1 Bahnga laitane, en smat diranca mali agama Yahudi ta rderera fatfato Farisi fare guru agama Yahudi ta rto Musa ni kitab silim tasa, rfan lali Yerusalem, rlafo lali Yesus i bo rfautno I, 2 "Apa, pesaga Apa nim muritna rcapial ite ririr agamaca ni maffatonana? Ga si rcelina duase kakamorina ntuba pa laisa ta hma re bbur tantubana rfafcule itna."

3 Gabe Yesuse nua si, "Pesaga mew tutuling fcapial Jou Lahatalla ni parentana, taga fderera be hma re bbu mew ta ntubana riri fatfatona? 4 Ga Jou Lahatalla ni parentana laitane, ‘Mew nane flonga famafia hma re hnye mewna,’ fare en hawe, ‘Ise ta nmautingna ntolea i hma re hnyena, i osta nduk salna nmat.’ 5 Gabe mew fafcule smat, ahai ta si dailow rpo bo rgali si fmarica penepa hnyerica, mdel pa ta bo fgali si, ga fpei be sadaka to lali Jou Lahatalla i. 6 Mewe fafcule si laina, tina laisa re mew fu mati rgali sina hmarica penepa hnyerica. Mew fafcule ta lainana, tina mewe fderera Jou Lahatalla ni parentana pa, ga mew fderera be mew nimew fatfatona tutuling. 7 Ee mew tane, smat ta fmadarawa! Ahai ta Jou Lahatalla nua nabi Yesaya ntuba tona ga mew tina ndadi i to, laitane,

8 ‘Bangsa tae nfamamagal Ya ga mali fmori be,

ga wlorina laspa mali Ya i.

9 Ni guna pa si rfamamagal Yana,

ningale ta si rfafcule smatna ga rderera be smate ni fatfato.’ "

10 Fola tina, Yesuse nololaw smatna lal taga nua si laitane, 11 "Flonga famafia ta Ya iku tane bo mew ftaif! Ahai ta ncunge smatna fmorina, tina osta npei smatna rbaradosa pa mali Jou Lahatalla ina. Ga ahai ta ncapang mali smatna fmorina, tina ta npei denabe smatna ndadi nbaradosa mali Jou Lahatalla i."

12 Fola tina, Yesuse ni muritna rlafo I, ga si rfautan laitane, "Guru, Guru mto pare mto pa, ta Guru mu nana ina tina npei smat ta rderera fatfato farisi na rmarasa si?"

13 Ga Yesuse nua si laitane, "Smat ta rfafcule fatfato ta rderera Ya nik Apa ta mali sorogaica ni mauna pa, tina fatailo laisa re farumi tatanaman ta i ntiwa i pa ga ntub tutuling, ga tatanaman tina osta rcibit denabe ni wana. 14 Gabe mew ffabiar si beto smat Farisi tina. Ga si tina fatailo laisa smat ta dem pana rtuda smat ta dem pana bena. Gabe smat ta nem paca rfafcule laling lali smat ta nem pa benaca, smat silu tasa osta marapaolo lopna."

15 Fola tina Petruse nua Yesus, "Guru, ta Guru mu nana ina, ningale ahai? Co mfabinga am."

16 Gabe Yesuse nua si, "Mewe ma ftaif paube tina ningalena? 17 Mewe fto to, ahai ta smatna danna, tina ncung mali i hnyaorca lolo, taga ntopa i mali kakusna, paga? 18 Ga mauting ta ncapang mali smatna fmorina, tina farumi ncapang mali wlorina, gabe tina to npei denabe smatna ndadi rbaradosa. 19 Ningalena, mali smatna wlorina lolo, ncapang farumi ta mayai: Fikiran ta mayai, tfamate smat, nlokolo smat ta i ni uat i paca penepa ta i ni ngolo i paca, jal sal sabarang, malois, rdadi saksi ta molang pa, fare rfamayai smate ngahnyo. 20 Farumi mayai tina to ta npei smatna denabe rbaradosa. Ga laisa smatna rceli ga kakamorina duas pa rderera hma re bburina riri sogaro, tina pa ta npei smatna ndadi rbaradosana."

21 Fola tina, Yesuse I re ni muritna rfan mana, ga si rfan lali batang ta ndahle bendar Tirus fare Sidon. 22 Mana en maping isa smat Kanaan i mali batang tina, ga i smat Yahudi i pa. Maping cia nlafo lali Yesus i, taga ndor liona mamagal "Apa, kolano Daute ni durina, masie ya lae! Ya ntuk mapingca setane ncungi gabe i nkangelana gaole."

23 Ga Yesuse nua i paisa pa maping cia. Gabe ni muritna rdahle I taga rdor, "Guru, ta mafiana Guru mua i nfane to, ga i n'gigam turus mali ite taomamna."

24 Gabe Yesuse nu, "Jou Lahatalla ncula Ya bo igali animam smat bangsa Israel ta rcal laling, laisa domba ta damningningna."

25 Ga biare ga Yesuse nu laina, maping cia ndahle be Yesus taga nlu nap Yesuse nbona, fare nu, "Apa, mgali ya lae!"

26 Manana I nu laitane, "Aw smat Israel aw pa, gabe laisa Ya igali aw, tina laisa re Ya iyal roti ta rfasiape bo wawai nenena, taga ipo lali funna."

27 Maping cia nua Yesus, "Fatutua Apa, ga fun ta mali meja papapo cama nan ane gleo ta marapawil mali si riri tuanca ni mejacana."

28 Nlonga tina, Yesuse nua i, "Maping ta aw, aw fatutua to mdela. Gabe ahai ta awe mdorna, ndadi to." Oras cia to, maping cia ntuca nmafia.

29 Fola tina, Yesuse I re ni muritna rfateam gagaw cia, taga rfan lali talaga Galilea lapo. Fare, si rdawil nais lolas isa, taga rtotolang mana. 30 Oras tina, smatna lal rlafo Yesus. Si rlafo dute smat ta rfanfan pa, smat ta dem pana, smat ta rtempangna, smat ta rmomounna fare en bena smat ta dowile nesana. Smat ta dowilna dising si mali Yesuse nbona, taga Yesuse nfamafia si. 31 Smat lalo ta si manana ndadi rherang ningalena si dem smat ta momouna rmautinge to, smat ta rtempangna rmafia to, fare smat ta rfanfan pana rfane to hawe, fare smat ta dem pana dem hawe to. Gabe tina, si farumi rcuba re rfamamagal Jou Lahatalla, Jou ta smat Israelna rcuba i.

32 Gabe Yesuse nololaw ni muritna taga nu laitane, "Ya ibasamna imasie smat lalo tae. Wol pitole to Ya re sina, ga si rari anna enpa nto. Ya ikailow pa bo ikuwa si duwe re hyaorina lolo pana, matina denabe rbaulaco mali laling popo."

33 Gabe Yesuse ni muritna dua I, "Guru, gagaw tae nalaspa mali pnu i, gabe mfalaisa ite bo tduk an bo tfaseli smat lalo taena?"

34 Ga Yesuse nfulasi ga nfautno si, "Mewe namew rotina pifis?"

Si du, "En pifit, fare iyan nenena sifis lalina."

35 Fare Yesuse nua smat laloca rtotolang nap nyinyenca. 36 Fola tina, I nyal roti pifit fare iyan sifis tina, taga I nu tarima kase lali Jou Lahatalla i. Fare I nfawogwogla roti fare iyan tina, taga npo ni muritna, taga si rlow to smat lalo tina. 37 Gabe si farumi rceli denabe rmosi. Fola tina, Yesuse ni muritna rfayalo ane gleona. Ni lalona karanjang pifit bakbak. 38 Smat ta rceli oras ciana lalorina lalan fat manna, tetang paube maping fare wai nenena. 39 Fare, Yesuse ncula smat lalo tina duwe. Gabe I re ni muritna rdawi pelang, taga rfan lali batang Magadan.