1 Kukali na munu yumwi ukoya Kaisalia yeakemelwa Kolineli, kilongochi va lipinga lya vapuga miya yimwi, lipinga lyelikemelwe, "Lipinga lya Italia." 2 Mwene pamwi na kaye lyake vakali vekumfunya Nguluvi, akali ekuvatanga vahangala na kumsuka Nguluvi figono fyonda. 3 Kigono kimwi saa tisa pamunyi, Nguluvi akamwonise wachiwachi, ndumindumi va kuluhano kwa Nguluvi akamwachie na kumlongela, "Kolineli!"

4 Kolineli akamuhulutulile meho kwa wogofi akahuchile, "Kuna liki Mtwa?"

Ndumindumi va kuluhano va Nguluvi akamhigile, "Nguluvi apulike masuko gyako na usembe vako kwa vahangala, chivechile luwuwiko lya kumhechela Mtwa. 5 Nondee valagiliche vanu vahele Yopa vakamkemele munu yumwi litawa lyake Simoni, kwa litawa lingi Peteli. 6 Mwene nde mgenji mukaye mwa Simoni mgelanicha va finu fya ngwembe kaye igehe pepi na inyanza." 7 Yula ndumindumi va kuluhano kwa Nguluvi pealongile gala akahegile, Kolineli akavakemela vanyigendwa vake vavili na mpuga yumwi yemdikie Nguluvi yeakali ekumdima Kolineli. 8 Akavalongie njowo chonda chechihumie, akavalagiliche vahele ku mwani va Yopa.

9 Kilau lyake ngita saa sita pamunyi vala vanu vadatu vakali mulugendo kuhelela ku mwani Yopa, Peteli akakang'ie pakyanya lya kaye kumsuka Nguluvi. 10 Akawene njala hilo, akasakile kuliya, pevagehe kuteleka kyakula, Nguluvi akamwonise kinu. 11 Akawene luhano chidinduliwe na kinu ngita limwenda likomi likwika panyi ikiva ihopilwe na lulegei mulupembo chake chitai. 12 Mugati lyake kukali na vang'oko: vang'oko vevali na magulu mitai na vang'oko vevikwava na fidege fyonda fefiguluka. 13 Baho akampulike Nguluvi akimlongela, "Peteli lamke na hinje, uliye." 14 Peteli akahigile, "Hamu, Mtwa sendiwesa kuliya kinu kinjanganifu na kyekikanilwe na Nguluvi."

15 Lichwi ikamwachile kangi ikamlongie, "Bihile kufikemela finjanganifu kuliya finu ambafyo Nguluvi afigitile filiwe." 16 Njowo ichi chikahumile mala chidatu, pambele wula mwenda ukapyulwiswe kuluhano. 17 Peteli peakali adudwive kila ambakyo Nguluvi akali amwonisea mana liki, vala vanu vevalagilichwe na Kolineli, pevaichele kaye lya Simoni, vakafikile na kukwima pamlyangilo. 18 Vakakemela na kuwucha, vakalongile, "Wuli kugehe na mgenji yeikemelwa Simoni yeichelwa kwa litawa lya Peteli, akwikala mumu?"

19 Peteli peave ihocha gala geawoniswe na Nguluvi, bahobaho Muhe va Nguluvi akamlongie, "Peteli! Pono baha kugehe na vanu vadatu vekusaka. 20 Wime na ukwike kisato kukyanya lya kaye na uwelele navo, bihile kwiwucha wucha kwakuva ndivalagiliche." 21 Peteli akakwikile panyi, akavalongie vanu avo, "Yekumusaka nene baha. Mwachile kugitila liki?" 22 Vala vanu vakamhigile, "Tulagichwe na mkomi va vapuga miya yeakemeliwe Kolineli yemunu mnofu yeakumdikila Nguluvi na kuginywa na Vayawudi vonda. Mwene alongilwe na Ndumindumi Mng'alile akukemele kukaye lyake neke apulike kyokyonda kyekumlongela." 23 Peteli akavawanuke vanu avo vaingile mugati.

Pamilau lyake Peteli akavangile lugendo pamwi navo na vamonga vevemdikie Yesu va ukoya Yopa vakalongochine nave. 24 Kilau lyake vakafikile ku Kaisalia. Kolineli akali akuvachindila pamwi na lukolo na vaganja yeavakemele. 25 Peteli peakali kwingila, Kolineli akahumile kwivala akahele kumwanuka, akafugamile pautalo lyake na kugundama mbaka panyi. 26 Ila Peteli akamnamule, akamlongie, "Wime, nene munu hela ngita veve." 27 Peteli akaendeliye kuywanga na Kolineli kuno vekwingila mugati na akavawene vanu volofu vekekung'ese. 28 Peteli akavalongie, "Nyenye mwichela kuva Vayawudi vakanilwe na Malagilicho lya dini lyawo, kukala na munu va inyi yingi awu kutangana. Ila Nguluvi anichelise ndibihile kumukemela munu yeyonda kuva seidikilwa na Nguluvi awu mnjanangifu. 29 Kwa ifyo, pemunikemelie sendikanile kwacha. Suwe ndikuvahucha, wuli mnikemelie?" 30 Koloneli akahigile, "Ngita figono fitai fyefichumbile, muda ngita ugu saa tisa pamunyi, ndikali kufunya mukyumba kyangu, bahobaho munu yeafwalile myenda mivalafu pee, akaimile palutalo lyangu. 31 Akalongie, Koloneli, kufunya kwako na usembe vako chehumiche kwa vahangala chidikilwe na Nguluvi. 32 Valagiliche vanu ku mwani va Yopa akamukemele munu yumwi akemeliwe Simoni, kwa litawa lingi ikemelwa Peteli, agehe mukaye mwa Simoni yeigelanicha finu fya ngwembe, yikala pepi na inyanza. 33 Bahobaho ndivalagiche vanu kwa veve, nave ugitile unofu kwacha. Suwe nefwe vonda tugehe kulutalo lwa Nguluvi kugapulika gyonda Mtwa gyeakuswitiche wache kutulongela."

34 Baho Peteli akavangile kulonga, "Ndakyene Nguluvi ihela umwilila. 35 Munu va inyi lyolyonda yeakumwidikila Nguluvi na kugita gegali manofu, daidikilwa na mwene. 36 Nyenye mwichela kuva Nguluvi avalagiche vanu vake, kuvadalikila vanu Vaisilaeli Njowo Nofu kuva vapate utengamaso kwa kuchumbila Yesu Kilisito. 37 Nyenye mwichela njowo chechihumie ku inyi lyonda lya Yudea kuvangila ku Galilaya Yohani peamalile kuvadalikila vanu unanzi vake va ubatiso. 38 Mwichela fila Nguluvi peamuhagule Yesu va Nasaleti, kwa kumgavila Muhe va Nguluvi na umwimike. Mwene akahele kuno na kuno akigita manofu na kuvananicha vanu vevakali vagudiswe na Setani, kwakuva Nguluvi akali pamwi nave. 39 Nefwe ndi vanu yetulolile kwa meho gyetu njowo chonda yeagitile ku inyi lya Vayawudi na ku Yelusalemu. Vakamdochile kwa kumkong'olela mukipindilihicho. 40 Ila Nguluvi amchulubuche kigono kya udatu, akamgita awonike, 41 Seawonike kwa vanu wonda, ila kwa nefwe tuhaguliwe na Nguluvi kuva vanu vetulolile kwa meho gyetu, yetulie na kunyuwa nave peachulubuke kwa mwene. 42 Yeatuswitiliche kudalika Njowo Nofu kwa vanu vonda na kulandulicha kuva mwene nde yeahaguliwe na Nguluvi aveche mswitilicha vavali wumi na vevafuwe. 43 Vavichi vonda va Nguluvi vakaywangile njowo chake kuva kila munu daikumwidikia ambonilwa lusungu sambi chake chonda kwa litawa lyake."

44 Chipindi Peteli peave iywanga njowo icho, Muhe va Nguluvi akavakwikile vanu vonda vevakali vipulika njowo icho. 45 Vala Vayawudi vevadikie, vevaachile pamwi na Peteli kuhuma Yopa vakadudwive kulola kuva Nguluvi avakavile fupo lya Muhe va Nguluvi vanu seva Vayawudi, 46 kwakuva vekavapulike vakilonga kwa luga yingi, vakimnjuma Nguluvi. Baho Peteli akalongie, 47 "Vanu ava vamwanuke Muhe va Nguluvi ngita nefwe petumwanuke. Ani yeiwesa kuvakanila vanu ava vabihile kubatiswa kwa malenga?" 48 Kwaifyo, akaswitiliche vabatiswe kwa litawa lya Yesu kilisito. Baho vakamsuka Peteli asigale navo kwa figono fidodo.