1 Suwe, wuli, Vayawudi vana kinu liki kyekihongilike kuchumba vanu se Vayawudi? Awu kudumula bina kugehe na fwaida liki? 2 Ena, itanga hilo kwa ng'asi chongofu. Kwanja, Nguluvi akalamuwe kuvagavila Vayawudi unanzi vake. 3 Ila daivecha wuli ngita vamonga vawo sevalidikile unanzi ulo? Wuli, luchowo ulo dalikumgita Nguluvi abihile kudikilwa? 4 Hamu! Nguluvi ilonga undakyene, ata kila munu ndi mudesi, ngita Masimbo ga Nguluvi pegilonga,

"Pewilonga,

njowo chako ndi cha undakyene,

na pewihiga,

lihigo lyako ivecha ngita peing'ang'wa."

5 Ila ngita uwofu vetu uwonesa kuva Nguluvi igita tudikilwe pautalo lyake, datulonga liki? Wuli tulonge Nguluvi ikosela peatuhiga? Baha ndiywanga ngita munu. 6 Hamu! Ngita ngaivecha ndeni, Nguluvi ngaiwesa wuli kuvahiga vanu vevagehe muinyi?

7 Ila munu iwesa kuucha, "Ngita udesi vangu utanga kuwonesa undakyene va Nguluvi na kuginicha ukomi vake, kwa liki nene ndihigwa kuva ndigehe na sambi?" 8 Kuko iwana petulonga, "Tuveche tugita sambi neke gache manofu". Vanu vangi vakutulata kwa udesi, kuva ata nefwe tuwulanicha ndeni. Avo vonda davahigwa kuwana na mawofu gyao.

9 Tulonge liki? Wuli nefwe Vayawudi ndi ngiba kuchumba vanu se Vayawudi? Hamu! Ndikawonesile suwe, Vayawudi awu vanu se Vayawudi vonda vana sambi. 10 Ngita masimbo ga Nguluvi pegilonga,

"Kwahela ata munu yumwi yeagehe msanzi pautalo lya Nguluvi,

11 kwahela munu yeakumchela Nguluvi,

vala kwihela yeang'ang'a kumgumbanikila Nguluvi.

12 Vonda vamlekile Nguluvi,

vonda vawofu,

kwahela yeigita manofu,

kwahela ata yumwi.

13 Njowo chihofu chechihuma mumilomo gyao ngita manung'unilo njanganifu,

navo vakuvachanga vanu figono fyonda na kuvagita vakogope.

Njowo chawo chevalonga chikuvalemacha ngita sumu lya lyoka.

14 Munjowo chawo chevalonga chimemile kuvakotala vanu vangi na chechikuvalemacha vanu vangi.

15 Vanu avo vapefu kuvalemacha vanu na kuvadocha,

16 Vanu avo poponda pevahelala vakuhananga finu na kuvaleka vanu vagudike.

17 Sevachela kwikala kwa lutengamaso,

18 sevakumginya ng'odo Nguluvi."

19 Nondee, tuchela kuva Malagilicho ga Nguluvi geamgavile Musa peilonga, ilonga na vanu vala yevang'ang'wa kulongochwa na Malangilo neke kila yumwi abihile kwitasa na vanu vonda va inyi vihigwa na Nguluvi. 20 Kwakuva kwahela munu yeyonda yeadikilwa kuva ndi msanzi pautalo lya Nguluvi kwa kukolela malagilicho, kwakuva malagilicho ikutugita twichele sambi.

21 Ila nondee ng'asi lya Nguluvi yeikuvagita vanu vaveche vasanzi pautalo lyake igubutuliwe. Ng'asi iyi seigitwa kwa malagilicho. Ata figanulo fya malagilicho na fya vavichi va Nguluvi fihumulila lukani ulu. 22 Nguluvi akuvagita vanu vonda kuva vasanzi pautalo lyake kwa kumdikila Yesu Kilisito. Nguluvi igita ndeni kwa vonda vevamdikila Kilisito. Kwakuva Vayawudi na vanu se Vayawudi vonda viwana. 23 Vanu vonda vagitile sambi na uwumi vawo sewiwonesa ukomi va Nguluvi. 24 Ila kwakuva Nguluvi msanzi hilo, akuvagita vanu vonda vidikilwe pautalo lyake kuchumbila Kilisito Yesu yeatukombowe. 25 Nguluvi akamuhechile Yesu neke kwa danda lyake aveche ng'asi lya kuvahechela vanu sambi chawo kwa kumudikila Yesu Kilisito. Nguluvi akagitile ndeni kuwonesa kuva mwene ndi msanzi. Kwakuva dahila Nguluvi akali ngita seilola sambi chao. 26 Akagitile ndeni neke awonese usanzi vake muchipindi cha nondee kwa kuvagita vanu vaveche vasanzi pautalo lyake kwa kumdikila Yesu Kilisito.

27 Suwe, tuwesa kwidumbila liki? Hamu! Wuli, kwakuva lya kukolela Malagilicho? Hamu! Ila kwa kumdikila Yesu. 28 Nguluvi akuvagita vanu vadikilwe pautalo lyake kwa kumdikila mwene hela. Sekwakuva lya kukolela Malagilicho. 29 Wuli, mwihocha kuva Nguluvi ndi Nguluvi va Vayawudi hela? Awu, wuli, mwene se Nguluvi va vanu se Vayawudi ndeni ndeni? Ndakyene, mwene ndi Nguluvi va Vayawudi na vanu se Vayawudi ndeni ndeni. 30 Nguluvi yumwi hela na kuvagita avo vevadumuwe bina vadikilwe pautalo lyake kwa kudikila, ndeni ndeni akuvagita avo se vadumuwe bina vadikilwe pautalo lyake kwa kudikila. 31 Wuli, tukugalambula malagilicho kwa ludikilo ulu? Hamu! Sendeni ila tukolela malagilicho.