1 Vakolo vangu, nyenye vonda muchela ndakyene aga gendilonga, kwakuva ndilonga na vanu vevichela malagilicho ga Nguluvi geamgavile Musa. Malagilicho ikumlongocha munu peave ikwikala. 2 Kwa mufanu, mdala yeatolilwe adindilwe na malagilicho chipindi chonda mgosi vake peave akwikala, ila mgosi vake peafuwa, mdala uyo seadindilwa kangi na malagilicho. 3 Ndeni, mdala uyo atawike na mgosi yungi chipindi mgosi vake agehe wumi, daikemelwa mgoni. Ila mgosi peifuwa, mdala uyo sedaidindwa kangi na malagilicho na peitolwa na mgosi yungi, mwene semgoni. 4 Ndeni ndeni, vakolo vangu, ifi nde igehe kwa nyenye semulongochwa kangi na malagilicho, kwakuva mufuwe pamwi na Kilisito. Nondee muvechile vake mwene yeachulubuchwe neke muwese kumgitila Nguluvi makani manofu. 5 Kwakuva dahila tukalongochwe fila mvili peung'ang'a, luboko cha sambi chechiyovelechwa na malagilicho chikagitile kasi mumvili gyetu, makani gyonda getugitile gatuletela kufuwa. 6 Ila nondee setulongochwa na malagilicho. Tukafuwe mulukani lwetugitile tuveche ngita vasutu. Ila nondee tukwikala kwa kulongochwa na Muhe va Nguluvi na sekwa ng'asi lya dahila lya malagilicho gegisimbilwe.

7 Wuli, tulonge liki? Kuva malagilicho ndi sambi? Hamu! Ila ngajila Malagilicho, nene sengachele ludobokelo njanganifu ndi kinu liki. Ngita malagilicho sengailongile, "Ubihile kudobokela kinu kya munu yungi." Nondee ndichela kuva kudoboka ndi kinu kinjanganifu. 8 Kwa malagilicho ago, sambi ikapatile nafwasi lya kuyovelecha ludoboko njanganifu chongofu mumvili vangu. Ila ngajila malagilicho sambi ndi kinu kyekifuwe. 9 Pamwandi pendikali wumi, kangi ndigita kyendikela, ila malagilicho peyachile, ikanigitile ndichele kuva ndigehe na sambi na nene ndikali ngita ndifuwe. 10 Ndeni, malagilicho ago geing'ang'ile kuniletela uwumi, ila ikaniletile kufuwa. 11 Kwa ng'asi lya malagilicho ago, sambi ikanichangile na kuniletela kufuwa.

12 Suwe, malagilicho aga gihuma kwa Nguluvi na amuli gihuma kwa Nguluvi na ndinofu na chigehe ngita peching'ang'a. 13 Ndakyene, kinu kinofu sedakiwesa, kunigita ndifuwe! Sambi nde ikanigitila ndifuwe kwa kuchumbila, kuchumbila malagilicho. Nguluvi akasakile kuva malagilicho chiveche chiwonesa kuva sambi ndi kinu kinjanganifu hilo.

14 Tuchela kuva malagilicho gihuma kwa Nguluvi, ila nene ninago umunu va sambi, kuno kulonga kuva nene ndimsutu va sambi. 15 Sendichela kyenigita, kwakuva kila kyendikela sendikigita, ila ndigita kila kyendikivipila. 16 Ndikiva ndigita kila kyendikivipila, iyi ndidikila kuva malagilicho ndi manofu. 17 Undakyene, senene yendigita mawofu, ila sambi yeikala mugati lyangu. 18 Ndichela kuva kwihela kinu kinofu muumunu vangu. Kwakuva ndikela kugita kinu kinofu, ila sendiwesa. 19 Kwakuva lila linofu lyendikela kuligita, sendikuligita, ila ndigita lila liwofu lyesendilikela kuligita. 20 Ndeni, ndikiva ndigita gala gyesendikela kugita, ndakyene senene yendikugagita ago, ila sambi yeigita mugati lyangu.

21 Suwe, ndiyiwulaniche kinu iki, pendikela kugita kinu kinofu, mawofu nago gagehe baho. 22 Kwakuva ndikedukila malagilicho ga Nguluvi kuhumila na umunu vangu umiya va mugati. 23 Ila ndilola kuva kugehe na malagilicho gangi geigita kasi mumvili vangu, malagilicho gegipinjana na gala malagilicho geidikilwa na luhala lwangu. Ndeni, daikunigita ndiveche msutu va sambi yeigita kasi mumvili vangu. 24 Sungandilola nene! Ndi ani dakundilowa nene kuhuma mvili ugu weukunigita nene ndifuwe? 25 Ndikumuhongecha Nguluvi kwakuva mwene daindilowa kuchumbila Mtwa vetu Yesu Kilisito!

Ndeni, nene mwene kwa luhala lwangu ndigitila kasi malagilicho ga Nguluvi, ila chipindi chingi nene ndigitila kasi malagilicho ga sambi.