulowa muluvipo lwa Nguluvi. 10 Kwakuva petuwave vachundama va Nguluvi, tukanjengilwe kaya kuchumbila kufuwa kwa Mwana vake. Na ngita tunjengilwe kaya na Nguluvi, suwe, tuchela datulowoliwa kwa uwumi va Kilisito. 11 Ila se aga hela, ila ndeni ndeni tuhekelela kwa gala geagitile Nguluvi kwa ng'asi lya Mtwa vetu Yesu Kilisito, yeatunjengile kaya na Nguluvi.

12 Sambi ikahingile muinyi kuchumbila munu yumwi na sambi ilyo ikaletela tufuwe. Ndeni kufuwa kukalutala kwa vanu vonda, kwakuva vonda vagitile sambi. 13 Sambi ikavechile muinyi kabula lya malagilicho ga Nguluvi geagavile Musa, ila Nguluvi seakavalongile vanu kuva vana sambi. 14 Ila kuhuma chipindi cha Adamu mbaka chipindi cha Musa, kufuwa kukalutala kwa vanu vonda, ata ngita vala sevagitile sambi ngita yeagitile Adamu kuleka gala gyealagilichwe na Nguluvi.

Adamu akali awananiswe na Kilisito, ngaachile pambele. 15 Ila sambi lya Adamu seiwana na usangi va Nguluvi. Sambi lya munu yumwi Adamu yeagitile vanu vonda vafuwe kwakuva lya sambi lyake. Ila kugehe na yumwi yungi uyo ndi Yesu Kilisito, yeakuvagavila vanu volofu fupo lya usanzi lwa Nguluvi, unanzi ugo va Nguluvi ndi ukomi hilo kuchumba sambi lya Adamu. 16 Kangi Nguluvi peakuvahechelela vanu sambi kwa ng'asi lya unanzi vake seiwana na gala gegiletwa na sambi lya Adamu. Sambi yila yimwi lya Adamu peigitilwe na vanu, Nguluvi akavahigile nongwa vanu vonda. Ila nondee sambi chongofu chigitilwe, ila Nguluvi ave akuvadikila vanu avo kwa ng'asi lya usanzi vake. 17 Ndakyene kwa sambi lya munu yumwi, kufuwa kukavangile kukalutala kuchumbila munu uyo yumwi. Ila kila keagitile munu yumwi uyo Yesu Kilisito ndi lukani lukomi hilo. Vanu vonda veviwanuka usanzi ugo ambavo ndi fupo lwa kudikilwa pauatlo lya Nguluvi, davatavala muwumi kwa ng'asi lya Yesu Kilisito.

18 Suwe, Nguluvi akuvahiga vanu kwakuva lya nongwa limwi lwagitilwe na Adamu. Ila lugito limwi lwegitile Kilisito likavavikile kuvecha vanu vaveche pekesu, ndeni Nguluvi akuvadikila vanu kwa ng'asi lya gito limwi lyeagitile Kilisito. Ndeni vanu viwanuka uwumi va mbepali kuhuma kwa Nguluvi. 19 Kwakuva ngita munu yumwi seakamdikile Nguluvi na vanu volofu vakaingile musambi, ila vanu volofu vakadikilwe pautalo lwa Nguluvi.

20 Ila peyachile malagilicho neke kuvawonesa vanu kuva vagitile sambi, ila vanu pevaginile kugita sambi Nguluvi akaginile kuhongelecha usanzi vake kwa vanu vake. 21 Ngita fila sambi peilutale na kuletela kufuwa, ndeni ndeni usanzi va Nguluvi ulutile na kuletela uwumi va mbepali kwa ng'asi lya Yesu Kilisito Mtwa vetu.