1 Ndilonga undakyene nene ndi munu va Kilisito, sendilonga udesi. Umwimike va kuhagula manofu na manjanganifu ikwidikila na Muhe va Nguluvi, kuva nene sendichanga. 2 Ndakyene nene ndigehe na matuno hilo, matuno segegisila munumbula lwangu, 3 kwakuva lya vanu va inyi lyangu. Ndikidikila kukotoliwa na kunengwa na Kilisito, neke ndivagite vakolo vangu Vayawudi vamudikile Nguluvi. 4 Avo ndi vanu va Isilaeli, yevahaguliwe na Nguluvi vaveche vana vake, yevawonisile ukomi vake, yeagitile lulagano navo na yeavagavile malagilicho gake, yeavawonisile ng'asi lya kumgundamikila mwene na jangi chake. 5 Vene ndi vababwa va daada vetu vakomi na Kilisito yeababilwe kimunu, kuhuma mulukolo lwao. Nguluvi yeatavala mufinu fyonda, anjumwe mbepali! Ndakyene.

6 Sendilonga kuva Nguluvi akanile kugita kila kyeajangile, kwakuva se vanu vonda Vaisilaeli ndi va Nguluvi. 7 Ndeni ndeni, sevababwa vonda va Ibulahimu ndi vana vake Nguluvi, kwakuva Nguluvi akamlongiye Ibulahimu, "Vababwa vako dafahuma kwa Isaka." 8 Ndeni, sevala vevababilwe kimvili ndi vana va Nguluvi, ila vala vevababilwe kuhumila na jangi lya Nguluvi nde davakemelwa vana va Ibulahimu. 9 Kwakuva, Nguluvi akajangile ndeni, "Chipindi chene dandiwuya na Sala daibaba mwana mkigosi."

10 Kangi seago hela, ila Lebeka akababile na mgogolo vetu Isaka mambila. 11 Neke Nguluvi awoneke ihagula kyeasaka, ata peave sevababilwe na peave kugita manofu na manjanganifu. 12 Nguluvi akamlongile Lebeka, "Mwana mkomi daakumgumbanikila mnung'uwe." Lukani lulo liwonesa kuva Nguluvi akumkemela munu ngita peakela mwene na sekulolela makani gake geagita munu uyo. 13 Ngita masimbo ga Nguluvi pegilonga, "Nguluvi akamkeliye hilo Yakobo kuchumba Esau."

14 Suwe, tulonge liki? Wuli, Nguluvi ibagula vanu? Hamu, seibagula! 15 Kwakuva Nguluvi akamlongiye Musa, "Dandikumgitila usanzi vangu munu yendikela kumgitila usanzi, dandikumuwonela lusungu munu yendikela kumuwonela lusungu." 16 Ndeni makani gyonda ihuvilila lusungu lwa Nguluvi sekyeakela munu awu kila munu kyeagita. 17 Kwakuva masimbo ga Nguluvi gikumlongela ndeni ng'chale Falao va Misili, "Ndikagugitile uveche ng'achele neke ndiwese kuwonesa umwimike vangu na litawa lyangu lichelwe muinyi yonda." 18 Suwe, Nguluvi akumuwonela lusungu munu yeyonda yeisaka kumuwonela lusungu na peikela kumgita munu aveche msugu, igita ndeni.

19 Ila yumwi pagati lyenu iwesa kunihucha, "Kwa liki Nguluvi ave akutulawumu? Ani yeawesa kugapinja gala geakela Nguluvi?" 20 Ila veve ani yewiwesa kumuhucha Nguluvi? Wuli, kiwiya kiwesa kumuhucha yeagelaniche, "Kwa liki unigalaniche ndeni?" 21 Mgelanicha fiviya iwesa kugelanicha fiwiya fivili kwa mganga wumwi ngita peikela, kimwi kuvikila finofu na kingi kuvikila uhafu.

22 Ndeni vanu vangi ndigita fiviya fyefing'ang'wa kuhanangilwa na Nguluvi, ndeni Nguluvi akuvavipila. Ila Nguluvi akasakile kuwonesa umwimike vake. Ila akavachindile na kuvahuvilila vala vanu vevang'ang'ilwe kuhanangwa. 23 Yumwene akasakile kuwonesa wachi ukomi vake, peatugavile nefwe yetugehe natilo lya lusungu lwake, akatuhagule kuhuma dahila tuwanuke ukomi vake. 24 Ndeni nefwe nde vanu yeatukemeleliye, sekuhuma kwa Vayawudi hela, ila ndeni ndeni kuhuma kwa vanu se Vayawudi. 25 Ngita Nguluvi pealongile mukiganulo kya Hoseya mvichi vake,

"Vala vevakali, ‘Sevanu vangu’

Dandikuvakemela, ‘Vanu vangu!’

Na vanu sedavakeliye, dandikuvakemela,

‘Vanu dandikuvakela.’

26 Na pala pevalongilwe,

‘Nyenye sevangu,’

baho davakemelwa, ‘Vana va Nguluvi yeagehe wumi.’"

27 Ndeni ndeni mvichi va Nguluvi Isaya, akuvalandulicha kwa lichwi likomi, "Ata ngita vanu va Isilaeli vagehe volofu ngita muhanga va mung'umbung'umbu lya inyanza, ndi vadodo hela davakomboliwa. 28 Kwakuva, Mtwa sedaichelewa kuvahiga vanu va inyi yonda." 29 Ngita pealongwile kulonga mvichi va Nguluvi Isaya, "Mtwa munya ludali, sengatulekile ulelo va Isilaeli, vonda ngatufuwe ngita vanu va Sodoma na Gomola."

30 Suwe, tulonge liki? Vanu se Vayawudi sevagitile kinu kyokyonda neke vadikilwe pautalo lya Nguluvi, ila vakadikilwe pautalo lya Nguluvi kwa kudikila kwavo, 31 ila Vaisilaeli vakasakile kudikilwa pautalo lya Nguluvi kwa kukolela malagilicho ga Nguluvi geamgavile Musa. Ila sevapatile malagilicho gakuvagita vadikilwe pautalo lyake. 32 Kwa liki sevadikilwe pautalo lya Nguluvi? Kwakuva vakahuvilile magito gyawo na sekumdikila Kilisito. Baho, vakayigumbadula, "Muliganga likuvagita vanu vaguwe." 33 Ngita masimbo ga Nguluvi pegilonga,

"Lole, danivika liganga ukoya Sayuni, liganga dalikuvagita vanu vakwigumbadula,

liganga dalikuvagita vanu vaguwe.

Ila munu yeyonda daakumdikila Kilisito, sedailola nyoni."