1 Yesuse nduri puis popo cia, ga smatna lal ta rderera I na. 2 Oras cia, en smat isa npanyaket pado nlafo lali Yesus i. Smatca nlu nap Yesuse nbona taga nu laitane, "Apa, gabe laisa mailow, mfamafia ya."

3 Gabe Yesuse nice smat cia fare nu, "Ya ikailow aw mmafia. Gabe oras tae, awe mmafia to!" Oras cia to, smat ta npado cia nmafia.

4 Fola tina, Yesuse nua smat cia, "Wlomyaneto e, aw mati mfabinga smat nana, Ya ta ifamafia aw. Gabe mfan lali imamca bo i nem ga awe mmafia to, fare mpo nim aiwani faisa bo mpoi sadaka bo Jou Lahatalla, laisa ta nabi Musa nfasulana. Aw mpei laina bo smatna rto, aw fatutua mafia to."

5 Oras ta Yesuse ncung bendar Kapernaum, tentara Romana riri ta nfaboboko sica nlafo lali Yesus I. I ndor lali Yesus I. I nu, 6 "Apa, ya nik smat karajan isa oras tae i mali ebai i nowil. Ni badanca bisa n'ngangala panto. I nkangelana gaole."

7 Yesuse nua i, "Ya bo ifan lali nim ebai i bo ifamafia i."

8 Ga tentarana riri ta nfaboboko sica nua Yesus, "Apa, mati mlafo mali ya nik ebai cana, ningalena ya smat Yahudi ya pa gabe pantas pa bo Apa mfan mali nik ebai ina. Ta mafiana Apa mu mauting fapusa mantane, osta nike smat karajanca nmafia. 9 Ningalena, ya ito Apa anim kawasa msula smatna bisa rmafia, fatailo re amam tentarana ma bisa ksula smatna. Ya en nike smat ta rfaboboko ya na, ya ma en ni wawai ta rlonga ya. Gabe laisa ya isula nik wawaina, ‘Mfan,’ i osta nfan. Gabe laisa ya isula nik wawai ta nesana, ‘Mlafo,’ i osta nlafo."

10 Nlonga tentarana riri ta nfabobokoca nu laina, Yesuse nherangna gaole, gabe nua smat ta rderera I na, "Flonga famafia e ta Ya bo ikua mew tane, taga bahnga tane Ya iduke smat isa ndela Jouna cicoalna gaole mali farumi smat Israelna, naga i smate Israel i pa, smat Roma i! 11 Flolam e, osta smatna lal ga smat Yahudi pa mali farumi gagaw mali dunia tae, mali po lao denabe po leo, si farumi bo rdadi Jou Lahatalla ni smat, fare si rtotolang rceli farerer re Abraham, Ishak fare Yakub mali Jou Lahatalla gagaoca ta I bo nkawasa ndadi Kolano. 12 Ga biare smat Yahudina Jou Lahatalla nfisange ntuba si bo rdadi I ni smat si, mali silina lal ta si pulina pana. Jou Lahatalla osta ntopa si mali gagaw ta ndororamca. Mana si osta rtangis fare rkangelana gaole."

13 Fola tina, Yesuse nua tentarana riri ta nfaboboko sica, "Tane to apa muwe! Apa mdela biarega Ya i mauting mantane, apa nim smat karajanca osta nmafia. Gabe oras tae apa nim smat karajanca nmafia to laisa re ta apa mdelana." Oras cia to smat karajanca nmafia.

14 Fola tina Yesuse nfan lali Petruse ni ebai i. I nem Petruse ohmo ta maping ica namtuli, ningalena nowil. 15 Yesuse nice maping cia kakamona, fare tina to mapingca nmafia. Maping cia npalinge ga nleleane Yesuse nceli.

16 Lase bo doram, en ta rlafona dute smat ta setane ncung sina lali Yesus I, fare I nfaungo setan tina re parenta isa be. Yesus bena nfamafia farumi smat ta dowilna. 17 Farumi ta Yesuse npeina, ndadi ndumi i laisa ta Jou Lahatalla nua nabi Yesaya tantuba malina laitane, "I ta ntanggo ite rir kangelana fare famafia it mali rir owilna."

18 Oras Yesuse nem smatna lal rjeli I, I ncula ni muritna rfasiap pelange bo rcali lali talagaca puli pao. 19 Ga en guru agama isa ta nto Musa ni kitab silim tasa nlafo Yesus. I nu laitane, "Guru, ya bo iderera Aw manca be Guru bo mfanna."

20 Yesuse ncanglo i npake andeande laitane, "Fun ailolona gagaori bo damtuli. Laina bena manina riri fafual. Ga Ya Smat ta mali sorogaica, gagaok pa bo ifafolfola Ya na."

21 Ga smate nesa isa hawe ta nderera Yesus, nua I laitane, "Apa, mpo ya orase bo ikuwe igaile fmakca su. Fola tina taga ya ilafo iderera Apa."

22 Ga Yesuse nua i, "Inanaito smat ta rmatna lomanta si rfagaile tutuling.* Ga aw nane mderera Ya."

23 Fola tina, Yesuse I re ni muritna rdawil pelang tasa, taga rfalai. 24 Oras ta si mali talagaca, garayanna latan ta ncicoalca nlafo. Latan cia npei denabe talagaca ni mumatna gaole, denabe wayana ncapil mali riri pelang tasa. Ga oras cia, Yesuse namtuli. 25 Fare I ni muritna dololi I, si du, "Apa! Mgali am, amame bo kamduri to tane ya!"

26 Gabe Yesuse npaling, fare nua si, "Ee, mew tane smat ta fdelana uwatu pa, pesaga famcaitna?" Fare Yesuse nosale ga nfafola latan fare mumat tina liona nuto mamagal. Oras tina to, latan fare mumatna nfola, gabe talagaca namnin.

27 Dem tina, ni muritna ndadi rherang. Gabe rfauwo si, "Latan fare mumatna rderera ta I nuna! Tae smat ahai ga e?"

28 Rlafo puli talagaca puli pao, mali smat Gadarana riri batang. Manana, en smat silu setane ncung si, gabe smatna damcait si, denabe smatna isa pa ta bo rdel mali laling ciana. Garayanna smat si lu tasa rcapang mali piling goa na, rlafo Yesus. 29 Ga setan ta si mali smat silu tasa rgigam, "Adodo, Yesuse Jou Lahatalla Ntu ta aw! Pesaga mlafo mantanena bo mfakangela ame lae? Anim oras ta bo mfakangelan amna nlafo paube paga?"

30 Laupa mali tina, en bouna lalna gaole oras ciana diyawa an. 31 Ga setanna rdor lali Yesus i laitane, "Gabe bo mfaungo am, msula ame bo ksung bou tina."

32 Gabe Yesuse nua si, "Fsapange to bo ffan lali!" Fare setanna rcapang mali smat silu tasa taga rfan rcung bou tina. Bou tina rfarerana rfacicoal si lali ta maratopasna, taga rpawile ndumi nap talagaca fare rmat mana. 33 Smat ta rjaga bouna dem tina, rfarera ga rlafo mali bendarna, si dafetange ndumi ta ndadi i tina. 34 Smat ta mali bendar ciana rlonga tina si damcait gabe rcapang mali bendar cia rfan lali Yesus i. Oras ta si rfadukduk re Yesus, si rdore bo Yesuse ncapang mali riri batangna.