1 Suwe, ndikuvahucha, wuli, Nguluvi akuvakana Vayawudi vanu vake? Hamu seavakanile! Ndimwene ndi Mwisilaeli, mlelo va Ibulahimu ndihumila mug'ombelo lwa Benjamini. 2 Nguluvi seakavakanile vanu vake yeavahaguwe kuhuma dahila. Muwiwuka masimbo ga Nguluvi gyegikumuhumilila Elia mvichi va Nguluvi peakamsukile Nguluvi kwakuva lya sambi lya vanu va Isilaeli, 3 akalongile "Mtwa, vanu vavadochile vavichi vako na kutunyula fitandangavala fyako fya maganga fya kuhechela usembe. Nene hela ndendisigaliye na visaka kunidocha!" 4 Wuli, Nguluvi akamuhigile liki? Akamuhigile, "Ndave ndigehe na vanu elufu saba yesevamgundamikiye mlungulu yeikemelwa Baali." 5 Suwe, ndeni mbaka nondee, vagehe Vaisilaeli vadodo yevahaguliwe kwa usanzi va Nguluvi. 6 Vanu avo vahaguliwe kwa usanzi vake na sekwakuva lya magito gyawo. Kwakuva ngita Nguluvi akuvahagula vanu kwa kila kyevagita, usanzi vake ngaivecha sekinu.

7 Nonde wuli? Vanu va Isilaeli vapatile kila kyevakali vakisakile, Hamu sevakipatile! Ila vala yevahaguliwe na Nguluvi vakakipatile. Vanu vangi vakali vasugu. 8 Ngita Masimbo ga Nguluvi pegilonga, "Nguluvi akagitile numbula chawo giveche misugu, akavagavile meho sevawesa kulola, akavagavile masigicha ila sevapulika mbaka neng'uli." 9 Ngita Dawudi peilonga,

"Vakati vigita Lihungu lyao lya kuliya Nguluvi achibadilise chiveche kyamvi na mtambu va kuvagomecha,

na kuvatova.

10 Mewo gyawo gavikwe kisi

neke vabihile kulola.

Mimbele gyawo dagigugumbale kwa magudo mbepali!"

11 Suwe, ndihucha kangi, wuli Vayawudi pevakumbadule na kuguwa sevanamuke kangi? Hamu vakanamuke! Kwakuva kwa sambi chawo ulowa ukaachile kwa vanu se Vayawudi, neke Vayawudi avawonele wifu. 12 Sambi cha Vayawudi chikaletile lufunyo longofu kwa vanu se vayawudva na kupwemuka kwa ludikilo lwao lwaletile lufunyo longofu kwa vanu se Vayawudi. Ndeni ngita Vayawudi nga vamuliye Nguluvi kwa kumuidkila Mlowa suwe dakuvecha na lufunyo hilo.

13 Suwe, nondee ndilonga na vanu nyenye se Vayawudi, kwakuva nene ndi mnjagila kwa vanu se Vayawudi, ndikwidumbila ngumbanikilo lyangu. 14 Ndihocha ndiwese kuvagita Vayawudi vayangu vawone wifu, neke ndiwese kuvakombola vamonga vawo. 15 Kwakuva ngita Vayawudi pevakamkanile Yesu, nave Nguluvi akavakanile akachenga kaya na vanu se Vayawudi, daivecha wuli Nguluvi pe akuvaidikila Vayawudi kangi? Vanu vevafuwe davachulubuchwa!

16 Ngita kipandi kya kwanja kya libumunda kihechilwe kwa Nguluvi, libumunda londa lihechilwe kwa Nguluvi. Na ngita midadikwa gya mibiki gihechiliwe kwa Nguluvi na ndeni ndeni mikwati gyake gihechiliwe kwa Nguluvi. 17 Ila mikwati gangi ga miseituni ga mumgunda mdodo gigadumulwe na pala pono peidumulwe pakamatilwe likwati lwa miseituni ga kudasi. Nyenye vanu se Vayawudi muwana na mikwati gya mseitunu va kudasi, nondee muunganiswe kuvecha pamwi na makwati gye gasigaliye gya miseituni gye givyalilwe. Mwipata kyakula kuchumbila midadikwa lya misaituni gye givalilwe. 18 Suwe, mubihile kuvabeda vala vanu vevadumulwe ngita mikwati! Wuli, mukuvabeda? Nyenye nde mikwati, muwuwike kuva senyenye yemuletila uwumi mumidadikwa, ila midadikwa nde gileta uwumi kwa nyenye.

19 Ila mwilonga, "Mikwati gadumulilwe neke nene ndimatikwe pono lyake." 20 Mwilonga ndakyene! Vanu avo vakadumulwe kwakuva sevakaidikile, ila veve wikwima kwa ludikilo lwako. Nondee bihile kwidumba, ila uveche na uwogofi. 21 Kwakuva ngita Nguluvi sevawonela lusungu Vayawudi yevawanine na mikwati gegidumulwe, wuli wihocha daakuwonela lusungu nyenye? 22 Mulole, Nguluvi peagehe msanzi na mkali. Mwene ndi mkali kwa vala vevileka kumfwata, ila ndi msanzi kwa nyenye ngita damwiendelela kwikala muusanzi vake, ngita semwigita ndeni na nyenye damwidumulwa. 23 Ndeni ndeni Vayawudi dasevakumdikila Nguluvi, damwimatikwa kangi, kwakuva Nguluvi iwesa kuvamatika kangi. 24 Nyenye vanu se Vayawudi ndakyene muwanine ngita mikwati ga miseituni ga kudasi, muhechiliwe ukoya, mukamatilwe mumseituni va kumgunda mdodo, ndakyene sepono lya nyenye. Ila Vayawudi viwana na mseituni vakumgunda, ila ndi upefu kwa Nguluvi kumatwa kangi mulibiki lyawo vavene.

25 Valongu vangu, nding'ang'a muchele lupwepo ulu, neke mubihile kwihocha mugehe luhala hilo. Usugu va Vayawudi ndi va chipindi chidodo hela, mbaka vanu se Vayawudi davamuwuyile Nguluvi. 26 Ndeni vanu vonda va Isilaeli davikombolwa, ngita masimbo ga Nguluvi pegilonga,

"Mlowa daakwacha kuhuma Sayuni,

daakuvagita ulelo va Yakobo valeke sambi chawo.

27 Ilyi nde lyagano dandigita navo,

dandihecha sambi chawo."

28 Kwakuva Vayawudi vakanile Njowo Chinofu, vene vakali vachundamwa va Nguluvi kwakuva lya nyenye vanu se Vayawudi, ila kwa fwayida lyenu nyenye vanu se Vayawudi. Ila kwakuva Nguluvi akavahaguwe, vakali vakeliwe na Nguluvi kwakuva lya vagogolo vawo. 29 Kwakuva Nguluvi peakuvahagula vanu na kuvafunyila seivesa kubadilisa. 30 Dahila nyenye vanu se Vayawudi semumdikile Nguluvi, ila nondee muwanuke lusungu lwake, kwakuva Vayawudi vakalemile kumpulikicha Nguluvi. 31 Ila sevakumginya Nguluvi, Ila Nguluvi avechile msanzi hilo kwa nefwe neke Nguluvi aveche msanzi kwa vao. 32 Nguluvi ilonga kila munu agehe na nongwa kwakuva se vakumpulikicha, Nguluvi ilonga ndeni neke awonese usanzi vake na kumhongecha kila munu.

33 Ndakyene! Nguluvi nde mkomi hilo mwene agehe na kila kinu, ichela finu fyonda kwihela ye iwesa kuchela peilamula, kwihela munu ye iwesa kulonga ng'asi chake. 34 Ngita masimbo ga Nguluvi pegilonga,

"Ani yeichela mahocho ga Mtwa?

Ani yeiwesa kuva myovecha vake?

35 Awu, ani yealonguwe kumgavila Nguluvi kinu kyokyonda,

neke amuhombe?"

36 Kwakuva finu fyonda fiwumbilwe na Nguluvi, na figehe kwakuva lyake. Nguluvi anjumwe mbepali! Ndakyene.