1 Wol cia bena, Yesuse ncapang mali ebai cia taga nfan lali talaga Galilea mtopo, taga ntotolang mana. 2 Smatna lal rlafo ga rfayalo si mali i. Gabe I lalaw ndawil pelang asa mana taga ntotolang, smat ta lalna dosal mali talagaca mtopo. 3 Gabe Yesuse nfafcule si okosesina lal npake andeande. I nu laitane, "En smat bet isa nfane ncake gei mali na betna. 4 Oras ta i ncake gei tina, en gei ta marapawil mali lalingca. Gabe manina rlafo ga dan gei tina denabe mnyei. 5 En gei ta nesana marapawil mali rakrak ta ni patna, ga ni rakrakna okocebe lal be pat. 6 Gabe laisa wolca nca, tatanaman tina mulaine mang ningalena ni waca ncung napna lau pa. 7 Fare en bena gei ta marapawil mali rakrak ta ni momna soga. Laina gei tina ntub, mom ta ni sogana ma ntub nbang i nmamagal gabe nbalat tatanaman tina denabe nmat. 8 Ga en bena gei ta nesana marapawil mali rakrak ta nboka. Gei tina ntub, fare piyo. Gabe ni anona denabe tutuwafe slubisa, en ta tutuwaf yafawonam, fare en bena ta tutuwaf yafatol. 9 Gabe, flonga tina famafia fare fising mali wlomew!"

10 Fola tina, Yesuse ni muritna rdahle I taga rfautan, "Guru, pesaga Guru mfafcule smat lalocana mpake andeande?"

11 Gabe Yesuse ncanglo si, "Jou Lahatalla npei bo mew ndadi fto rahasia ga mfalaisa Jou Lahatalla Nkawasa ndadi Kolano, ga mali smate nesana, enpa. 12 Ningalena, gabe laisa smatna dailow ahai ta Ya ikuna, lomanta Jou Lahatalla osta n'gali i bo ntaifna lal. Gabe laisa smatna dailow pa ahai ta Ya ikuna, ahai ta i ntona Jou Lahatalla osta nyal hawe mali i. 13 Gabe tina, Ya ifafcule sina ipake andeande, ningalena biarega si dem, si rtaif pa ahai ta si demna. Biarega si rlonga, ga rlonga famafia pa fare rtaif pa ahai si rlongana. 14 Ahai ta ndadi i mali smat tanena, Jou Lahatalla nua nabi Yesaya ntuba to laitane,

‘Biarega mew flonga turus,

ga mew ftaif pa ningalena.

Biarega mew fem turus,

ga mew fto pa ningalena.

15 Ga smat ta oras taena bobokorina cicoal.

Si kanyorina dailow pa bo rlonga,

fare si mtarina rfasisio, bo si mati dema re mtarinana,

mati si rlonga re kanyorinana, fare si mati rtaifna re wlorina.

Gabe si dailow pa bo diwane wlorina, ga Ya osta ifasalamat si pa.’

16 Ga mew ta fderera Ya tane, fsangnangna gaole ningalena Jou Lahatalla npe mew bo fem tutuling, fare mew flonga re kanyomewna tutuling. 17 Flolam e! Tantuba, nabina lal fare smat ta jaga rpei ta molang mali Jou Lahatalla nbona, si rlokolo bo dem fare rlonga Mesias ta mew fem fare flonga I oras taena, ga si rcuna dem pa fare rlonga pa."

18 Yesuse nu hawe, "Gabe mew flonga famafia, Ya bo ifabinga mew andeande gei ta marapawil mali rakrak fara pifat ta nana i cia ningalena. 19 Gei ta marapawil mali laling ciana fatailo laisa smat ta rlonga Jou ni mauting ga mfalaisa Jou Lahatalla bo nkawasa ndadi Kolano, ga si rtaif uwatu pa. Rlonga Jou ni mauting tina fola, setanna riri kolanoca nlafo ga nyal mauting tina mali si wlorina.

20 Gei ta marapawil mali rakrak ta ni patna, tina fatailo laisa smat ta rlonga Jou ni mauting fare jal re wlorina sangnang. 21 Ga mauting tina si dising famafia pa mali wlorina, gabe ntahanna mnu pa. Gabe laisa si rduk kangela ningalena si rdela Jou, si rdela Jou Lahatalla panto.

22 Gei ta marapawil mali rakrak ta ni momna soga, tina fatailo laisa smat ta rlonga Jou ni mauting, ga si wlorina tengtengan pa bo si riri tubcana, fare si diyawa be arata. Gabe mauting ta rlongana si rpeo pa, denabe mauting tina ningale paisapa.

23 Ga gei ta marapawil mali rakrak ta nbokana, tina fatailo laisa smat ta rlonga Jou ni mauting ga rtaif mauting tina. Gabe, si rtubna rderera ta Jouca nuna, laisa gei ta ntub denabe piyo. En ta piyona denabe tutuafe slubisa, tutuafe yafawonam, fare en bena tutuaf yafatol."

24 Ga Yesuse nafetang hawe andeande isa lali smat laloca, I nu, "Jou Lahatalla Nkawasa ndadi Kolano mali ni smatna, tina ni rupana laisa andeande tae: Smat isa npei bet, ncake gei gandumna mafia mali na betna. 25 Orasna doram gabe farumi smatna damtuli ga damtoal, smat ta na betca ni musuna rlafo. Ga musu tina rcake gei i na mali gelgelto gei gandum ta mafiana. Fola tina musu tasa rfanci. 26 Gabe oras ta gei tina ntub piyona mulaine ncapang, i nama ntub farerer re gei gandumna. 27 Oras smat ta na betca ni smat karajanna dem i tina, si rfan lali ga du laitane, ‘Tuan, ame kto tuane msake be gei ta mafia mali betna. Ga oras tae, mfalaisa ga denabe i na enna?’

28 Smat ta na betca nua si, ‘Tina nik musuna ta rpei.’

Ga i ni smat karajanna rfautno i hawe, ‘Tuan, mailow ame bo kfan lalei beti bo ksibit i tina.’

29 Ga smat ta na betca ncanglo, ‘Matina! Ningalena ga laisa mew fsibit i tina, osta gandumna ma marasibit. 30 Gabe ta mafiana, inanai to gandum tina ntub farerer re i na denabe ni oras ta bo tfakatina. Lomanta Ya bo isula smat ta rfakatina rfayalo ntuba su i na taga rpitan isa-isa, taga rtaping. Fola tina, taga si rfayalo gandum tina taga dising mali gagaona.’ "

31 Gabe Yesuse nafetngo si carita isa. I nu, "Jou Lahatalla Nkawasa ndadi Kolano mulain mali smatna ese be, ga wol de wol nbang i ga lal, tina fatailo laisa tatanaman ta peona nenena, smatna jal taga rtiwa mali betna. 32 Ga tatanamane peo tina nenenana gaole, gabe laisa ntube to, i ndadi tatanaman ta mamagal molang mali farumi tatanamane nesana mali bet lilewingca, denabe i ndadi ohlo aisa, gabe manina rlafo ga rpei fafual mali ni magalna."

33 Yesuse nafetngo si hawe andeande ta nesana laitane, "Jou Lahatalla Nkawasa ndadi Kolano mali ni smatna, mulain mali smatna ese be, ga wol de wol nbang i ga lal. Tina fatailo laisa ragi ta maping isa nyal taga nfulta re tirigu liter yafafat. Ragi tina npei denabe roti tina ndawilega lal."

34 Yesuse nfafcule smat lalo tina npake andeande. I nfabinga si paisapa gabe laisa npake andeande pa. 35 I nmautingna npake andeande tina, ga tina ta ntuba Jou Lahatalla nua I ni nabina mali Kitabca laitane,

"Ya bo imauting ipake andeande.

Ya bo ifabinga okosesi ta smatna isa nto paube tantuba be oras ta Ya ipei dunia taena."

36 Fola tina, Yesuse nfateam smat ta lalna taga nlolai lali ebai i. Mana I ni muritna rlafo ga du, "Guru, co mfabinga am andeande i ta ntub mali gandumna fapaluan ningalena."

37 Gabe Yesuse nua si, "Smat ta ncake gei gandum ta mafia, cia Smat ta mali sorogaica. 38 Gabe bet cia, fatailo laisa re dunia tae. Taga gei ta mafiana, fatailo laisa smat ta Jou Lahatalla Nkawasa ndadi Kolano mali sili. Ga en bena i cia, laisa smat ta rderera setane ni kolanoca. 39 Ga musu ta rcake gei i tina, setanna. Fare oras ta bo fakatina, wol kiamat, wol ta Jou Lahatalla bo nadili farumi smat. Gabe smat ta rfakati tina, tina malaikat ta rduri mali sorogai.

40 Gabe, laisa i ta smatna rcibit taga rtopa lali yapca, laina bena ta bo ndadi i mali wol kiamatcana. 41 Oras tina, Smat ta mali sorogaica bo ncula ni malaikatna. Si bo rfayalo smat ta rpei smate nesana rdadi rbaradosa fare smat ta rpei okosesi ta mayaina, fare bo rfasaksake si mali Jou Lahatalla ni smatna ta I Nkawasa ndadi Kolano mali si ta rdela Ina. 42 Ga malaikat tina bo rtopa smatna lali yap ta nmat-mat paca. Mana si osta rtangis denabe fmorina kikik ningalena rkangelana gaole. 43 Ga smat ta rpei ta molang mali Jou Lahatalla nbona, si osta rcung mali gagaw ta si Fmarica nkawasa ndadi Kolano ga si daplangan laisa wolca. Gabe, flonga tina famafia fare fising mali wlomew!"

44 Yesuse nu hawe, "Gabe ite tderera Jou Lahatalla bo tdadi I ni smat, tina ni haragana foloi mali ahai be. Tina fatailo laisa andeande tae: en arata ta mulona mamagalna gaole, ta mnu to rgogan mali rakrakca lolo mali bet i. Wol pusana, en smat isa nduk arata ta mulona mamagal tina, ga i npuco nmbang re nyinyen. Smat cia nccangnangna gaole gabe i nwage farumi ta i nina, taga npake tiwi tina n'gon bet ta ni arata ta rpucona bo tina ndadi i ni."

45 Yesuse nu hawe, "Gabe ite bo tdadi Jou Lahatalla ni smat ta I bo nkawasa ndadi Kolano, tina ma fatailo laisa andeande tae: En smat isa nfawage niyawa mutiara ta mafia fare mulona mamagal bo n'gon. 46 Bahngana, i nduk mutiara isa nmafia fare mulona mamagal. Gabe i nwage farumi ni okosesi tina, taga ni tiwina npake n'gona mutiara ta mulona mamagal cia."

47 Yesuse nu hawe, "Jou Lahatalla bo nkawasa ndadi Kolano mali I ni smatna, tina bisa tfasama re andeande tae hawe: en smat diranca rtopa labang mali talagaca si rduk iyanna rupa lalo i. 48 Riri labangca nbakbake to, si rdas labangca taga duti mali talagaca lapo. Fola tina si rtotolang taga rfisang iyan ta mafia fare iyan ta mayaina. Ta mafiana dising mali karanjangna, ta mayaina rtopa. 49 Laina bena ta bo ndadi i mali wol kiamatcana. Oras cia malaikatna bo rlafo rfara smat ta rmayaina mali smat ta jaga rpei ta molang mali Jou Lahatalla nbona. 50 Fare malaikatna bo rtopa smat ta wlorina mayaina lali yap ta nmat matpaca. Pulina si rtangis denabe fmorina kikik ningale si rkangelana gaole."

51 Fola tina Yesuse nfautno ni muritna, "Mew ftaife ndumi andeande ta Ya iku i nanaica?"

Gabe muritna dua Yesus, "I me, amame ktaif."

52 Gabe Yesuse nua si, "Ga guru agama ta rto Musa ni kitab silim tasa, si bena rto sogaro ga Jou Lahatalla Nkawasa ndadi Kolano, i cia laisa ebai ppu isa bo ncapnga arata ta po fare arata ta ago mali gagaw ta nising arata tina."

53 Nu fola andeande tina, Yesuse nfateam gagaw cia. 54 Nlafo mali I ni pnu Nasaret, Yesuse nfafcule mali ebai sombayang agama Yahudina. Ga smatna rherangna gaole, fare du, "I nto sogaro tina manca mali? Fare ise ta npoi kawasa npei mujizat tina? 55 Naga I bas ai isa ntu i paga? I hnye Maria, ga I tenona Yakobus, Yusuf, Simon fare Yudas bena paga? 56 I ramana ma nteteam farer re amam mantane, paga? Gabe manca mali I nduk sogaro fare Kawasa tina?"

57 Ga smat ta manana rto tina, gabe si dailowi pa, Gabe Yesuse nua si, "Ga fatutua, manca-manca nabina smatna daraga si, ga mali I ni ppnu fare ni ebai tutuling, si dailowi pa." 58 Gabe si rdela Yesus pa, I npei mujizatna lal pa manana.