1 Tulonge liki? Wuli, tuyendelele kugita sambi usanzi va Nguluvi uhongeleke? 2 Hamu! Yila ludobokelo lwa kugita sambi mugati lyetu ifuwe, datuendelela wuli kugita sambi? 3 Wuli, semuchela kuva petubatiswe tukawungile na Kilisito Yesu? Nefwe tukawunganile mukufuwa chake. 4 Petubatiswe tukasilwe pamwi na mwene na kwiwungana mukufuwa kwa mwene, neke ngita fila Kilisito peachulubuchwe kwa ukomi va Daada, ndeni ndeni nefwe tuwese kwikala muwumi umiya.

5 Kwakuva ngita nefwe twiwungile na mwene mufuwa, ndeni ndeni datuwunga na mwene muuchulubuko vake. 6 Twichela kuva unu vetu va dahila ivambilwe pakipindilihicho pamwi na Kilisito, neke ludali lwa sambi yeigehe mumvili gyetu gianangwe, tubihile kugita sambi kangi. 7 Kwakuva, munu yeyonda peifuwa, avikilwe pekesu patali na sambi. 8 Suwe, ikiva tufuwe pamwi na Kilisito, twihuvilila kuva datukwikala pamwi na mwene. 9 Kwakuva, twichela kuva Kilisito achulubuchwe suwe na seifuwa kangi, kwihela ludali chechikumgita afuwe kangi. 10 Suwe, kwakuva akafuwe mala yimwi hela, sambi ihela ludali kangi kwa mwene na akwikala pamwi na Nguluvi. 11 Ndeni ndeni, nyenye mwing'ang'wa kuchela mufuwe musambi, ila nondee mwihoche ngita yemukwikala pamwi na Nguluvi kuchumbila Kilisito Yesu.

12 Ndeni, muleke kugita sambi kangi vala mubihile kuchileka mivili gyenu gegifuwa kugita sambi na kangi mubihile kuchidikila ludobokelo njanganifu chake. 13 Vala mubihile kuhecha ata pono yimwi lya muvili vako kiveche kyombo kya kugitila uwofu na sambi. Ila muyiheche kwa Nguluvi, ngita vanu yevachulubuchwe, hechile pono lya mvili vako kwa Nguluvi neke chigundamike kwa kugita kasi yeing'ang'a Nguluvi. 14 Sambi sedaivecha na umwimike kangi kwa nyenye, kwakuva semwilongochwa na malagilicho, ila mwilongochwa na usanzi va Nguluvi.

15 Suwe, tulonge liki? Wuli, tugite sambi kwakuva setulongochwa na malagilicho? Ila tulongochwa na usanzi va Nguluvi? Hamu! 16 Ndakyene, nyenye mwichela kuva pemwikwitanga mwavene ngita vasutu na kumpulikicha tunga. Nyenye muvecha vasutu kwa uyo yemukumpulikicha. Pemuyihecha kuvecha vasutu va sambi damwisilila kufuwa, ila pemuvecha vasutu kwa kumdikila Nguluvi damudikilwa pautalo lyake. 17 Ata dahila mukali vasutu va sambi, ila nondee ndikumuhongecha Nguluvi, kwakuva nondee mudikile kwa numbula chenu chonda mawulanicho gemugavilwe. 18 Ndikumuhongecha Nguluvi kwakuva avagavile upekesu neke mubihile kugita sambi. Avagitile ngita vasutu vake neke muwese kugita makani gegikumkelesa mwene. 19 Baha ndilonga ng'ombelo ngita vanu pevaywanga, kwakuva lya usosovafu venu. Ngita fila dahila pemudikile kulongochwa na makani manjanganifu na mawofu, ila nondee mwing'ang'wa muyiheche mwavene kugagita geasaka Nguluvi, neke muveche vachulila vake.

20 Pemukali vasutu va sambi mukali semugita gala geasaka Nguluvi. 21 Wuli, mukapatile liki figono fila peamugitile ago, nondee mukugawonela nyoni? Kwakuva, gala gemugitile gikuvaletela kufuwa! 22 Ila nondee mukomboliwe musambi na muvechile vachulila va Nguluvi. Kyemupatila nondee ndi kukala patali na sambi, mahumilo gake ndi kung'alichwa na kuwanuka uwumi va mbepali. 23 Kwakuva mahombo ga sambi ndi kufuwa, ila fupo lwa Nguluvi ndi uwumi va mbepali kwa kwiwunga na Kilisito Yesu, Mtwa vetu.