1 Fola tina, Yesuse ncapang mali Ebai Sombayang Mamagalca. Oras tina, I ni muritna rdahle i taga rfaemo i Ebai Sombayang Mamagalca ni gedung-gedung ta mafiana. 2 Gabe Yesuse nua si, "Mewe fem gedung-gedung tina to? Flonga famafia e, lomanta ni orasna farumi tina osta mjakam, fare patna osta pusa bere enpa ta bo en mali gagaonana."

3 Fola tina, Yesuse nfan lali popo Zaitun taga ntotolang mana. I ni muritna rdahle I bo si re I be rmautingna. Si du, "Guru, mfabinga ame to, opfis ta Guru mu nana i tina bo ndadi ina? Fare ni fafayalna ahai gabe laisa Guru bo mlafo hawe, fare fafayal wol kiamatna mfalaisa e?"

4 Yesuse nua si, "Matina denabe dakale mew. 5 Ningalena smatna lal osta rlafo rpake Ya ngahnyokna, fare si du laitane, ‘Ya tane to Mesias, kolano ta Jou Lahatalla njaji bo nfasalamate smatna!’ Ga si tina dakal be smat ta lalna rderera si. 6 Mew osta flonga parang mali batang isa penepa mali gagawe nesa. Biarega laina, mewe mati famcaitna. Farumi nane ndadi i, ga tina ni oras paube dunia tae bo nkiamatna. 7 Lomanta fola suku re sukuna osta rfaparang, fare kerajaan isa nfaparang re kerajaan ta nesana. Fare osta en hawe smatna rmata an fare sui manca-manca. 8 Ga farumi tina taga ni kangelana wol kiamatca paube, tina laisa re kangela ta mapingna rbasam oras ta nturina bo ntub. 9 Ga oras cia, smat ta rdela pana bo rwagfo mew, taga rfakangela mew fare rpun famate mew. Gabe smat mali farumi suku osta riri le mew ningalena mewe fderera Ya. 10 Fare, smat lalo ta rdela Yana osta rdela Ya panto hawe. Si osta rfaututna mayai, fare rpo riri delna bo rfakangela si. 11 Lomanta smatna rlafona lal taga du, si tina nabi ta rfalafo Jou Lahatalla ni fatnaw. Tina si dakal be bo smat ta lalna rderera si. 12 Gabe smat ta rpei okosesi ta mayaina nbang i ga lal, gabe tina smatna lal osta rgogoru smate nesana panto. 13 Ga smat ta rdela Ya turusna denabe riri tubca morco, Jou Lahatalla bo nfasalamat si. 14 Ga lomanta Abar Mafia ga Jou Lahatalla bo nkawasa ndadi Kolano mali ni smatna, Abar mafia tane osta smatna rfabinga mali farumi suku, fola tina taga kiamat."

15 Yesuse nu hawe, "Lomanta smat isa nmakotalena gaole lali Jou Lahatalla i bo nlafo. Smat cia bo nosal mali gagaw ta Jou Lahatalla nlafo ni smat pumul Ebai Sombayang Mamagalca, laisa ta Jou Lahatalla nua nabi Daniel popise i na. (Ise ta nbaca tane, tarokira famafia bo bisa ftaife ningalena.) 16 Gabe laisa smat ta nmakotaleca nosal mana to, smat ta en mali batang Yudeana, ta mafiana rfarera bo fgogane mew mali lolasna. 17 Smat ta si puis ebai popo, mati fduri bo fyal okosesi mali ebai lolona, ga fduri bo ffarera to. 18 Laina bena re smat ta mali betina, mati flolai mali ebai i bo fyal pakena. 19 Ta kangela molang oras ciana, maping ta riri badanna fare maping ta nturina rcus subena. 20 Fsombayange to, bo oras ta mew farumi fpiaya bo fgogane mew mali lolas ina, mati faduduk re ulanna fare feta wol Sabat pa, wol ta smat agama Yahudina bisa rkarajan pa. 21 Ningalena, wol tina kangelana gaole, ta kangela foloina mali farumi ta smatna rbasamna. Mulain mali ta po be Jou Lahatalla npei dunia tae denabe oras tae, enpa nto kangela ta bo ndadi laisa tina hawena, fare tina osta ndadi i panto. 22 Gabe, laisa Jou Lahatalla nfakokope wol kangela tina pa, farumi smatna osta rmat. Ga I n'gogoru smat ta I nfisange tona, I nfakokope wol kangela tina. 23 Oras tina, gabe laisa en smatna du mew, ‘Co fem! Mesias I mantane!’ Penepa si du, ‘Mesiase I pulina!’ Mewe mati fdelana ahai ta si du na. 24 Ningalena smatna osta rlafona lal taga du si Mesias, penepa du si nabi ta rfalafo Jou Lahatalla ni fatnaw. Fare si le ma rpei mujizat fare fafayal ta nfaeme riri kawasana cicoal. Fare, osta rdarawa smat ta Jou Lahatalla nfisang si tona, bo mati rderera Jouna, ga rderera be si. 25 Gabe flolam famafia e, farumi tane Ya ikuwa mewe ntuba to ga tina ndadi i paube.

26 Gabe laisa en smatna dua mew, ‘Co fem, Mesiase I mali padang gurun,’ mati mew lalina. Gabe laisa en ta du, ‘Co fem, Mesias I mali gagaw ta isa ntopana,’ tina ma mewe mati fdelana. 27 Gabe oras Smat ta mali sorogaica nlafo hawe, farumi smat ta mali dunia tae bisa dem. Tina fatailo laisa lemlemna ta ncapang mali wolca nca denabe wolca ncop. 28 Fatailo laisa aiwani isa nmat mali gagaw isa, farumi smatna ndadi rto ningale manina osta rfayalo si dan aiwani ta nmatca."

29 Yesuse nu hawe, "Laina wol ta nkangelaca nfola to, wolca osta ndadi ndororam, fare ngaca plangno panto. Ototafna osta marapawil mali langitca, fare farumi ta en mali langitcana ndadi laisa tantuba panto. 30 Fare oras tina to, osta en fafayal mali langitca bo tto Smat ta mali sorogaica bo nlafo hawe. Dem tina, farumi suku mali bumi taena ndadi damcait fare rtangis. Si farumi osta dem Smat ta mali sorogaica nlafo puis metna langitca fare farumi kawasa fare planganna mamagal. 31 Fare trompetca osta liona mamagalna gaole, gabe Smat ta mali sorogaica ncula ni malaikatna rcapange bo rfayalo farumi I ni smat ta I nfisang mali farumi gagaw mali dunia tae, mali cicapo denabe cicapo."

32 Yesuse nu andeande isa laitane, "Mewe nane fbalajar mali ai ara tae. Gabe laisa ni magal nenena mulaine ntipa i tina, mew fto wolwolna bo mnu panto. 33 Laina bena gabe laisa mew fem wol ta kangelana ta Ya ku tina mulaine ndadi i, mewe ndadi fto, mnu panto Smat ta mali sorogaica bo nlafo hawe. 34 Flonga famafia ta Ya ikua mew tane, smat ta rtub oras taena, en ta rtub sube denabe farumi tina ndadi i. 35 Langit fare bumi tae bo mnyei, ga Ya nik mautingna osta menyei pa denabe lali."

36 Yesuse nu hawe, "Smatna isa pa ta nto oras laisa Smat ta mali sorogaica bo nlafo hawena. Malaikat ta mali sorogaina rto pa, ga Apa ta mali sorogaica be ta ntona. 37 Gabe laisa Smat ta mali sorogaica nlafo hawe, tina laisa re oras ta jaman nabi Nuh popise ina. 38 Oras tina, smatna rto pa ipis mamagalca bo nlafona, gabe si rtubna biasa be, si rceli re rdom biasa be, fare si rfasawna biasa be. Si riri tubca laina be denabe nabi Nuh ncung mali kapal mamagalca. 39 Ga smat tina rto pa ipis mamagalca bo nlafona. Lomanta si damduri to taga rto, si bo rbodito. Laisa re tina bena, osta smatna rciap pa oras Smat ta mali sorogaica nlafo hawena. 40 Lomanta mali oras cia, gabe en man silu rkarajan mali beti, isaca Jou Lahatalla bo nlange i, taga isa bo nfateam i. 41 Ga oras cia bena, gabe laisa en maping silu rtok gandum, ta isa ica Jou Lahatalla bo nlange i taga isaca bo nfateam i.

42 Gabe tina, fjagjaga to, ningalena mewe fto pa opfis nimew Jouca bo nlafona. 43 Ga mewe ma nane flolam famafia andeande isa tae: Gabe laisa ebai ppuca nto to opfise smat ta rmaloisna bo rlois mali i ni ebai ciana, i osta nailow pa bo namtulina i njagjaga bo smat ta rloisna bisa rcung pa mali i ni ebai ciana. 44 Laina bena re mew, mew nane fsiap turus, ningalena Smat ta mali sorogaica osta nlafo hawe ni orasna mew fto pa."

45 Yesuse nu hawe, "Gabe laisa en smat karajan ta npande fare nmanahan, i ni tuanca nlange i ndadi ta nfaboboko bo nfatube smat karajan ta nesana gabe laisa ni orasna nlafo i. 46 Smat karajan cia osta rcangnang gabe laisa ni tuanca nlafo, ncuna i npei ni karajan tina famafia. 47 Flonga famafia ta Ya iku tane, ni tuanca osta nlange i taga npo i kawasa bo njaga farumi tuanca ni okosesina.

48 Ga laisa smat karajanca wlona mayai, i osta nu mali wlona laitane, 49 ‘Ya nik tuanca nuwena mnu sube.’ Taga i nmulaine npune smat karajan ta nesana, taga nceli re ndom farerer re smat ta nmon sina. 50 Ga lomanta mali wol ta i nto pana, fare mali oras ta i nto pana, garayanna i ni tuanca nuwe. 51 Gabe ni tuanca nfasal i re salsal ta tebteb. I nduk salna nmat. Gabe i nduk salsal laisa smat ta rmadarawana. Mana, si bo rtangis turus denabe fmorina kikik ningalena rbasamna kangelana gaole."