1 Oras cia, Herodes ta ndadi kolano mali Galilea, mana i nlonga smatna dafetang abar ga Yesuse. 2 Gabe i nua ni pegawaina, "Japa Yesus cia Yohanes ta nfasisop popiseica nmat ga npaling hawe! Denabe, I nafena npei mujizat tina!"

3 Kolano Herodese nu laina, ga bahngana, i ncula rwagfo Yohanes taga rpitan i re rante, taga rfasunga i bui. I npei laina ga tina poko be Herodias. I ni caritana laitane: kolano Herodes nyal Herodias taga npeo ni ngolo i. Naga, Herodiase nfasawe to re Filipus, Herodese teno tutuwo i. 4 Gabe Yohanese ntolea Herodesna lale to. I nu laitane, "Apa, apa mcapial Jou Lahatalla ni fatfatona, ningalena apa mnyal apa nim tamaica Herodias taga mpeo nim ngolo i!"

5 Oras ta Herodese nlonga laina, mali I wlona npun Yohanese bo nmat, ga i namcait smat lalo ta manana, ningalena si rto Yohanes cia nabi i ta jaga nfalafo Jou Lahatalla ni fatnaw lali smatna.

6 Bahnga laitane, oras Herodese ni umurna nbang i gabe i npei rame. Manana, Herodiase ntu mapingca nowa mali Herodes fare ni smat ta rlafona rbona. I nowa npei Herodese wlona sangnang. 7 Gabe tina, Herodese njaji denabe ncasi, bo npo ahai be ta wai cia ndorna.

8 Rlonga tina, waica hnye ncula i nfan lali Herodes i taga nu laitane, "Ya idor Yohanes ta nfasisopca bobokoca, mising i mali loyang faisa, taga mpo ya mantane!"

9 Oras ta kolano Herodes nlonga ahai ta wai maping cia ndorna, i wloyancusa. Ga i ncasi to mali wai maping cia fare smat ta rlafona rbona, fare i nfaiyo ahai be ta wai cia ndorna. 10 Gabe, Herodese ncula ni wawaina rfan lali buica bo rkati Yohanese bobokoca. 11 Taga, Heredose ni wawaina dising Yohanese bobokoca mali loyang isa taga rpoi lali wai mapingca. Taga wai mapingca npo hnye. 12 Oras ta Yohanes ta nfasisopca ni muritna rlonga Yohanese nmate to, si rlafo jale ni mayatca taga rgaile i. Fola tina, si rfane rfabinga abar tina lali Yesus i.

13 Oras ta Yesuse nlonga Yohanes ta nfasisopca nmate to, I re ni muritna rfan mana. Si rcaplo pelang asa ga rfan lali gagaw ta nalaspa mali pnu i fare namliley, bo I ntutuling puli tina. Ga orasna smat lalna rto tina, si rcapang mali riri bendarna taga rfanye ficori lali bo rfa dukduk re Yesus. 14 Oras ta Yesuse nduri mali pelang tasa, I nem smat ta lal tina, ga I nbasamna nmasie si. Gabe I nfamafia smat ta dowilna.

15 Bo malingine to, Yesuse ni muritna rlafo I taga du, "Guru, gagaw tae nalaspa mali pnu i, fare bo dorame to. Gabe ta mafiana Guru msula smat ta lal tane rfan lali pnuna bo rgon an."

16 Ga Yesuse nua ni murit tina, "Si mate rfanna. Mew ta nane fatub si."

17 Gabe muritna dua Yesus, "Guru, ta en mali amam i tane roti pilim fare iyan silu."

18 Yesuse nua si, "Fut tina to mali." 19 Fare, I ncula smat ta lalna rtotolang mali momna popo. Taga I nyal roti pilim fare iyan silu tasa. I nbo nais langitca taga ndor tarima kase lali Jou Lahatalla i. Fola tina, I nfawogwogla roti tina taga npo ni muritna. Taga ni muritna rlowto smat laloca. 20 Gabe farumi smatna rceli denabe rmosi. Fola tina, Yesuse ni muritna rfayalo ane gleona, en karanjang yafasa re pilu bakbak. 21 Ta rceli wol ciana, lalan lim smatna man bakbako, tina tetang paube maping fare wai nenenana.

22 Fola mana, Yesuse tina to ncula ni muritna rcaplo pelang asa bo rfane rtuba lali talagaca puli pao. Ga oras tina, I ncula smat laloca duwe. 23 Oras ta Yesuse ncula smat laloca duwe, I ndawil nais popoca bo ncombayang mana ntutuling. Orasna bo doram, Yesuse ntutuling sube mana. 24 Tinana, Yesuse ni muritna dalaspa nto mali talagaca fapaluan, taga latanca ncicoal nuf mali uhngori mali denabe si riri pelang tasa rngangala ndumi.

25 Lase bo sema, Yesuse nlafo si, I nfanfan puis wayaca popo. 26 Oras ta ni muritna dem ta I nfanfan puis wayaca popo, si damcaitna gaole, gabe rgigam, "Setan!"

27 Ga Yesuse nua si, "Fteng-tengan. Mati famcaitna! Tae Ya!"

28 Gabe Petruse nua I, "Guru, gabe fatutua Aw Guruca, msula ya bo ifan lali Awi Guru."

29 Gabe Yesuse nua i, "Mali to!"

Gabe, Petruse nduri mali pelang tasa, taga nfan lali Yesus i. 30 Ga oras ciana Petruse nbasamna latanca ncicoal, i ndadi namcait gabe mulaine namduri. I n'gigam lali Yesus i, "Guru, mgali ya!"

31 Gabe Yesuse fatowal be nice Petruse kakamona, taga nlange i. Yesuse nu, "Ee, aw tane mdelana uwatu pa, pesaga aw mdela fatutua pana?"

32 Fola tina si rdawil pelang tasa, latanca ma nfola. 33 Dem farumi tina, smat ta si mali pelang tasana rcuba Yesus fare du, "Guru, fatutua Aw tane Lahatalla Ntu Aw."

34 Laina Yesuse I re ni muritna rlafo mali talagaca puli pao, si rcoal mali batang Genesaret. 35 Ga oras ciana smat tamanana rfayala Yesus, si fatoal be rfabinga lali farumi gagaw mali batang ciana, Yesuse nlafo to. Rlonga tina, si dute smat ta dowilna farumi lali Yesus i. 36 Fare si rdor lali Yesus i bo I npo si oras smat ta dowilna bo dice I, biarega dice ni jubaca be. Farumi smat ta dowilna dice I na ndadi rmafia.