Reino dos céus

Tdadi Jou Lahatalla ni smatna, tina ni haragana foloi mali ahai be

44 Yesuse nu hawe, "Gabe ite tderera Jou Lahatalla bo tdadi I ni smat, tina ni haragana foloi mali ahai be. Tina fatailo laisa andeande tae: en arata ta mulona mamagalna gaole, ta mnu to rgogan mali rakrakca lolo mali bet i. Wol pusana, en smat isa nduk arata ta mulona mamagal tina, ga i npuco nmbang re nyinyen. Smat cia nccangnangna gaole gabe i nwage farumi ta i nina, taga npake tiwi tina n’gon bet ta ni arata ta rpucona bo tina ndadi i ni."

45 Yesuse nu hawe, "Gabe ite bo tdadi Jou Lahatalla ni smat ta I bo nkawasa ndadi Kolano, tina ma fatailo laisa andeande tae: En smat isa nfawage niyawa mutiara ta mafia fare mulona mamagal bo n’gon. 46 Bahngana, i nduk mutiara isa nmafia fare mulona mamagal. Gabe i nwage farumi ni okosesi tina, taga ni tiwina npake n’gona mutiara ta mulona mamagal cia."

Andeande silu ningale wol de wol nbang i ga lal smat ta rderera Jou Lahatallana

31 Gabe Yesuse nafetngo si carita isa. I nu, "Jou Lahatalla Nkawasa ndadi Kolano mulain mali smatna ese be, ga wol de wol nbang i ga lal, tina fatailo laisa tatanaman ta peona nenena, smatna jal taga rtiwa mali betna. 32 Ga tatanamane peo tina nenenana gaole, gabe laisa ntube to, i ndadi tatanaman ta mamagal molang mali farumi tatanamane nesana mali bet lilewingca, denabe i ndadi ohlo aisa, gabe manina rlafo ga rpei fafual mali ni magalna."

33 Yesuse nafetngo si hawe andeande ta nesana laitane, "Jou Lahatalla Nkawasa ndadi Kolano mali ni smatna, mulain mali smatna ese be, ga wol de wol nbang i ga lal. Tina fatailo laisa ragi ta maping isa nyal taga nfulta re tirigu liter yafafat. Ragi tina npei denabe roti tina ndawilega lal."

Andeande i na ntub mali gandumna fapaluan

24 Ga Yesuse nafetang hawe andeande isa lali smat laloca, I nu, "Jou Lahatalla Nkawasa ndadi Kolano mali ni smatna, tina ni rupana laisa andeande tae: Smat isa npei bet, ncake gei gandumna mafia mali na betna. 25 Orasna doram gabe farumi smatna damtuli ga damtoal, smat ta na betca ni musuna rlafo. Ga musu tina rcake gei i na mali gelgelto gei gandum ta mafiana. Fola tina musu tasa rfanci. 26 Gabe oras ta gei tina ntub piyona mulaine ncapang, i nama ntub farerer re gei gandumna. 27 Oras smat ta na betca ni smat karajanna dem i tina, si rfan lali ga du laitane, ‘Tuan, ame kto tuane msake be gei ta mafia mali betna. Ga oras tae, mfalaisa ga denabe i na enna?’

28 Smat ta na betca nua si, ‘Tina nik musuna ta rpei.’

Ga i ni smat karajanna rfautno i hawe, ‘Tuan, mailow ame bo kfan lalei beti bo ksibit i tina.’

29 Ga smat ta na betca ncanglo, ‘Matina! Ningalena ga laisa mew fsibit i tina, osta gandumna ma marasibit. 30 Gabe ta mafiana, inanai to gandum tina ntub farerer re i na denabe ni oras ta bo tfakatina. Lomanta Ya bo isula smat ta rfakatina rfayalo ntuba su i na taga rpitan isa-isa, taga rtaping. Fola tina, taga si rfayalo gandum tina taga dising mali gagaona.’ "

I ta ntub mali gandumna fapaluan ni ngale

36 Fola tina, Yesuse nfateam smat ta lalna taga nlolai lali ebai i. Mana I ni muritna rlafo ga du, "Guru, co mfabinga am andeande i ta ntub mali gandumna fapaluan ningalena."

37 Gabe Yesuse nua si, "Smat ta ncake gei gandum ta mafia, cia Smat ta mali sorogaica. 38 Gabe bet cia, fatailo laisa re dunia tae. Taga gei ta mafiana, fatailo laisa smat ta Jou Lahatalla Nkawasa ndadi Kolano mali sili. Ga en bena i cia, laisa smat ta rderera setane ni kolanoca. 39 Ga musu ta rcake gei i tina, setanna. Fare oras ta bo fakatina, wol kiamat, wol ta Jou Lahatalla bo nadili farumi smat. Gabe smat ta rfakati tina, tina malaikat ta rduri mali sorogai.

40 Gabe, laisa i ta smatna rcibit taga rtopa lali yapca, laina bena ta bo ndadi i mali wol kiamatcana. 41 Oras tina, Smat ta mali sorogaica bo ncula ni malaikatna. Si bo rfayalo smat ta rpei smate nesana rdadi rbaradosa fare smat ta rpei okosesi ta mayaina, fare bo rfasaksake si mali Jou Lahatalla ni smatna ta I Nkawasa ndadi Kolano mali si ta rdela Ina. 42 Ga malaikat tina bo rtopa smatna lali yap ta nmat-mat paca. Mana si osta rtangis denabe fmorina kikik ningalena rkangelana gaole. 43 Ga smat ta rpei ta molang mali Jou Lahatalla nbona, si osta rcung mali gagaw ta si Fmarica nkawasa ndadi Kolano ga si daplangan laisa wolca. Gabe, flonga tina famafia fare fising mali wlomew!"

Smat ta mayai fare smat ta rpei okosesi ta mafiana bo rfasaksake si mali wol kiamat

47 Yesuse nu hawe, "Jou Lahatalla bo nkawasa ndadi Kolano mali I ni smatna, tina bisa tfasama re andeande tae hawe: en smat diranca rtopa labang mali talagaca si rduk iyanna rupa lalo i. 48 Riri labangca nbakbake to, si rdas labangca taga duti mali talagaca lapo. Fola tina si rtotolang taga rfisang iyan ta mafia fare iyan ta mayaina. Ta mafiana dising mali karanjangna, ta mayaina rtopa. 49 Laina bena ta bo ndadi i mali wol kiamatcana. Oras cia malaikatna bo rlafo rfara smat ta rmayaina mali smat ta jaga rpei ta molang mali Jou Lahatalla nbona. 50 Fare malaikatna bo rtopa smat ta wlorina mayaina lali yap ta nmat matpaca. Pulina si rtangis denabe fmorina kikik ningale si rkangelana gaole."

3 "Rcangnange to smat ta riri re rari pa mali Jou Lahatalla nbona,

ningalena si tina to ta rdadi Jou Lahatalla ni smat ta I bo nkawasa ndadi Kolano.

4 Rcangnange to smat ta wlorina nmagogoru i,

ningalena Jou Lahatalla osta npei wlorina sangnang.

5 Rcangnange to smat ta wlorina gagalum fare rfanenena si,

ningalena Jou Lahatalla osta npo dunia tae lali sili.

6 Rcangnange to smat ta rlokolo rpei be okosesi ta mafia,

ningalena Jou Lahatalla osta nfasangnang si.

7 Rcangnange to smat ta rfaeme riri masiena lali smate nesanana,

ningalena Jou Lahatalla osta nfaem I ni masiena lali sili.

8 Rcangnange to smat ta wlorina mafia mali Jou Lahatalla nbona,

ningalena si osta dem Jou Lahatalla.

9 Rcangnange to smat ta rfamafio smate nesa ta rfatotolena,

ningalena Jou Lahatalla osta nu tina I ntu si.

10 Rcangnange to smat ta rduk kangelana ningalena rpei be okosesi ta mafia,

ga si tina to ta bo rdadi Jou Lahatalla ni smat ta I bo nkawasa ndadi Kolano.

11 Fsangnange to ningalena mew fderera Ya,

smatna osta riri le mew,

rfakangela mew, fare en ta rfamayai ngahnyo mewna.

12 Fsangnang fare fsenga to, ningalena Jou Lahatalla nfasiape namew sagige mulona mamagal mali soroga i.

Ningalena, nabi ta ntubanama rduk kangela laisa ta mewe fduk tane."

Ise ta nmamagal molang

1 Oras tina, Yesuse ni muritna rlafo I, ga rfautan, "Guru, gabe laisa Jou Lahatalla Nkawasa ndadi Kolano, ise mali Jou Lahatalla ni smat ta bo ndadi smat mamagal?"

2 Rlonga tina, Yesuse nololaw wai nenena isa taga nfaosal i mali si fapaluanna. 3 Fare nua si, "Flolam famafia ta Ya bo ikua mew tane, gabe laisa mew fiwane nimew tubca pa ndadi laisa wai nenena ta ncombong pa tae, mew osta fdadi Jou Lahatalla ni smate mew pa gabe I nkawasa ndadi Kolano ya. 4 Gabe, ise ta nanggape ni dirica biasa be laisa wai nene tae, i cia to ta Jou Lahatalla nanggap i nmamagal mali Jou Lahatalla ni smatna ta I bo Nkawasa ndadi Kolano.

14 Gabe Yesuse nua ni murit tina, "Inanai to wai nena tane rlafo mali Ya i. Mati ftolea si na. Wai nenena tane rcombong pa fare jampa be rdela famafia. Si tina ta rpo riri dirica lali Jou Lahatalla i bo I nkawasa ndadi Kolano mali riri tubca."

23 Fola tina, Yesuse nua ni muritna, "Flolam famafia ta Ya ikuwa mewna, ncusa ina gaole smat ta rkayangna riri dirica bo rpo Jou Lahatalla Nkawasa ndadi Kolano mali riri tubcana. 24 Fare mew flolam hawe ta Ya iku tane, mafia sube unta isa ncung paplaki mtana ga ta ncusa i foloina smat ta ni re na ga bo npo ni dirica bo Jou Lahatalla Nkawasa mali i ni tubca."

25 Rlonga tina, Yesuse ni muritna rherang. Gabe si du, "Gabe laina, ise ta bo ncalamatca?"

26 Yesuse natngalo si taga nu, "Smatna bisa pa bo rfasalamate si riri dirica tutulingna. Ga Jou Lahatalla be ta bisa nfasalamate smatna, ga bo Jou Lahatalla ahai be bisa ndadi i."

Smatna farumi pa bo rdai Jou Lahatalla ni smatna

21 Yesuse nu hawe, "Farumi smat pa ta dololaw Ya, ‘Jou, Jou’ bo rdai Ya nike smatna ga Jou Lahatalla bo nkawasa ndadi Kolano mali riri tubca, ga smat ta jaga rpei Ya nik Apa ta mali sorogaica nimauna be.

19 Gabe tina, ise ta ncapial fatfato isa be, biarega nenena molang, taga nfafcule smate nesana rderera laisa i, i cia bo ndadi smat ta riri ngale pa mali Jou Lahatalla ni smat ta I bo nkawasa ndadi Kolano. Ga ise ta nderera ndumi fatfato tina taga nfafcule smate nesana bo smatna rderera laisa i, i cia bo ndadi smat ta ningalena mamagal mali Jou Lahatalla ni smat ta I bo nkawasa ndadi Kolano. 20 Gabe, flonga famafia ta Ya bo iku tane. Guru agama Yahudi ta rto Musa ni kitab silim tasa fare smat Yahudi ta rderera fatfato Farisi, si du rderera Jou Lahatalla ni fatfatona, naga si rpei pa ta mafia mali Jou Lahatalla nbona. Ga mew tane nane fpei ta mafia mali Jou Lahatalla nbona gabe laisa failow fdadi Jou Lahatalla ni smate mew ta I bo nkawasa ndadi Kolano mali nimew tubca."

9 Gabe, laisa mew bo fsombayang, fsombayangna laitane,

‘Animam Apa ta Aw mali soroga i,

farumi kfamamagal Apa.

10 Ame kdor Apa mlafo bo mkawasa mdadi Kolano mali nimam tub tae.

Biarega farumi ta Apa mailowna ndadi i mali dunia tae, laisa re ta ndadi i mali soroga i.

Yohanes ta nfasisopca ncula smatna diwane wlorina bo rsiap rderera Jou

1 En smat isa ngahnyo Yohanes, i jaga ncisope smat. Bahngana, i nfan lali batang Yudea mali padang gurun, gagaw isa ta namliley. Mana, i jaga nfabinga Jou Lahatalla ni fatnaw lali smatna. I nu, 2 "Fiwane wlomewna to bo fderera Jou Lahatalla, ningalena mnu panto Jou Lahatalla bo nkawasa ndadi Kolano mali smat ta rdela I na."

17 Oras mali Kapernaumna, Yesuse mulaine nfabinga Jou Lahatalla ni fatnaw lali smatna, "Fiwane wlomewna to bo fderera Jou Lahatalla, ningalena mnu panto Jou Lahatalla bo nkawasa ndadi Kolano mali smat ta rdela I na!"

7 Gabe mew fane fabinga si laitane, ‘Mnu panto, Jou Lahatalla osta Nkawasa ndadi Kolano mali smat ta rdela Ina’.

11 Flolam e, osta smatna lal ga smat Yahudi pa mali farumi gagaw mali dunia tae, mali po lao denabe po leo, si farumi bo rdadi Jou Lahatalla ni smat, fare si rtotolang rceli farerer re Abraham, Ishak fare Yakub mali Jou Lahatalla gagaoca ta I bo nkawasa ndadi Kolano.

11 Yesuse nu hawe, "Flolam famafia e, mali farumi smat ta mapingna rdadikna si mali dunia tae, isa pa ta nfoloi mali Yohanes ta nfasisopca. Ga oras tae, ise be, biarega smatca ningale pa, gabe laisa Jou Lahatalla Nkawasa ndadi Kolano mali i ni tubca, smat cia ta nfoloi mali Yohanes i. 12 Mulain mali Yohanes ta nfasisopca nlafo denabe oras tae, en smat ta wlorina mayai rfakotale re smat diranca ta rdadi Jou Lahatalla ni smat si tona bo si mati rdela Jou Lahatallana to, fare si le ma rmario bo rkawasa smat tina.

Yesuse nfafcule mfalaisa bo tising aratana

32 Yesuse nu hawe, "Mew ta fderera Yana falal pa, fatailo laisa domba gagaw isa. Ga makse laina mew mati famcaitna! Ningalena nimew Apaca ncangnangna gaole mew bo farerer re I fkawasa laisa Kolanona.