1 Oras ta Yesuse i mali waya Yordanna, Jou ni Rohca nkawasa I to. Fare nut Yesus lali gagaw isa ta namliley fare nalaspa mali pnu i. 2 Yesuse nteteam pulinana wol yafafat. Mana, setanna riri kolanoca, nyakul Yesus. Oras ta Yesuse imanana, I nan paisa pa denabe I nbibisilna gaole.

3 Gabe setanna riri kolanoca nua Yesus laitane, "Aw tane, Lahatalla ntu Aw paga? Gabe laina, Aw msula pat tane bo ndadi roti!"

4 Yesuse nailow pa, gabe nua i, "Mali Jou ni Kitabca en rlefo laitane, ‘Smatna rtubna mali roti be pa.’ "

5 Fola tina, setanna riri kolanoca nut Yesus lali gagaw isa ta tigo. Mana, fatoalna gaole setanna riri kolanoca nfaemo Yesus farumi karajan ta mali dunia taena. 6 Gabe setanna riri kolanoca nua Yesus, "Farumi karajan tina ni kawasa fare kayangna ya bo ipo Aw! Ningalena farumi tina ndadi ya nik, gabe ya bo ipo ise ta ya ilokolo i. 7 Gabe, laisa Aw msuba ya, ya bo ipo farumi tina ndadi Aw nim."

8 Gabe Yesuse nua i, "Mali Jou ni Kitabcana en rlefo laitane, ‘Mew nane fsuba Jou Lahatalla. I cia nimew Jou I, fare I be ta mew nane flonga I!’ "

9 Fola tina, setanna riri kolano ca nut Yesus lali bendar Yerusalem, taga nising Yesus mali gagaw ta tigo molang mali Ebai Sombayang Mamagalca. Fare nua Yesus laitane, "Aw tane Lahatalla ntu Aw paga? Gabe laina, mpawil Aw mantane bo nap! 10 Aw osta mpei paisa pa, ningalena mali Kitabcana en rlefo ga Aw laitane,

Jou Lahatalla bo ncula ni malaekatna rjaga Aw.

11 Si bo rcagam Aw oras ta Aw marapawilna, bo ficomna, mati neta patnana."

12 Ga Yesuse nailow pa, gabe I nu laitane, "En ta rlefo mali Jou ni Kitab cana,

‘Mati mtohnga Jou Lahatallana, me nimew Jou i.’ "

13 Oras ta setanna riri kolano ca nyakul Yesuse re rupa lalo i, i nfateam Yesus, fare i ntotoman orase nesa ta mafia bo ntohnga I hawe.

14 Fola tina, Yesuse nlolai hawe lali batang Galilea. Jou ni Rohca ni kawasana en mali I, Fare abar ga Ina ncapange ndumi mali farumi smat mali batang tina. 15 I nfafcule smat mali ebai sombayang agama Yahudina, gabe farumi smatna rfamamagal I.

16 Bahnga na, Yesuse nfan lali pnu Nasaret. Mali nnenena sube denabe nmamagal I mali pnu cia. Gabe neta wol Sabat, ta smat Yahudina bisa rkarajan pa, I ncung mali ebai sombayang agama Yahudina, laisa re I ni biasana. I nosal potao bo nbaca Jou ni Kitab ca. 17 Gabe, en ta rpo Yesus kitab nabi Yesaya. I ncalawe kitab ta rfalululo i cia, gabe I nduk lefoanna laitane,

18 "Jou Lahatalla ni Rohca i mali Ya i,

ningalena I nfisang Ya bo ifabinga Abar Mafia lali smat ta rcusana.

I ta ncula Ya

19 bo ifabinga smatna laitane:

Smat ta rceya si puli buicana bo rcapang.

Smat ta rbiafna bisa dem hawe.

Fare I ncula Ya ifabebas farumi smate nesa ta en rfakangela sina,

fare bo ifabinga, Jou Lahatalla ni oras ta bo n'gali smat nana nlafo i to."

20 Nbaca hola, Yesuse nfalululo kitab cia, taga npo smat ta njaga manaca, taga I ntotolang. Farumi smat ta si mali ebai sombayang ciana datngalo Yesus. 21 Gabe Yesuse nua si, "Farumi ta mew flonga ta Ya ibaca mali Jou ni Kitab cana, wol tae farumi ndadi i to."

22 Gabe farumi smat ta manana rlonga ahai ta I nuna, rfaiyo fare ndadi rherang re I ni mautingna mafia. Ga hola tina si du laitane, "I cia Yusufe ntu i paga?"

23 Gabe Yesuse nua si, "Japa mew bo fua nak mauting pusa, laitane, ‘Woe dokter, mfamafia Aw ni dirica su.’ Mew fu laina ningalena mew bo fsula Ya bo ipei mujizat mali Ya nike pnu tae, laisa ta Ya ipei mali pnu Kapernaumna. 24 Mew flolam famafia ta Ya bo iku tane. Nabi ta jaga rfaturusa Jou Lahatalla ni fatnaw laisa re Ya, enpa ta bo daraga i mali i ni pnunana. 25 Gabe ta Ya ikuwa mew tina fatutua, i ni andeande laitane: tantuba, jaman nabi Elia, ulan pana taun faicol re nga siwonam, denabe smatna rmata an mali farumi batang Israel. Oras cia mali Israelna en ngolo balona lal. 26 Ga makse laina ma, nabi Elia rcula i pa bo nfan lali smat ta i re si batang isana, naga Jouca ncula i nfan lali ngolo balo isa ta smat Israelna ntu re bburi i pa. Balo cia nteteam mali Sarfat batang Sidona. 27 Laina bena oras ta jaman nabi Elisa tantuba. Mali Israelna smatna lal ta rduk panyaket rpadona. Ga isa bere enpa smat mali Israelna ta Jouca nfamafia. Jou Lahatalla nfamafia be smat isa ta smat Israel i pa, i smat Siria i. Smat cia ngahnyo Naaman."

28 Oras ta si farumi ta en mali ebai sombayang cia rlonga Yesuse nmauting lainana, si rtolena gaole lali Yesus i. 29 Si farumi dosal taga rfaungo Yesus. Si dut Yesus lali ta maratopasna mali bendarca potalil. Bendar cia si rpei puis lolasca. Si dut I lali ta maratopasna bo rtaf I nap. 30 Ga Yesuse nfane ncapang mali smat lalo cia hapalunori tina taga nfan i nfateam si mana.

31 Fola tina, Yesuse nfan lali bendar Kapernaum mali batang Galilea. Etnga be wol Sabat wol ta smat Yahudina bisa rkarajan pa, I nfafcule smat mali ebai sombayang agama Yahudina. 32 Smat ta manana rlonga I ni fafculenana rherang, ningalena I nfafculena ni kawasana mamagal.

33 Mali ebai sombayang ciana, smat isa setane ncung i, gabe i n'gigam, 34 "Ee Yesus smat Nasaret! Mati mcampurna re animam urusan. Mati mfamatam na. Ya ito Aw ise. Aw tane smat ta mberesi mali Lahatalla i mali."

35 Gabe Yesuse ntolea setan ta i mali smat cia, "Liomna! Msapang aw mali i!"

Setan cia npesa smat cia mali smat laloca uhngorina. Npesa i fola, setan cia ncapang mali smat cia, ga smat cia npepaisa pa.

36 Dem tina, farumi smat ta si manana rdadi rherang gabe rfauwo si laitane, "Gampang pa ni mau-mautingna, bisa i bena! I npake I ni kawasa nfaungo setanna rcapang mali smat cia fare si ma rcapang!" 37 Gabe ahai ta Yesuse npei tina, ncapang mali farumi gagaw mali batang tina.

38 Oras ta si rcapang mali ebai sombayang cia, Yesuse nfan lali Simone ni ebaica. Simone ohmo ta mapingi nowilna mamagal. Gabe si rdore bo Yesuse nfamafia i. 39 Gabe, Yesuse nfan lali Simone ohmo i, taga nosal mali lapona, taga I nfaungo owil cia. Oras cia to, Simone ohmo ma nmafia gabe i npaling, fare nleleane si rceli.

40 Oras ta wolca bo ncop, smatna rlafo dute riri smat ta dowilna lali Yesus i. Smat ta dowil tina panyaket lalo i. Gabe Yesuse nisin kakamona lali isa-isa ta dowil tina taga nfamafia si. 41 Manana, en smat sifis setane ncung si. Yesuse ncula setan tina rcapang mali smat tina. Setanna ma rcapang re rgigam laitane, "Aw tane Lahatalla ntu Aw." Ga Yesuse ntolea si re liona mamagal, I ma nua si, mati ffabingana, ningalena setanna rto, Yesus cia Mesias, Kolano ta Jou Lahatalla njaji bo nfasalamate smatca.

42 Ni semaca dororam i sube, Yesuse nfateam bendar cia taga nfan lali gagaw isa ta namliley. Ga smatna lal diyawa be I. Oras ta si rfadukduk re I, si rmario bo rceya I, bo mati I nfateam sina. 43 Gabe Yesuse nua si, "Ya tane nane ifan lali bendare nesana bo Ya bisa ifabinga hawe Abar Mafia ga Jou Lahatalla bo nkawasa ndadi Kolano mali smat ta rdela Ina, ningalena Jou Lahatalla ncula Ya mali dunia tae bo ifabinga Abar Mafia tina."

44 Mana mali, Yesuse nfane nfabinga Abar Mafia mali ebai-ebai sombayang agama Yahudina mali batang Yudea.