1 Yesuse nfafcule si fola tina, I nua ni muritna, 2 "Mewe fto to, motle wol pilu hawe ite bo tpei wol mamagal ta ngahnyo Paska bo wlor yaneto oras ta Jou Lahatalla nfabebas ite hma re bbur ta ntubana mali bangsa Mesir ta rfakangela sina. Ga oras wol mamagal cia, en smatna bo rpo Smat ta mali sorogaica bo rcalipi."

3 Oras cia, smat Yahudina riri imam ta rfaboboko sina fare simosimo na rfayalo si mali imam mamagal ta ngahnyo Kayafas ni istanaca. 4 Mana si rfatator si bo rwagfo Yesus. Si bo rwagfo i ni lalingna rgogogan si, fare bo rpun famati. 5 Ga si rfauwo si, "Mati twagfo I na mali wol mamagalna, mati denabe smat lalo ta rlokolo I na rpei hal."

6 Oras Yesus I mali pnu Betania, I ntuli mali Simone ni ebaica. Simon tae popiseina npanyaket pado. 7 Oras Yesuse ntotolange ga nceli, en maping isa nlafo nut egat botol pusa pauna mafia fare mulona mamagal. Fare maping cia nduplo egat falalalo mali Yesuse bobokoca.

8 Oras ta Yesuse ni muritna demi i npei laina, si rcangnang pa. Gabe si du, "Egat ta pauna mafia fare mulona mamagal, pesaga i nfalibiru ina! 9 Gabe laisa twage egat pau mafia cia, mulona mamagalna gaole, taga ni tiwina bisa toce smat ta riri re rari pana."

10 Ga Yesuse nto wlori tina, gabe I nua si, "Pesaga mew ftolea maping taena? Inanai to. I npei okosesi ta mafia mali Ya i. 11 Smat ta riri re rari pana osta si mali mewi turus, gabe oras ahai be mew nane fgali si, ga Ya tane ifarerer re mew turus pa. 12 Ningalena, oras ta i nduplo egat pau mafia cia mali Ya nik badan taena, tina laisa i nfasiape to Ya nik mayatca oras ta bo rgaile Ya na. 13 Flolam famafia ta Ya iku tane, manca be smatna rfabinga Abar Mafia mali Jou Lahatalla i tane mali farumi dunia, si osta dafetang ahai ta maping tae npeo Ya na, denabe smatna osta rlolam i turus."

14 Isa mali Yesuse ni murit yafasa re silu tasa, i ngahnyo Yudas Iskariot. I nfan lali imam ta rfabobokona. 15 Nlafo pulina, i nfautno si, "Gabe ya iwage Yesus lali mewi, ahai ta mewe bo fpo ya na?" Gabe si rpoi tiwi perak yafatol lali Yudas i. 16 Mana, Yudase mulaine niyawa oras ta mafia bo nwage Yesus lali sili.

17 Wol ta pusa oras ta si bo rpei wol mamagal Roti ta Npake Ragi paca, Yesuse ni muritna rlafo ga rfautan, "Guru, manca ta Guru mailowna bo amame kfasadia an wol mamagal Paska bo ite tceli farerer?"

18 Gabe Yesuse nua si, "Mewe ffan lali bendar Yerusalem, pulina mew osta faduk-duk re smat isa. Fua smat cia laitane, ‘Guruca nu ni orasna mnu panto hawe. Gabe ite rir wol mamagal Paska tae, I bo nceli farerer re I ni muritna mali apa nim ebaica tae.’ "

19 Rlonga Yesuse nu fola tina, I ni muritna rpei laisa ta I ncula si tina. Gabe si le ma rfasiap an wol mamagal Paska cia.

20 Orasna bo doram, Yesuse ntotolang nceli farerer re ni murit smat yafasa re silu tasa. 21 Orase si rceli, Yesuse nu, "Flolam famafia ta Ya iku tane, en smat isa mali mewi tane osta nwage Ya."

22 Rlonga tina, si wlorina nmagogoru ina gaole. Gabe isa-isa nua I, "Guru, ya pa paga?"

23 Yesuse nua si, "Smat cia isa mali mewi mali ta ttuke roti mali galas isa be tane. I cia to ta bo nwage Ya ca. 24 Ga Smat ta mali sorogaica osta nmat laisa re ta Jou Lahatalla nu ntuba tona. Nabina rlefo laina to mali Jou ni Kitab ciana. Ga mkapalange to smat ta mwage Smat ta mali sorogai ciana, aw osta mduk salna tebteb! Ta mafiana, mati aw mtub mali dunia taena."

25 Gabe Yudase ta bo nwage Yesus ca nu, "Guru, smat ta mu ica, ya pa paga?"

Gabe Yesuse ncanglo i, "Aw tutuling ta mu lainana."

26 Oras ta Yesuse I re ni muritna rceli, Yesuse nyal roti taga nu tarima kase nais Jou Lahatalla I. Fola tina, I nfawogwogla rotina taga noce si, I nu, "Roti tane Ya nik badanca, fyale to bo fan."

27 Fola tina, Yesuse nyal cawan taga nu tarima kase nais Jou Lahatalla I. Fare I noce si taga nu, "Mewe farumi fdom anggur tae to. 28 Ningalena, tane Ya nik laflaf. Oras Ya imat, Ya nik laflafna osta maraepa bo fatutua Jou Lahatalla ni jaji mali smatnana. Gabe Ya nik laflaf ta maraepa tina bo nfayangise smat lalo ni dosa. 29 Flonga famafia ta Ya bo ikuwa mew tane, mantane bo lali, Ya osta idom anggur panto. Ga lomanta oras Ya nik Apa Nkawasa to ndadi Kolano mali I ni smatna, taga Ya idom hawe anggur ta pona farerer re mew."

30 Fola tina, Yesuse I re ni muritna rmanyanyi rfamamagal Jou Lahatalla, taga si rfan lali Popo Zaitun.

31 Oras cia, Yesuse nua si, "Doram tae to mew farumi ta fdela Yana nimew delana osta ngangala denabe mew ffarera fateam Ya. Ningalena, ta ntubana Jou Lahatalla nu mali ni Kitabca laitane, ‘Ya osta ipun smat ta njaga dombana, gabe domba ta I njagana damsaki lali re mali.’

32 Tina ni ngalena, Ya osta imat, ga oras Ya osta ipaling hawe, Ya osta ilafo ntuba mali mewi mali batang Galilea taga ite tfadukduk mana."

33 Gabe Petruse nua Yesus, "Biarega farumi si riri delana ngangala denabe rfarera rfateam Aw Guru, ga ya tane enpa!"

34 Gabe Yesuse nua Petrus, "Mlonga famafia Ya bo ikua aw tane, doram tae tatalena rkuku paube, aw osta mu mfayala Ya pana law faicol."

35 Gabe Petruse nua I laitane, "Biarega ya imat farerer re aw Guru, ya osta iku ifayala Aw Guru." Ga Yesuse ni murit ta nesana du laina bena.

36 Fola tina, Yesuse I re ni muritna rfan lali gagaw isa ta ngahnyo Getsemani. Fare Yesuse nua ni muritna, "Ftotolang mantane su e, Ya lali bo isombayang." 37 Ga Yesuse nut Petrus, Yakobus fare Yohanes, Zebedeuse ntu silu tasa, rderera I. Oras ciana, I wlona mulaine nmagogoru i, fare namderer. 38 Gabe I nua smat si tol tasa, "Ya wlokna kangelana gaole, ibasamna laisa bo imatna. Mew mantane su e. Fjaga farerer re Ya."

39 Fola tina Yesuse nfan lali okoce, fare I nlu nap denabe uhngoca neta rakrakca, taga ncombayang, "Ya Apa, gabe laisa bisa, mati Ya iduk kangela taena. Ga mati mderera Ya wloknana, mderera be Apa wlomna."

40 Ncombayange fola, Yesuse nlolai lali ni murit sitol tasa, ga nem sina damtoal. Gabe I nfapaling si fare nua Petrus, "Ee, aw manahan pa biarega jam bahnga mjaga farerer re Ya? 41 Fjagjaga fare fsombayang, bo mew mati fmarapaulo salsal cana, ningalena biarega mew wlomewna flokolo bo fderera Ya, ga nimew badanca nafena pa."

42 Fola tina, Yesuse nfane ncombayang hawe. I ncombayangna nu laitane, "Apa, gabe kangela tae nane Ya bo iduk i, laina to Apa nim mauna ndadi i!" 43 Ncombayange fola, Yesuse nlolai hawe lali smat si tol tasa, nem sina damtoal hawe, ningalena damtututilna gaole.

44 Yesuse nfateam si mana hawe taga I lali ga ncombayang ta faicolna. I ni sombayangca nu laisa ta nanaina hawe. 45 Ncombayange fola, I nlolai hawe lali ni murit smat si tol tasa. I nfapaling si taga nu laitane, "Mewe ffamtuli sube fare ffafolfola mew hawe? Tane i ni oras, co mew fem, Smat ta mali sorogaica bo rpoi lali smat ta rbaradosana. 46 Fosale to bo tfan. Smat ta bo nwage Ya ca nalaw panto."

47 Oras Yesuse nmauting sube, isa mali Yesuse ni murit yafasa re silu tasa ta ngahnyo Yudas cia nlafo. I nlafona farerer re smatna lal, en ta dut eta fare en bena ta dut ai motmoto. Smat tina imamna riri ta rfabobokona rcula si fare simosimo Yahudina. 48 Yudas ta nwage Yesusca npei fafayale to lali smat lalo tina, i nu laitane, "Smat ta ya bo ifatan ica cia to, ta mewe fwagfo i."

49 Gabe smat ta lalna rlafo mana, Yudase tina to dahle Yesus taga nu, "Guru, isuba Aw." Fare i nfatan Yesus.

50 Gabe Yesuse nua i, "E wataw, mpei be to ahai ta aw bo mpei na." Gabe smat ta rlafo rfarerer Yudasna rfadahle si taga rwagfo Yesus.

51 Ga smat isa mali smat ta jaga rderera Yesusna ncibete ni etaca taga ntota Imam mamagalca ni smat karajan isa kanyona denabe morit.

52 Gabe Yesuse nua smat cia, "Msunga i hawe nim eta cia! Ningalena isa npune smate ga npake eta, i ma osta nmata re eta. 53 Mati mewe flupana, Ya bisa idor lali Ya nik Apa i, tina to I osta nfayeit malaikatna re ni calan bo rgali Ya. 54 Gabe laisa Ya ipei laina, tina ningalena, farumi ta rlefoe ntuba mali Jou ni Kitabcana ga Ya oras tae, osta ndadi i pa."

55 Gabe Yesuse nua smat lalo ta rlafo bo rwagfo I na, "Mewe fu rasa Ya tane smat ta ipei ta mayai, denabe mewe flafo fut eta fare ai motmoto bo fwagfo Ya? Naga Ya wol de wol ifabinga Jou Lahatalla ni Abar ta mafia mali Ebai Sombayang Mamagalca, ga mewe fwagfo Ya mana pa. 56 Ga inanai to, ningalena farumi tina nane ndadi i, laisa ta Jou Lahatalla nu ntuba mali nabina ta rlefo mali Kitabcana."

Ga Yesuse ni muritna farumi rfarera rfateam I.

57 Laina smat ta lal tina rwagfo Yesus, si duti lali imam mamagal Kayafas ni ebaica. Mana guru agama Yahudi ta rto Musa ni Kitab silim tasa fare simosimo Yahudina rfayalo si to. 58 Oras ta dut Yesus mana, Petruse nderera si ga nalaspa denabe i ncung mali imam mamagalca ni ebaica ni kintalna. Nlafo pulina, i ntotolang farerer re si ta rjaga manana bo nem ahai ta bo ndadi i mali Yesus i na. 59 Mana, imamna riri ta rfaboboko sina fare farumi Mahkama Agamana riri ta rfabobokona diyawa smat ta rcaksina molang pana bo rfatuwo Yesuse na salna, bo si rfasal Yesusna nmat. 60 Ga si rduk pa na sal tina, biarega smat ta rlafona lal bo rdadi saksi ta molang pa lali Yesus I. Ni morco napna, en smat silu ta rcaksi laitane, 61 "Smat tane jaga du, I osta nfamop Ebai Sombayang Mamagalca, ga mnuwo wol pitol I nfaosal i hawe."

62 Mana, imam mamagalca nosal, fare nua Yesus, "Smatna lale to ta du msalna, ga Aw mgali nim dirica pa?" 63 Ga Yesuse lio pa. Gabe imam mamagalca nua I hawe, "Ya isasi re Jou Lahatalla ta ntub ngahnyona, Awe mua am mali, fatutua Aw tane Mesias, Kolano ta Jou Lahatalla njaji ta ntuba be? Fare fatutua Aw Lahatalla Ntu Aw pare enpa?"

64 Gabe Yesuse ncanglo, "Apa tutuling bere mu laina gabe Ya to. Ga Ya ikua mewe, lomanta fem Smat ta mali sorogaica ntotolang mali gagaw ta tigoca mali Jou Lahatalla ta Nkawasa molangca ni welana, ga nlafo puis metna mali langitca."

65 Rlonga Yesuse nu laina, imam mamagalca ntolena gaole denabe ncekane ni jubaca taga nu laitane, "Ce e, ga smat tae npei laisa Jou Lahatalla ya! Gabe, ite tarausa tiyawa saksi hawe to ta bo tfasal ina! Mew tutulinge flonga to paga? 66 Ga tane bo mew, mfalaisa?"

Si rcanglo, "I nane nduk salna nmat."

67 Fola tina, si ditfo Yesuse uhngoca fare rpun I, en bena ta daspakal I. 68 Fare dua I, "Gabe laisa fatutua Aw Mesias, coba mu, ise ta naspakal Aw!"

69 Oras cia, Petruse ntotolang mali imam mamagal cia ni ebaica ni kintalna. Ga smat karajan isa mana mapingi nlafo, fare nua i, "Aw tane bena ta jaga mderera Yesus, smat Galileaca paga?"

70 Ga Petruse nfatuwo mali smat lalo ca nbona, nu i nfayala Yesus pa. I nu laitane, "Enpa! Ya itaif pa anim maksut pesa mu lainana!"

71 Fola tina, Petruse ncapang nata bawa pagarca. Manana en smat karajan maping ta nesana nem i, fare nua smat ta manana, "Smat tae jaga nderera Yesus, smat Nasaret ca."

72 Ga Petruse npida hawe. I ncasi nu, "Ya isasi ku Jouca ngahnyo, ya ifayala I pa."

73 Mnu pana, smat ta si manana rdahle Petrus taga dua i, "Molange to, aw tane isa mali sili, tina tfayala mali nim logatna."

74 Tina to Petruse ncasi, "Ya isasi iku Jouca ngahnyo, ya ifayala I pa!" Ga oras tina to, tataleca nkuku.

75 Fare Petruse wlo yaneto ta Yesuse nua i na, "Tataleca nkuku paube, aw mu mfayala Ya pana faicole to." Tina to, Petruse ncapang taga ntangis ningalena nmanyasalna gaole.