1 Suwe, veve mganja vangu, ngita ukuvahiga vayago sedamuwesa kwitasa ata ngita veve nde ani. Kwakuva pevakuvahiga vayago kuno veve wigita galagala vevigita, ukwihiga yumwene. 2 Twichela kuva lihigo lya Nguluvi ndi lya undakyene pala peakuvahiga vanu vevigita makani ngita ago. 3 Ila veve mganja yewukuvahiga vala vevigita makani manjanganifu na veve ukugagita ago, wuli wihocha dawiyepa lihigo lya Nguluvi? 4 Awu ukuubeda usanzi vake mkomi na luhuvililo lwake, wuli, sewichela kuva usanzi va Nguluvi ukukulongocha uwese kuleka sambi na umuwuyile Nguluvi? 5 Ila veve ugehe na numbula kangafu na kidada kya kuleka mawofu, ndeni ukwivikila luvipo ngomi lya Nguluvi mu kigono kila kya kuhigwa kyekihela umwilila daigubutuliwa. 6 Kigono ikyo Nguluvi dakumuhomba kila munu kuhumana na gala gyeagitile. 7 Vanu vala veviendelela kugita manofu vasaka kuginywa hilo na Nguluvi na kuwanuka uwumi veseuhanangika. Nguluvi daakuvagavila uwumi va mbepali. 8 Ila vanu vevisaka finu fyaweka na valema undakyene va Nguluvi, neke vakovekele mawofu, ndakyene davakumgita Nguluvi avipe na mwene davakuvahiga. 9 Ndeni ndeni dakuvecha na magudo na matunila dagikumpata kila munu yeigita mawofu. Dagakuvapata tandi Vayawudi na kangi kwa Vagiliki. 10 Ila Nguluvi daakuvanjuma na daakuvadikila na kuvagavila lutengamaso vanu vala vevigita manofu, tandi kwa Vayawudi na kangi kwa vanu se Vayawudi. 11 Kwakuva Nguluvi ihela umwilila kwa munu yeyonda yula.

12 Kwakuva vanu vonda vevigita mawofu ata ngita sevachela malagilicho ga Nguluvi geamgavile Musa davahigwa. Na vala vevigita mawofu kuno vachela malagilicho davahigwa kwa malagilicho gago. 13 Kwakuva sevala vevapulikicha malagilocho ga Nguluvi geamgavile Musa nde vasanzi pautalo lya Nguluvi, ila vala vevakudikila malagilicho nde vasanzi pautalo lya Nguluvi. 14 Vanu se Vayawudi sevachela malagilicho ago. Ila ngita vigita makani manofu kwa kulongochwa na numbula chawo ngita malagilicho peing'ang'a, davavecha vigita gala geging'ang'wa na malagilicho. 15 Kyanda lyawo iwonesa kuva lila lyeling'ang'ilwa na malagilicho, isimbilwe munumbula chawo. Na umwimike vao va kugita manofu na manjanganifu chiwonesa wachi lukani lulo na mahocho gyawo chikuvahiga na chipindi chingi chikuvatasa. 16 Ndeni daivecha kigono kya lihigo, Nguluvi davakuvahiga vanu ata kwa mahaocho gawo ga lupwepo kwa ng'asi lya Yesu Kilisito. Ngita peilonga Njowo chinofu chendidalika.

17 Ila veve ukwikemela Muyawudi, ukuhuvilila Malagilicho na kwidumba kuva veve ndi munu va Nguluvi, 18 wichela gala Nguluvi gyeakela ugagite na wiwesa kuhagula makani gegakumkelesa Nguluvi kwakuva malagilicho gakuwulaniche, 19 veve ukwiwona kuva ukuvalongocha vevabofwike mewo na welu kwa vala vevagehe mukisi. 20 Veve ukwiwona muwulanicha va vapufi na vala sevikwimbile. Kwakuva unago malagilicho, ndeni wihocha wichela kila kinu na undakyene vonda. 21 Suwe, veve ukuvawulanicha vayago, kwa liki uyiwulaniche yuve? Ukuvadalikila veyago, "Mubihile kuhicha" Kuno veve wihicha? 22 Wilonga, "Mubihile ugoni" Kuno veve wigona. Ukuchivipila ming'omong'omo ga valungu kuno veve ugehe na umosi kwa kuhicha finu fya mukaye cha valungulu? 23 Wikwidumba kuva ugehe na malagilicho ga Nguluvi, sewilola ukumliga Nguluvi kwa kudenya malagilicho gyake? 24 Ngita masimbo ga Nguluvi pegilonga, "Vanu se Vayawudi vakaliliga litawa lya Nguluvi, kwakuva lya mawofu gyenu Vayawudi."

25 Kudumula bina ndi kinu kinofu ngita wikolela malagilicho. Ila ngita sewikolela malagilicho wiwana na yula munu yesedumula bina. 26 Vala vanu se Vayawudi vala sevadumulwe bina, vikigita ngita malagilicho peing'ang'a, wuli, dasevalilwa ngita vevadumulwe bina? 27 Ndeni vala vanu se Vayawudi vala sevadumulwe muvili, ila vakukolela malagilicho, davakuvahiga nyenye Vayawudi, kwakuva semukolela malagilicho ata ngita mugehe na malagilicho geisimbilwe. 28 Suwe, sekila munu yeababilwe na Muyawudi daivecha munu va Nguluvi. Munu seiwesa kuvecha munu va Nguluvi kwakuva adumulwe bina kimvili. 29 Ila munu va Nguluvi ndi yula yeakumudikila Nguluvi kwa numbula lyake yonda. Kudumulwa bina kwa undakyene igitwa na Muhe va Nguluvi munumbula se kukolela malagilicho gegisimbilwe. Munu ngita uyo idikilwa na Nguluvi yumwene na se vanu.