1 Oras wol sabat, wol ta smat agama Yahudina bisa rkarajan pa, Yesus I re ni muritna rfan rdel mali bet gandumca. Ga Yesuse ni muritna rbibisil, gabe si rkati gandum ese, taga dan sina rfanfan. 2 Mana, en smat Yahudi ta rderera fatfato Farisi. Oras ta si dem muritna rkati gandumna, si dua Yesus, "Apa co mem nim murit tina! Si rkarajan rkati gandum mali wol sabat! Tina si rcapial animam agamaca ni fatfatona!"

3 Gabe Yesuse nua si, "Ya ito mewe fbaca to carita mali Jou ni Kitabcana ga kolano Daut, oras ta i re smat ta rderera i na rbibisile to. 4 Kolano Daute ncung namul Jou Lahatalla ni ebai sombayangca taga nan roti ta smatna rpeo sadaka lali Jou Lahatalla i na. Fare, i ma noce roti tina lali smat ta rderera i na. Ta molangna roti tina, bo tderera ite rir agamaca ni fatfatona, si bisa dan pa, ta danna imamna be. 5 Mewe rasa fbaca to carita mali Musa ni kitab silim tasa, ga imamna riri karajan etnga be wol Sabat mali Ebai Sombayang Mamagalca. Denabe si rpei karajan tinana mali wol Sabat, tina si rcapial fatfato ga bisa tkarajan pa mali wol ciana. Ga biarega laina, Jou Lahatalla nu si rcal pa. 6 Mewe flolam famafia! Ebai Sombayang Mamagalca npenting, ga mantanena en ta pentingna foloi mali Ebai Sombayang Mamagalca. 7 Jou Lahatalla nu mali I ni Kitabca laitane, ‘Ta Ya ikalowna, mewe nane fmasie smate nesana, biarega ffpo nimew aiwani bo rpeo sadaka gabe nimew masie lali smatna enpa nfaiteta i be.’ Gabe laisa mew ftaif ta Jou Lahatalla nuna, mew osta ffasala Ya nik muritna pa ta rpei sal pusa pana. 8 Ga Smat ta mali sorogaica nik kawasa bo ifafcule smatna ahai ta bisa rpei mali wol Sabat."

9 Yesuse nfateam gagaw cia taga nfan lali ebai sombayang agama Yahudina. 10 Mana, en smat isa ta kakamo paona nmat, fare en bena smat Yahudi mali fatfato Farisi. Si rfautno Yesus, "Bisa pare bisapa, tfamafia smat mali wol Sabat?" Si rfautan laina, ningalena gabe laisa Yesuse nfamafia mali wol Sabat, wol ta smat agama Yahudina bisa rkarajan pa, si bo rfasala I.

11 Ga Yesuse nua si, "Gabe laisa en mali mew domba isa nmarapawlo lop neta mali wol Sabaat, mewe osta fduri nap lopca bo fyal i fare fsapnga i, paga? 12 Laina bena smatna! Mulo rina foloi mali domba, cia paga? Gabe laina, ite bisa tgali smatna mali wol Sabat."

13 Gabe Yesuse nua smat ta kakamo pao nmat cia, "Mtena kakamomna mali!" Smatca ntena kakamona lali, fare tina to kakamo ta nmatna ndai mafia, laisa re kakamo pao ta nmat pana. 14 Ga smat Yahudi ta rderera fatfato Farisi dem Yesuse nfamafia smat ta kakamo pao nmatca si rcapang mali ebai sombayang cia, taga rfatatore bo rpun famat Yesuse. 15 Yesuse nto si wlorina bo mayai, gabe I nfani mana.

Oras ta Yesuse nfan, smatna lal rderera I fare I nfamafia farumi smat ta dowilna. 16 Ga I nua si, "Mdel pa ta bo ffabinga smatna, Ya tane Ise." 17 Fare ta Yesuse npei tina, ahai ta Jou Lahatalla nua tantuba nabi Yesayana tina ndadi i to, laitane,

18 "Tae to ta Ya ifisang ica bo npei ahai ta Ya ifasulana.

Ya igogoru I.

I npei wlokna sangnang.

Ya nik Rohca, bo ipo I,

I ta bo nfabinga smat mali farumi suku re bangsana, Lomanta Ya bo ikadili farumi smat re ni laling ta molang.

19 I osta nfakotale re isa pa fare osta n'gigmo smat pa.

Fare smatna bena osta rlonga pa nmautingna nfacicoali lali smat lalo uhngori mali lalingna.

20 I ni mafia lali smat ta rcicoal pana,

tina laisa re I nfaorit i pa sop ta namgoica,

tina laisa re I nailowpa bo nfamat poci ta naplanganna nenena toca.

I bo nute smatna denabe ta damolangna, duntung mali ta damolang pana.

21 Gabe farumi suku bangsana osta rmaulango I."

22 Bahngana, en ta dute smat isa setane ncungi lali Yesus i. Smatca nempa fare nmomow. Gabe Yesuse nfaungo setanca ncapang mali smat cia denabe smatca nem fare nmauting hawe. 23 Smatna dem ta Yesuse nfamafia smat ta setane ncungica si rherangna gaole. Gabe rfauwo si, "I tae to laha, kolano Daute ni duri ta ite totoman ta Jou Lahatalla njaji bo nlafo?"

24 Smat Yahudi ta rderera sogaro farisi rlonga tina, si dailow pa, gabe rfauwo si, "I nfaungo setanna npake Beelzebul, setanna riri kolanoca ni kawasa."

25 Ga Yesuse nto si wlorina, gabe I npo andeande isa laitane, "Gabe mali kerajaan isa rfakotale ga rfasaksake si, osta kerajaan cia namjakam. Mali bendar isa ga ni smatna rfakotale, osta rfasaksake si. Fare mali man re maping ese rfakotale, osta si ma rfasaksake si, denabe mjakam. 26 Laina bena re setanna riri kolanoca. Gabe laisa setanna riri kolanoca nfaungo ni wawaina setanna, si osta rfasaksake si fare si le ma osta rfasangnang pa. Gabe setanna riri kolanoca ni karanjanna ntahan pa? 27 Mewe ma jaga fu, Ya ifaungo setanna ipake Beelzebul, setanna riri kolanoca ni kawasa. Gabe fatutua laina, smat ta rderera mew smat Farisina, si tina rfaungo setanna rpake ise ni kawasa? Gabe laisa me fu si le ma rpake setane ni kolanoca ni kawasa, si tutling osta du mew ta mew fu si fare Ya tina ncal! 28 Gabe laisa Ya, ifaungo setan ipake Jou Lahatalla ni Rohca fare ni kawasa, tina ningalena Jou Lahatalla Nkawasa to ndadi Kolano mali mewi.

29 Andeande laitane, smatna osta enpa ta bo rcung namul smat ta ncicoalca ni ebai bo rloise ni ginana, I nane npitane smat ta ncicoal cia, taga i ndadi nloise smat cia ni ginana.

30 Smat ta rderera Ya pana, si riri le Ya. Laina bena smat ta rgali Ya pa rfayalo smate bo rderera Ya, si ta rpei denabe smatna dalaspa mali Ya i. 31 Mewe flonga famafia! Farumi dosa ta smatna rpeina, bo nduk ampung sube, laina bena re smat ta riri le smatna, rduk ampung sube. Gabe laisa smatna riri le Jou ni Rohca, si osta rduk ampung pa. 32 Gabe laisa en smat ta du okosesi ga rlawang Smat ta mali sorogaica, i rduk ampun sube. Ga smatna du okosesi ta rlawang Jou ni Rohca, i rduk ampung pa, mantane denabe lali."

33 Yesuse nu, "Gabe aica nmafia, piyona ma mafia. Gabe aica nmayai, piyona ma mayai. Ite osta tto gabe laisa ai cia nmafia fare nmayaina, ite tem mali piyona be. 34 Me nimew mayaina laisa gu ni bisana. Osta bisa pa bo mew fu okosesi ta mafia, ningalena mew wlomewna mayai. Ga ahai ta smatna dising mali wlorina, tina ta bo ncapang mali si fmorina. 35 Smat ta mafiana du be okosesina ta mafia, ningalena si dising be okosesi ta mafia mali wlorina. Ga smat ta mayaina osta du be okosesi ta mayai, ningalena si dising be okosesi ta mayai mali wlorina.

36 Flolam e, lomanta Jou bo nadili farumi smatna, farumi mauting ta mew fu to, biare mauting tina ni ngale pa, ga mauting tina ta Jou Lahatalla bo nfautno mew hawe. 37 Jou Lahatalla ta bo nfato mew smat ta famolang fare smat ta bo fduk salsal, tderera be nimew mauting ta mew funa."

38 Ga sifis guru agama Yahudi ta rto Musa ni Kitab silim tasa, fare smat Yahudi ta rderera fatfato Farisi dua Yesus, "Guru, amame kdor Guru mfaemo am Mujizat faisa bo ame kto, ga fatutua Guru Aw tane mali Jou Lahatalla i mali."

39 Ga Yesuse nua si, "Mew smat ta ftub oras taena, wlomewna mayai fare famolang pa re Jou, gabe mew fdor Ya ifaemo mew mujizat faisa. Ga Ya osta ifaemo mew paisa pa, Ya osta ifawlo yaneto mew, mujizat ta ndadi i to mali nabi Yunus i tantuba. 40 Ningalena, laisa nabi Yunus i pumul iyan mamagalca hnyao lolo mnuona wol pitol doram pitol, laina bena re Smat ta nlafo mali sorogaica, osta ipumul pilingna lolo mnuwona wol pitol fare doram pitol. 41 Lomanta ni oras Jou bo nadili farumi smatna, smat Niniwe ta ntubana osta rpaling hawe laisa mew smat ta oras taena, fare si osta rfasala mew. Ningalena, smat Niniwe tina diwane wlorina oras ta Yunuse nfabinga Jou Lahatalla ni fatnaw lali sili. Ga oras tae mantane en smat isa ta nfoloi mali nabi Yunus i, ga mew flonga pa tina bo fiwane wlomewnana! 42 Ga lomanta mali wol kiamatca oras ta Jou bo nadili farumi smatna, kolano maping ta pumulo malica bo npaling hawe nfarerer re mew smat ta oras tae, fare i osta nfasala mew bo mew fduk salsal. Ga popiseina, oras i nlonga ga kolano Salomo ni sogarona, biarega i nalaspa i nfan bo nlonga kolano Salomo ni sogarona. Ga oras tae mantane, en smat ta nfoloi mali kolano Salomo i ta nut sogaro bo mew, ga mew flonga tina pa!"

43 Gabe Yesuse nu hawe, "Gabe setanca ncapang mali smat isa, i nfan nyel gagaw ta mlileina niyawa gagaw bo nfafolfola i, ga i nduk pa. 44 Gabe setanca nbafikir laitane, ‘Ta mafiana ya ilolai lali smat ta ya itetemo i popise ica,’ ga oras ta i nlolai lali smat cia, i nem smat cia wlona mumuang, laisa ebai isa ni smato pa, rlesan i ga nberesi rfato famafia. 45 Gabe setanca nfane nololaw ni del sifit wlorina mayaina foloi mali ii. Fola tina, si rfarerer rcung mali smat cia taga rteteam mana. Ni morco napna, smatca ni tubca nmayaina foloi mali tantubana. Laina bena ta osta ndadi i mali mewi smat ta ftub oras taena."

46 Oras ta Yesuse nmauting sube re smat ta lal tina, I hnye fare teno re ramana rlafo dosal po talil, si dolna gaole bo rfadukduk re Yesus. 47 Ga smat isa mana nua Yesus, "Apa, Apa hnyem fare tenom re ramamna si potalil. Si bo rfadukduk re Apa."

48 Gabe Yesuse nua smat ta nfabingaca laitane, "Ya hnyekca tenokna re ramakna ise ga?" 49 Fare, Yesuse nafcul ni muritna taga nu laitane, "Si tane ma Ya hnyek fare Ya ramak re tenok! 50 Ise be ta npei Ya nik Apa ta mali sorogaica ni mauna, i cia to Ya tenok re ramak fare i cia to Ya hnyekca!"