1 Fola tina, Yesus I re ni muritna rcaplo pelang tasa taga rpalan si hawe lali talagaca puli pao, mali bendar ta I ntetemo ica*. 2 Garayan laitane, en smat sifis dute smat isa nfanfan pa lali Yesus I, si rfatuli i mali musala isa. Oras ta Yesuse nem si dute smat ta nfanfan paca lali I, I nto si rdela I. Gabe Yesuse nua smat ta nfanfan paca, "Tenok ta aw, anim dosana Ya ifayangise to gabe aw msangnange to."

3 Manana en bena guru agama diranca ta rto Musa ni Kitab silim tasa. Rlonga Yesuse nu laina, si rmauting mali wlorina laitane, "Ga smat tae npei ni dirica laisa Jou Lahatalla."

4 Ga Yesuse nto si wlorina, gabe I nua si laitane, "Pesaga mew fututa ta mayainana? 5 Oras ta Ya kua smat ta nfanfan pa tae, ‘Anim dosana ifayangise to,’ mewe osta fdela pa smat cia ni dosana Ya ifayangise to. Gabe laisa Ya iku, ‘Mpalinge bo mfan,’ mewe fto Ya nik kawasa, ningalena mew fem i nfan. 6 Gabe tane Ya bo ifamafia i, bo mewe fto, mali dunia tae Ya Smat ta mali sorogaica en bena nik kawasana bo nfayangise smatna riri dosa." Gabe Yesuse nua smat ta nfanfan pa cia, "Mpalinge to, mlange nim musalaca, fare muwe to lali nim ebai i!"

7 Fare smat ta nfanfan paca npaling, nuwe lali ni ebai i. 8 Smat ta lalna dem tina, si damcait gabe si rcuba re rfamamagal Jou Lahatalla, ningalena I npo kawasa ta mamagal tina lali smat ta mali dunia tae.

9 Fola tina, Yesuse nfan nfateam gagaw cia, ga I nem smat ta nfautno pajakca ntotolang mali ebai pajakca lolo. Smat cia ngahnyo Matius. Gabe Yesuse nua i, "Mali bo mderera Ya." Nlonga tina, Matiuse nosale ga nderera Yesus.

10 Fola mana, Yesus I re ni muritna rfane rceli mali Matiuse ni ebaica. Manana en bena smat ta rfautno pajakna fare smate nesa ta smatna du si rbaradosa. Si rceli farerer re Yesuse ni muritna.

11 Mana ma en bena smat agama Yahudi ta rderera sogaro farisi. Oras ta si dem Yesuse nceli farerer re smat ta du si rbaradosa tina, si dua Yesuse ni muritna, "wataw, pesaga nimew Guruca nceli farerer re smat ta rfautno pajakna fare smate nesa ta rbaradosanana?"

12 Yesuse nlonga si du laina, fare nua si laitane, "Smat ta rcehatnapa rparalu mamana, ga smat ta dowilna. 13 Co mew flonga ahai ta, Jou Lahatalla nu mali Kitabcana laitane, ‘Ta Ya ikalow tina, mewe nane fmasie smate nesana, biarega fpo nimew aiwani bo rpeo sadaka, gabe nimew masie lali smatna enpa nfaiteta i be.’ Ningalena Ya ilafo bo ikololaw smat ta rbasam riri dirica namolang napa ga Ya ilafo bo ikololaw smat ta rbaradosana."

14 Fola tina, Yohanes ta nfasisopca ni muritna rlafo Yesus. Si rfautno I, "Amam fare smat ta rderera fatfato Farisina biasa kpuasa, pesaga Apa nim muritna rpuasa pana?"

15 Yesuse ncanglo si npake andeande laitane, "Ya tane fatailo laisa man ta nfasawca. Gabe laisa man ta nfasawca i mali rame fasawca sube, osta ni del-delona rmagogoru si pa. I re si rfasangnang si sube. Ga osta en ni orasna, smatna rjal man ta nfasaw cia mali si fapaluanna. Oras cia taga si rpuasa.

16 Laina bena, smatna isa pa ta ndilip obat po npake ni kabaya ta ago icana. Ningalena gabe laisa bo tosfa kabaya cia, obat po ta ndilpe ica osta nluli i fare kabaya agoca osta nmarasekanna mamagal hawe.*

17 Laina bena, aiwani gico ta si rpeo anggur gagao. Gabe laisa ago ito osta enpa smat ta dafrao i anggur ta pona. Ningalena gabe laisa, anggur gagao ta mali aiwani gicoca ago i to, i ni gicoca ncicoal. Gabe, smatna laisa dafrai anggur ta po mali anggur gagao ta ago tona fare anggur ta pona ndawi, anggur po tina osta nfarapes anggur gagao ta ago ica, fare anggurna maraepa. Gabe tina, smatna osta dafrai anggur ta pona mali gagao ta po bena, bo anggur tina fare gagaoca ntahanna mnu."

18 Oras ta Yesuse nmauting re Yohanes ta nfasisopca ni muritna, en smat isa nlafo Yesus. I cia ta nfaboboko mali ebai sombayang agama Yahudina isa. Smat cia nlu mali ta Yesuse nbona, taga nu laitane, "Guru, ya ntukca maping i, taga nmat. Gabe laisa masie ya Guru mlafo su, bo mfatige kakamomna mali wai cia, bo i npaling hawe."

19 Yesuse nlonga tina, nosal, gabe I re ni muritna rderera smat cia rfan lali ni ebai i.

20 Oras ta si rfanfanna, en maping isa ndahle Yesus mali taona, taga nice Yesuse ni jubaca cicapo okoce. Maping cia taun yafasa re failu to nfanye laflafna. 21 I nice Yesuse ni jubaca cicapo okoce, i nbafikir mali wlona, "Asal ta ikice I ni jubaca be ya osta imafia."

22 Oras cia, Yesuse nninga namul tao, fare I nem maping cia ga nua i, "Maping ta aw, mati liomna to! Aw mafia to ningalena awe mdela Ya." Oras cia to, maping cia nmafia.

23 Fola tina, Yesuse nfan turus, denabe nlafo mali ta nfaboboko ebai sombayangca ni ebai i. Mana Yesuse nem smat ta duf suling fare smat ta rtangisna lal. 24 Ga Yesuse nua si, "Mewe fsapange to, ningalena wai maping tae nmat pa, i namtuli be." Ga si damlifa Yesus.

25 Oras ta smat tina rcapang, Yesuse ncung namul wai cia ni kamarca fare nice kakamona, waica npaling hawe. 26 Fare farumi ta ndadi i tina smatna dafetang lali re mali farumi batang tina.

27 Fola tina, Yesuse nfani mana. Gabe smat silu ta dem pa tasa rderera I fare rgigam, "Apa, Kolano Daute ntu re bbu,* mmasie ame lae!"

28 Oras Yesuse ncung mali ebai isa, smat silu ta dem pa tasa rlafo Yesus. Gabe Yesuse nfautno si, "Gabe mewe fdela Ya bisa ifamafia mew?"

Si rcanglo I, "Ime Apa, ame kdela."

29 Gabe Yesuse nisinge kakamona mali mtarina taga nu, "Mewe fdela Ya to gabe oras tae ndadi to mali mewi, tderera ta mew fdelana." 30 Oras tina to, smat silu tasa dem hawe. Gabe Yesuse nua si, "Mdel pa ta bo fabinga smatna mfalaisa denabe mewe fem hawena."

31 Ga oras ta si rcapang mali ebai ciana, si dafetang ga Yesus mali farumi batang tina.

32 Oras ta smat silu ta dem pa tasa rmafia to rcapang, garayanna en hawe ta dut lali Yesus i smat isa setane ncung i denabe nmomou. 33 Yesuse nfaungo setan ta ncunge smat ta nmomou cia, i ma nmauting hawe. Smat ta rfayalo si manana rherangna gaole, gabe rfauwo si, "Bahnga paube ite tem ahai ta ndadi tane mali Israel!"

34 Ga smat Yahudi ta rderera fatfato Farisina rfauwo si, "I npake setanna riri kolanoca ni kawasa nfaungo setan tinana."

35 Yesuse nyel mali farumi bendar fare pnuna, fare nfafcule mali ebai sombayang agama Yahudina. I nfabinga Abar Mafia ga Jou Lahatalla nkawasa ndadi Kolano lali smat ta rdelana. I ma nfamafia smat mali farumi panyaket fare nfamafia smat ta rcacatna. 36 Oras ta Yesuse nem smat ta lal tina, I nbasamna nmasie si. Ningalena, si rfatoto pa bo rpei ahai fare rmaulango isa pa, fatailo laisa domba ta riri tuan pana. 37 Mana Yesuse nua ni muritna, "Smat ta rlonga paube Abar Mafia mali Jou Lahatalla i ga rciap dailowna lal, ga smat ta bo rfabinga Abar mafiana lal pa. Fatailo laisa gandum ta mali betina motle be tkati, ga smat ta rfakatina lal pa. 38 Smat ta rkarajan mali bet ciana nane rdor lali ta na bet cia, bo I nbange smat ta rfakati mali bet ciana, laina bena re mew fsombayang fdor Jou Lahatalla ncula smatna lal hawe bo rfabinga Abar mafia lali smat ta rlonga paubena."