1 Fola tina, Jou ni Rohca nut Yesus lali padang gurun gagaw isa ta namliley, bo setanna riri kolanoca nyakul I. 2 Mali gagaw cia, Yesuse nceli pa mnuwona wol yafafat doram yafafat, denabe I nbibisil. 3 Oras cia, setanna riri kolanoca nlafo lali Yesus i gabe nu, "Aw tane Jou Lahatalla Ntu Aw, paga? Gabe laina, msula pat tane bo ndadi roti."

4 Ga Yesuse nailow pa, gabe nu laitane, "Mali Jou ni Kitab cana en rlefo laitane,

‘Smatna rtubna mali an be pa,

ga mali farumi Jou Lahatalla ni mauting ta nuna.’ "

5 Fola tina, setanna riri kolanoca nut Yesus lali bendar Yerusalem, bendar ta smatna du Jou Lahatalla ni bendar i. Mana, i nising Yesus mali gagaw ta tigo molang puis mali Ebai Sombayang Mamagalca. 6 Taga nua Yesus laitane, "Aw tane Lahatalla ntu Aw paga? Gabe laina, mpawil Aw nape to! Aw osta mpei paisa pa, ningalena mali Jou ni Kitab cana en rlefo Awna laitane,

‘Jou Lahatalla bo ncula ni malaekatna,

rcagam Aw oras ta marapawilna,

bo ficomna mati neta pat nana.’ "

7 Ga Yesuse nailow pa, gabe nua setanna riri kolanoca laitane, "Mali Jou Lahatalla ni Kitab cana en rlefo laitane,

‘Jou Lahatalla ta mew fsuba I, mdel pa ta mewe mtohnga I.’ "

8 Fare setanna riri Kolanoca nut Yesus hawe nais lolas isa tigona gaole. I nfaemo Yesus farumi kerajaan ta mali dunia taena fare kerajaan tina ni kayangna. 9 Gabe setanna riri kolanoca nua Yesus, "Farumi ta Aw mem tane ya bo ipo Aw, gabe laisa Aw msuba ya."

10 Ga Yesuse nua i, "E setanna riri kolano, mpiya mana! Ningalena mali Jou ni Kitab cana rlefo laitane,

‘Mew nane fsuba Jou Lahatalla,

fare mew nane flonga be I.’ "

11 Fola tina, setanna riri kolanoca nfateam Yesus, gabe malaekatna rlafo ga si re I fare rleleane I.

12 Oras ciana, Yesuse nlonga, Yohanes ta nfasisopca rwafo i ga rfasunga i bui. Nlonga abar tina, I nuwe lali pnu Nasaret mali batang Galilea. 13 Mali Nasaret, I nfan hawe taga nteteam mali bendar Kapernaum ta i mali talaga Galilea lapoca, mali suku Zebulon re suku Naftalina riri batang. 14 Fare Yesuse nteteam mali Kapernaum tina, bo ahai ta Jou Lahatalla nuwa nabi Yesaya ta ntuba ndadi i to laitane,

15 "Smat ta rteteam mali batang Zebulon fare batang Naftalina, ta si mali talaga Galilea lapo, fare mali batang waya Yordan puli paona,

smat ta rteteam manana, smatna Yahudi pa.

16 Smat ta manana rfayala Jou Lahatalla pa, laisa smat ta rteteam pumul dororamna.

Ga si demi to plangan isa ta nmamagalna gaole.

Smat ta rteteam pumul dororam ciana bo rmatna, si re Jou Lahatalla pa denabe lali,

ga plangan cia i mana to bo nfafcule laling bo si rduk salamat."

17 Oras mali Kapernaumna, Yesuse mulaine nfabinga Jou Lahatalla ni fatnaw lali smatna, "Fiwane wlomewna to bo fderera Jou Lahatalla, ningalena mnu panto Jou Lahatalla bo nkawasa ndadi Kolano mali smat ta rdela I na!"

18 Bahnga laitane, Yesuse nfan ndel mali talaga Galilea lapo, gabe I nem smat silu rfatenow. Isa ngahnyo Simon ta smatna jaga dololaw i Petrus, fare isaca ngahnyo Andreas. Smat silu tasine rfalabang iyan mali talagaca, ningalena si riri karajanna diyawa be iyan. 19 Yesuse nololaw si, "Mali, bo fderera Ya! Mew biasa fiyawa iyan, ga Ya bo ifafcule mew fiyawa smate bo rderera Ya." 20 Rlonga tina, smat silu tasa rfateame riri labangna taga rderera Yesus.

21 Fola tina, Yesuse nfan hawe I nem smat silu rfatenow hawe. Ta isa ica ngahnyo Yakobus, isa haweca ngahnyo Yohanes. Smat silu tasa rfarerer re hmarica Zebedeus, rfapepeya riri labangna mali pelang tasa. Ga Yesuse nololaw si. 22 Fare tina to smat silu tasa rfateame riri pelang tasa fare hmarica, taga rderera Yesus.

23 Fola tina, Yesuse nyel farumi gagaw mali batang Galilea fare nfafcule mali ebai sombayang agama Yahudina. I nfabinga Abar Mafia lali smatna ga Jou Lahatalla bo nkawasa ndadi Kolano lali smat ta rdelana. I ma nfamafia smatna mali farumi riri panyaketna. 24 Mana smatna dafetang lali re mali ahai ta Yesuse npeina mali farumi gagaw mali batang Siria. Gabe si dut smat ta dowilna lal lali Yesus i. Smat ta dowile ga dut si lali Yesus i tina rpanyaketna rupa lalo i: En ta rbasamna kangela ningalena pirpir, en ta setanna rcung si, en bena ta rpanyaket tokobo, fare ta rfanfan pa, gabe Yesuse nfamafia ndumi si tina. 25 Mulain oras cia, lalna gaole smat ta rderera Yesusna: Smat mali Galilea, mali batang Dekapolis, mali bendar Yerusalem, mali batang Yudea, fare mali batang ta en mali Waya Yordan puli paona.