1 Orasna dororam i sube tamayai, farumi imam ta rfaboboko fare simosimo Yahudina rfayalo si bo jal faorit bo rpun famat Yesus. 2 Gabe si rpitan Yesus, taga duti lali gubernur Pilatus i.

3 Oras Yudas ta nwage Yesusca nlonga Yesuse nduk sal denabe nmat I ndadi nmanyasalna gaole. Gabe i nfawe tiwi perak yafatol tina lali imam ta rfabobokona fare simosimo Yahudina 4 Yudase nua si, "Ya ibaradosa to, ningalena ya iwage smat ta na sal paca."

Ga si dua i, "Tina amame kfatoto pa, lomanta aw!"

5 Nlonga tina, Yudase nfan lali Ebai Sombayang Mamagalca taga ntigeya tiwi perak tina lali Ebai Sombayang Mamagalca. Fola tina, i nfane ga nyal wala taga npake nfakawkawil i denabe nmat.

6 Ga imam-imam ta rfabobokona rfan lali djal tiwi perak tina fare du, "Tiwi tane tiwi haram, ningalena rlonga rwage smat denabe smat cia nmat. Gabe bo tderera ite rir agamaca ni fatfatona, tiwi tane bisa tpeo sadaka pa pumul Ebai Sombayang Mamagalcana." 7 Rfauwo fola si tina, si rfatator hawe bo rpake tiwi tina rgon rakrak. Si rgon rakrak tina mali smat ta jaga npei okosesi mali rakrak ta biasa ite tu, tanah liat. Rakrak ta si rgon tina bo ndadi rakrak piling bo si be smat ta Yahudi si pana ta rmat mali si riri batang tina. 8 Tina ta ndadi hal i denabe oras tae rakrak cia smatna du, rakrak laflaf.

9 Fare si rgon rakrak tina, gabe ahai ta Jou Lahatalla nua nabi Yeremia tantuba tina ndadi i, laitane, "Si rjal tiwi perak yafatol tina, tina to mulo ta smat Israelna rfatator bo rpalco I na. 10 Fare tiwi tina, si rgona rakrak mali smat ta jaga npei okosesi mali rakrak ta biasa ite tu, ‘Tanah liat.’ Tina laisa re Jou Lahatalla nfato ntuba to ga nua ya."

11 Oras cia, si dut Yesus taga rfabo i re gubernur Pilatus. Gabe gubernurca nfautno Yesus, "Fatutua Apa Aw tane smat Yahudina riri Kolano Aw?"

Yesus ncanglo, "Apa, aw tutuling ta mu laina gabe Ya to."

12 Ga oras ta imam ta rfaboboko fare simosimo Yahudina rfautno Yesus bo diyawa na sal, ga Yesuse nmauting pa.

13 Gabe Pilatuse nua Yesus, "Apa, Apa mlonga pa? Ga lalna gaole si rfautno Apa, ga Apa mfagali pa?"

14 Ga Yesuse nua si mauting pusa bere enpa, denabe gubernur Pilatuse nherangna gaole.

15 Etnga be taun, oras wol Paska, gubernurca jaga ncapnga smat isa mali buica. Smat ta i bo ncapnga ica, i nderera smat lalo ni mauna. 16 Oras tina, mali buicana en smat isa wlona nmayai ga bisa i, i ngahnyo Yesus Barabas. 17 Gabe oras smat lalo tina rfayalo si mali gubernurca ni istanaca, gubernur Pilatuse nfautno si, "Ise ta mew flokolo ya bo isapnga ica, Yesus Barabas pare Yesus ta smatna du Kristus?" 18 (Gubernurca nfautan laina, ningalena i nto ta rfaboboko agama Yahudina rpo Yesus lali i ga si riri le Yesus.)

19 Oras ta gubernur Pilatuse ntotolang mali gagao ta i jaga npake nuruse smatna, i ni ngolota nfayeit fatnaw lali i. I nu laitane, "Awe mati mcampurna Smat ta namolangca ni halna, ningalena poko be I, popei ya iduk mahngel ga I denabe ya idadi kamcait laitane."

20 Ga imamna riri ta rfaboboko sina fare simosimo Yahudina dua smat laloca bo rfabinga gubernurca ncapnga Barabas, taga rfasal Yesusna denabe nmat. 21 Gabe gubernur Pilatuse nfautno smat laloca, "Ga smat silu tasine, ise ta ya bo isapnga ica?"

Si rcanglo, "Barabase to."

22 Pilatuse nfautan fawe, "Gabe laina, ahai ta nane ya ipeina re Yesus tae ta smatna jaga du Kristus?"

Si farumi si rgigam, "Fsalip I to!"

23 Gabe Pilatuse nfautno si fawe, "I npei hal ahai ga?"

Ga Smat ta laloca rgigamna rfacicoal si hawe, "Fsalipi to I ya!"

24 Oras ciana, gubernur Pilatuse nemna I bisa npei paisapa nto gabe manana mulaine mlelang. Gabe i nyal waya taga nuase kakamona mali smat laloca nbona bo ndadi fafayal i, i ncal pa, ga i nderera smat lalo wlorina. I nu laitane, "Ya itanggung jawab panto gabe laisa Smat tae nmat ya, mew farumi ta ftanggung jawab!"

25 Gabe smat laloca nmauting du, "Inanai to lomanta amam fare ntu re bbumamna ktanggong jawab smat cia ni matmatna."

26 Nlonga tina, Pilatuse nderera smat laloca riri mauna, ga I nfabebas Barabas. Ga Yesus, i ncula tentarana rpun I rpake wala ta tubona mdalim. Fola tina, I npo Yesus lali sili bo rcalip I.

27 Fola tina, gubernur Pilatuse ni tentarana dut Yesus lali gagaw ta i mali gubernurca ni istanaca ni kintalna. Taga si dololawe riri del tentarana farumi rfayalo si ga rjel Yesus. 28 Si rcalawe Yesuse ni kabayaca taga rfapake I juba isa ni warnana ungu laisa ta kolanona biasa rpakena. 29 Fola tina, si rjanam siseping isa mali wala ta ni sogana taga rfapake Yesus mali bobokona. Taga rfakawco I re sop isa mali I kakamo welana, rpei laisa I kolano i na. Fola tina, si rlu nape ga dakale rcuba I, taga du laitane, "Tabea Jou Kolano, ksuba Aw smat Yahudina riri Kolano Aw!" 30 Taga si ditfo I. Fare si jal sop ta mali kakamo ca taga rpeseo bobokoca. 31 Rfamiamia fola I, si rcalawe ni juba unguca taga rfapake i hawe I ni juba molangca. Taga si dute rcapnga I mali bendar Yerusalem bo rcalip I.

32 Oras cia tentarana dut Yesus rcapnga I mali bendar Yerusalem, si rfaduduk re smat isa ngahnyo Simon. Simon tae smat Kirene i. Ga tentarana rpaksa Simone bo npapa Yesuse ni salipca. 33 Fare si rlafo mali gagaw isa ngahnyo Golgota, ta ningale gagaw ta smat boboko ni long. 34 Rlafo mali gagaw cia, si rfaroma Yesuse anggur ta rbanga lalau ta ngahnyo empedu. Yesus nbasam okoce anggur tina, fare I nailow panto bo ndom hawena.

35 Fola tina, si rcalip I. Taga si rcibit lot bo rto ise ta nduk I ni kabayaca. 36 Gabe si rtotolang mana rjagjaga I. 37 Mali Yesus boboko naisna, si rpaku fafan ungo taga rlefo laitane, "Tae Yesus, smat Yahudina riri Kolano I." Tulisan tane ta ndadi fatotole i, denabe si rcalip Yesus.

38 Mana en bena smat silu wlorina mayai, rcalip si farerer re Yesus. Isa imali Yesuse ni welana, isa imali Yesuse ni balitna.

39 Smat ta rdel mali Yesus ni salipca nbona jowa bobokorina ningalena, riri le Yesus. 40 Si du, "He, Awe mu, Awe bisa mfamarapu Ebai Sombayang Mamagalca taga mpei hawe mnuwona wol pitol be, paga? Gabe laisa, fatutua Aw Lahatalla ntu Aw, mfasalamate nim dirica, fare mduri to mali salipca!"

41 Laina bena, imam ta rfabobokona, guru agama Yahudi ta rto Musa ni kitab silim tasa fare simosimo Yahudi, si le ma rfamiamia Yesus bena. Si du, 42 "Smate nesa bisa nfasalamat si, ga i ni tubca tutuling bisa nfasalamat I pa! Naga I nu I smat Israelna riri Kolano i. Tina fatutua, mduri to mali salipca bo amame kdela Aw! 43 I ndela Jou Lahatalla. I ma jaga nu bena, I Jou Lahatalla Ntu I. Gabe inanai to, lomanta Jou Lahatalla nailow, taga nfasalamat I."

44 Smat silu ta rcalip farerer re Yesus tasa, si ma rfamiamia Yesus bena.

45 Orasna tok yafasa re pilu, wolca nfapaluan batang tina farumi dororam denabe tok faicol malingin. 46 Ga orasna sal pa tok faicol malingin, Yesuse n'gigamna nfacicoali npake mauting Aram. I nu laitane, "Eli, Eli, lama sabakhtani?" Ni ngalena, ‘Jou Lahatalla ite rir Jou i, pesaga Jou mfateam Yana?’

47 Rlonga tina, smat sifis ta dosal mana tasa du laitane, "I nololaw nabi Elia." 48 Gabe oras tina to, smat isa mali sili fatoal be nyal kapa, taga ncoula i mali cuka ta nkakaninca. Taga rfadahle i mali Yesuse fmona bo I ndomi.

49 Ga ta nesana du, "Ftotoman su! Lomanta kem i su, faramanega nabi Elia nfasalamat I."

50 Ga Yesuse n'gigam hawe nfacicoali, fare I npo ni jiwaca.

51 Pumul Ebai Sombayang Mamagalcana en kain mamagal isa rcagta i bo rtiban gagaw ta Jou Lahatala nlafo biasa I mana, gagaw ta smat biasana bisa rcung pa. Oras Yesuse nmat, kain cia nmarasekan ndadi pilu puis denabe nap. Tina nfarerer re sui ta ncicoalna gaole denabe lolas patna marapaw. 52 Piling guana masalawe gabe smat ta rdadi Jou Lahatalla ni smatna, lal ta rpaling hawe. 53 Ga lomanta Yesuse npaling hawe, si ma rcapang mali si riri pilingna taga rcung mali bendar Yerusalem, Jou Lahatalla ni bendar i. Pulina si rfaeme riri dirica lali smat laloca.

54 En komedan kompi Roma i re ni wawaina ta rjaga Yesus oras ta rcalip Ina. Si damcaitna gaole oras sui ta ncicoal cia fare si deme ndumi ta ndadi i tina. Gabe si du, "Fatutua, I tae Jou Lahatalla Ntu i!"

55 Manana en bena mapingna lal ta dem Yesusna ga dalaspa. Si tane ta rderera Yesus mali batang Galilea, rleleane I. 56 Mali sili tina, en Maria smat Magdala, Maria tae Yakobus fare Yusufe hnyeri i, fare Zebedeuse ni ngolota Yakobus i re Yohanese hnyeri ca.

57 En smat isa nkayang i mali batang Arimatea, i ngahnyo Yusuf. I bena smat ta ndela Yesus. Oras wolca bo ncop, 58 i nfane bo nbo gubernur Pilatus, i ndor Yesuse ni mayatca bo n'gaile I. Gabe gubernur Pilatuse nua si rpo Yesuse ni mayatca lali Yusuf i. 59 Gabe Yusufe nyal Yesuse ni mayat cia, taga nopi i re kain bubulang ta mufuf, laisa re ta smat agama Yahudina jaga rpei oras ta rgaile smatna. 60 Fola tina, i nising Yesuse ni mayat cia mali piling gua isa ta rgaile i mali popo ta ni pat. Piling tina i ni, gabe po sube. Nisinge fola i mana, i nfaulol pat mamagal isa bo ntabak piling gowa ni bawaca. Fola tina, taga Yusufe nuwe. 61 Oras tina, Maria smat Magdala re maping ta nesana rtotolang rbo lali pilingca ni bawa sapngona.

62 Ni semaca, neta wol Sabat wol ta smat Yahudina bisa rkarajan pa, imamna riri ta rfaboboko sina fare smat Yahudi ta rderera fatfato Farisi rfane ga rbo gubernur Pilatus. 63 Si dua Pilatus, "Apa gubernur, amame wlomam yaneto oras ta Yesus ta nmadarawaca tub subena, I nu, ‘Ya osta mat, ga ni wol pitol, Ya osta paling fawe.’ 64 Gabe tina, mgali ame bo msula tentarana rjaga I ni pilingca denabe wol pitol. Matina denabe I ni muritna rlafo lois I ni mayatca, taga si rfabinga smatna, ‘I npaling fawe.’ Gabe laisa denabe rpei abar laina, tina nbang be rfacaite smatna, tina mayaina foloi mali oras ta Yesuse tub subena."

65 Rlonga laina, Pilatuse nuwa si, "Me fute to ya nik tentara smat sifis mana, bo rjaga pilingca famafia."

66 Fola tina, si rfan lali piling cia. Si rfagagaw mali bawaca pilingca, gabe smatna rcalawe bawa cia, si rto to. Fare si rcula tentara sifis mana rjaga mali pilingca nbona.