1 Oras tina, Yesuse ni muritna rlafo I, ga rfautan, "Guru, gabe laisa Jou Lahatalla Nkawasa ndadi Kolano, ise mali Jou Lahatalla ni smat ta bo ndadi smat mamagal?"

2 Rlonga tina, Yesuse nololaw wai nenena isa taga nfaosal i mali si fapaluanna. 3 Fare nua si, "Flolam famafia ta Ya bo ikua mew tane, gabe laisa mew fiwane nimew tubca pa ndadi laisa wai nenena ta ncombong pa tae, mew osta fdadi Jou Lahatalla ni smate mew pa gabe I nkawasa ndadi Kolano ya. 4 Gabe, ise ta nanggape ni dirica biasa be laisa wai nene tae, i cia to ta Jou Lahatalla nanggap i nmamagal mali Jou Lahatalla ni smatna ta I bo Nkawasa ndadi Kolano. 5 Ga ise ta nailow smat ta biasa be laisa re wai nene tae ga smat cia ndela Ya, tina ni ngalena i nailow Ya."

6 Yesuse nu hawe, "Gabe en smat ta rpei smat ta biasa be laisa re wai nene tae rdadi rbaradosa denabe rdela Ya pa, ta mafiana tpitane smat cia waoca, taga tcagta pat mamagal fapusa mali i ina taga tfaduri i po law olatca. 7 Fkapalange to mew smat ta mali dunia taena, ningalena okosesina lal ta fpei denabe smatna rpei dosa ga rdela panto hawe. Ga okosesi tina osta bo en, ga fkapalange to smat ta rpei denabe smate nesana rdadi laina.

8 Gabe laisa kakamo mewna fare fico mewna ta npei gabe fbaradosa denabe fdela panto, fkati bo ftopa to tina. Ta mafiana mew fsung sorogana kakamo mewna pao be fare fico mewna ma pao be, biare ga fico mewna fare kakamo mewna ntotim ga rtopa mew lali naraka ta ni yapca nmat-mat pa. 9 Ga mta mew pao ta npei gabe mew fbaradosa denabe fdela panto, flebate bo ftopa mta mew tina. Ta mafiana mew fsung soroga re mtamew pao be, biare ga ntotim ga rtopa mew lali narakaca."

10 Yesuse nu hawe, "Flolam famafia, smat ta biasa laisa wai nenena tae, mdel pa bo fu i smat ta ni ngale pa. Smat tae en ni malaikat ta i re Jou Lahatalla mali soroga i. [11 Ga Smat ta mali sorogaica nlafo mali dunia tae bo nfasalamate smat ta rbaradosana.]"

12 Yesuse nu hawe, "Mewe fikir andeande tae su. En smat isa ni dombana slubisa, ga isaca namnyangis. Ga smat cia bo npesa e? I osta nfateam domba yafaisiwe re isiwe tina mali lolase ppuna, taga i nfane niyawa domba isa ta namnyangisca. 13 Laina i nduk domba isa ta namnyangis cia, i ncangnangna gaole. Ya ikuwa mew e, i ni sangnang tina mamagalna foloi mali i ni sangnang mali domba yafaisiwe re isiwe ta damnyangis pa tasa. 14 Laina bena re nimew Apa ta mali sorogaica, I nailow pa bo ntuna damnyangis mali Ina, makse isa be."

15 Gabe Yesuse nu hawe, "Gabe laisa en nimew del ta ndela npei sal mali mewi, mewe to ta nane fan lali i ina, ga smate mew luna be, taga mew fabinga ni salna. Gabe laisa i nfatuwo i ncal, tina ningalena smate mew luna famafio mewe to. 16 Gabe nimew delca nailow pa i ncal, ga mew ffan lali. Mew fpei laina ningalena rlefo mali Jou ni Kitab cana laitane, ‘Gabe en smat ta du si rpei sal, nane en smat silu penepa sitol ta rdadi saksina bo du smat cia ncal.’

17 Gabe laisa i nailow paube ahai ta si duna, fabinga to hal tina lali jamaatca. Gabe laisa jamaatca ntolea i, ga i nailow pa nlonga, tina ningalena i laisa smat ta nfayala Jou Lahatalla pa. Ga nanggapna i nbaradosa laisa re smat ta nfautno pajak ta jaga nakal be smatca.

18 Flolam e, ahai ta mew fu matina mali dunia taena, tina bena ta Jou Lahatalla nu matina. Fare ahai ta mew fpo hak mali dunia taena, tina bena ta Jou Lahatalla npo hak.

19 Ya iku mew hawe, gabe dunia tae en smat silu mali mewi wlori be pusa rcombayange rdor ahai be, ga Ya nik Apa ta mali sorogaica osta npo ahai ta si rdor tina. 20 Ningalena gabe laisa, en smat silu penepa smat sitol rfayalo si ningalena rdela Ya, mana to Ya ifarerer re si."

21 Fola tina, Petruse nlafo lali Yesus i taga nfautan, "Guru, gabe laisa ya nik del isa npei sal mali ya i, denabe faifis ya ikampung ina? Denabe faifite lae?"

22 Gabe Yesuse ncanglo i, "Laina pa! Ya ikua awe, aw nane mampung i ga faifit be pa, ga yafafitna nlolai faifit. 23 Awe nane mpei laina ningalena gabe Jou Lahatalla Nkawasa ndadi Kolano mali I ni smatna, laisa re andeande tae: en kolano isa nuruse ni smat karajan ta rpei lingan mali i ina. 24 Oras ta kolano cia nmulaine nuruse riri lingan tina, en smat karajan isa nbo kolanoca. Smat karajan cia ni linganna tiwi guracina tas lalan yafasa. 25 Ga smat karajan cia nafena panto bo npalase ni lingan tinana. Gabe tina, kolanoca ncula rwage smat karajan cia ni ngolota nturina fare farumi ta i ni na, bo bisa npalase ni linganna. 26 Nlonga tina, smat karajan cia, tina to ndor laitane, ‘Tuan kolano, folfolo ya faokoce su, mpo ya oras su, bo ya bisa ipalase nik linganna farumi.’ 27 Nlonga smat karajan cia nu laina, kolanoca nbasamna nmasie i, gabe nfabiar i, fare nfayangise ni linganna.

28 Ga oras ta smat karajan cia ncapang mana, i nfadukduk re ni del karajan isa. Ni del cia ni lingan mali ina tiwi perake slubisa, tina okoce be gabe bo laisa tfasama re i ni lingan ta mali kolanocana. Ga i nwagfo ni delca taga nafoki. I nua ni del cia, ‘Oi, mpalase to nim lingan ta mali ya ina!’ 29 Nlonga tina, i ni delca ndor, ‘Wataw, gabe laisa bisa mpo ya oras faokoce su, bo ya ipalas farumi nik lingan tina.’ 30 Ga i nailow pa, taga nfasunga ni del cia bui. I ni del cia nane npalas farumi su ni lingan tina, taga i osta ncapang mali bui ca. 31 Oras ta i ni del karajan ta nesana dem ahai ta ndadi i tina, si wlorina ncusa gabe rfane ga rfabinga lali kolanoca. 32 Rlonga tina, kolanoca ncula dololaw smat karajan cia taga nu, ‘Oi, smat karajan ta aw tane wlomna mayai! Farumi nim lingan ta mali ya ina, ya ifayangise to ningalena awe mdor ya igali aw. 33 Ga aw bena nane masie nim del cia, sama re ya imasiye awna.’ 34 Gabe kolano cia ntolea smat karajanca, kolanoca npo smat karajanca ni smat ta njaga rpune smat mali buicana bo si rfakangela i denabe i npalase ndumi ni linganna.

35 Laina bena Ya nik Apa ta mali sorogaica, gabe mew fampunge smatna, nimew Apa ta mali sorogaica nampunge mew. Gabe laisa mew fampunge smatna pa, nimew Apa ta mali sorogaica ma nampunge mew pa."