1 Apa Teofilus ta ya ihormati aw.

Smatna lale to ta rlefo carita ga ahai ta Yesuse npei na oras ta I nfarerer re itna. 2 Si rlefo farumi tina laisa ta si rlonga mali smat ta dem re mtari piluna. Smat tina ta deme ntuba oras ta farumi tina ndadi i, gabe rfalafo carita tina lali smate nesana. 3 Ya itutuling ikem famafia to farumi carita ta si rlefo mulain mali tagapo. Gabe fola tina ya iyal faorit bo ilefo farumi carita ta ndadi i tona mali cicapo denabe lali cicapo, taga ifayeit lali Teofilus i. 4 Gabe ya ilefo carita tae bo apa mto fatutua, ahai ta smatna rfafcule aw ga Yesus tina fatutua.

5 Oras ta Herodese ndadi Kolano mali batang Yudea, en imam isa mali agama Yahudina ngahnyo Zakharia. I cia isa mali imam ta du Abia. Zakharia ni ngolota ngahnyo Elisabet. Si smat silu tasa imam Harune ntu re bbu si. 6 Mane re maping silu tasine rtubna fatutua molang mali Lahatalla uhngona, fare si rderera ndumi ni fasula fare ni fatfatona, gabe isa pa ta bo nfasala sina. 7 Smat silu tasine dauahleo fare dangolo to, taga nturi pa hawe, ningalena Elisabet bisa nduke ntu pa.

8 Bahnga laitane, imam Abia ni smatna, nduk lowat karajan mali Ebai Sombayang Mamagalca. Gabe mali smat tinana, Zakharia ta nduk lowat bo nleleane Jou Lahatalla mana. 9 I nduk karajan tina ningalena oras tina imam agama Yahudina biasa rcibit lot bo rto ise ta ngahnyona ncapang bo ntaping manyan mali Gagaw ta Jouca nlafo biasa nteteam mana pumul Ebai Sombayang Mamagalca. Ga oras cia Zakharia ngahnyona ta ncapang. 10 Gabe, Zakharia ncung Gagaw ta Jouca nlafo biasa nteteam mana mali Ebai Sombayang Mamagalca, fare npe ni karajanna ntaping manyan, ga potalilna smatna lal ta rcombayang. 11 Garayanna Jou Lahatalla ni malaekatca nfaemi mali Zakharia i. Malaekat cia nosal mali wela mali gagaw ta rtapngo i ai ta pauna mafiaca. 12 Nem tinana, Zakharia engarayan fare namcaitna gaole. 13 Gabe malaekat cia nua i, "Zakharia, aw mati mamcaitna! Jou Lahatalla nlonga to anim sombayangna. Anim ngolota Elisabet osta ntu ca ntub waica man i. Wai cia aw nane mfangahnyo i, Yohanes. 14 Aw osta msangnangna gaole re wai cia, fare smatna lal bena ta rbasamna rcangnang oras ta wai cia ntubna, 15 ningalena i bo ndadi smat mamagal mali Jou Lahatalla uhngo. Oras ta i ntub, i osta ndom pa anggur fare wo nesa ta nmonitna. Oras ta i mali hnye hnyao lolo sube, Jou ni Rohca nkawasa i to. 16 I ta osta nfafcule smat Israelna bo rtaif, bo si rlolai rderera be Jou Lahatalla, si riri Jou i. 17 Wai cia osta ni kawasana mamagal laisa nabi Elia, ningalena Jou ni Rohca nkawasa i to. Gabe i osta nlafo ntuba, Jouca nlafo paubena. I bo npei manna wlorina bo rfamafiyo si re nturina. I ma osta npei smat ta rderera pa Jou Lahatalla ni parentana bo jaga rpei okosesi ta molang. Re laina, i bo nfasiap smatna bo bisa rdadi Jou Lahatalla ni smat."

18 Gabe Zakharia nfautno malaekat cia, "Mfalaisa ya bo ito gabe ya re nik ngolota bo kduke ntumamna? Ga smat am lu tane kauahleo re kangolo tona."

19 Gabe malaekatca nua i, "Ya tane Gabriel ta dorame re wol ya re be Jou Lahatalla bo ileleane i. I ncula ya ifabinga Abar Mafia tae lali awi. 20 Ta ya iku tane, osta bo ndadi i mali ni orasna. Ga aw, ningalena aw mdela pa ta ya ikuna, mulain oras tae, aw bisa mmauting pa, denabe farumi ta ya iku tane ndadi i."

21 Smat lalo ta rcombayang potalilna rtotoman be Zakharia. Si rherang ningalena i namnuna gaole pumul Gagaw ta Jouca nlafo biasa nteteam manaca mali Ebai Sombayang Mamagalca. 22 Oras ta Zakharia ncapang, i bisa nmauting panto. Gabe i nfatailo re kakamo lali smatna ningalena i nmomow. Dem tinana, si rto to i nem paisa pumul Gagaw ta Jouca nlafo biasa nteteam mana mali Ebai Sombayang Mamagalca.

23 Oras ta Zakharia npei ni karajanna fola to, i nuwe lali ni ebai i. 24 Mnu pana, ni ngolota Elisabet reni badan. Gabe ngah silim i be mali ebai lolo. 25 Elisabete nu laitane, "Jouca npo ni mafiana mali ya i. I n'gali ya denabe ya re nik badan, gabe ya imai pa ningalena ya bo ntuke to."

26 Oras ta Elisabete reni badan ngah siwonam, Jou Lahatalla ncula malaekat Gabriel nfan lali bendar isa mali batang Galilea, ta ngahnyo Nasaret. 27 Jouca ncula i nfan lali males isa, ngahnyo Maria. Maria cia nto man paube ga nfajaji re man isa ngahnyo Yusuf. Yusuf tae kolano Daute ntu re bbu i. 28 Malaekat cia nlafo lali Maria i ga nu laitane, "Tabea, maping ta aw! Jouca bo nfaeme ni mafiana lali awi. I osta nfarerer re aw."

29 Maria en garayan oras ta nlonga malaekatca nu lainana. I nututa mali wlona, ni ngale ahai malaekat cia nuna. 30 Gabe malaekat cia nua i, "Maria, mati mamcaitna, ningalena Jou Lahatalla npo ni mafiana lali awi. 31 Bo mnu panto, aw bo renim badan, fare wai ta bo ntubca man i. Aw nane mfangahnyo wai cia, Yesus. 32 I cia bo ndadi smat mamagal, fare smatna osta dololaw I Jou Lahatalla ta nkawasaca ntu I. Jou Lahatalla npei bo I nkawasa laisa Kolano Daut, i hma re bbu tantubana. 33 I osta ndadi Kolano mali farumi smat Israelna ntu re bburi, fare I nkawasa ndadi Kolano denabe lali."

34 Nlonga tina, Maria nua malaekat cia, "Mfalaisa tina bo ndadi ina? Ya tane imales sube, ikamtuli re man bahnga paube."

35 Malaekat cia ncanglo i, "Laitane: lomanta Jou ni Rohca bo nlafo aw. Jou Lahatalla ta tigo molang cia bo nkawasa aw. Gabe wai ta bo ntub cia nmafia fare Jouca ni i, fare smatna bo dololaw I, Lahatalla ntu I. 36 Tina be pa, Elisabet aw tenom cia, makse i nangolo to fare smatna du, i osta nduke ntu pa, ga tane i reni badan ngah si woname to waica mani. 37 Farumi tina osta ndadi i, ningalena Jou Lahatalla bisa npei ahai be."

38 Gabe Maria nua malaekat cia, "Ya tane ipei be okosesi ta Jouca nculana. Gabe makse ta apa muna ndadi i mali ya i." Fola tina, malaekatca nfateam Maria.

39 Mnu pa mali tina, Maria fatoal be nfanna lali bendar isa mali gagaw ta nmapei lolasi, mali batang Yudea. 40 I nfan lali Zakharia ni ebaica. Nlafo pulina, i ncung fare nu tabea lali Elisabet i.

41 Oras ta Elisabete nlonga Maria nu tabeana, wai ta mali Elisabete hnyaoca ngangala, fare Jou ni Rohca nkawasa Elisabet. 42 Gabe Elisabete nu re liona mamagal, "Maria! Jou Lahatalla npo ni mafiana lali awi foloi mali farumi maping! I npo ni mafiana lali wai ta bo ntub mali awica. 43 Ya i sangnangna gaole, ningalena makse ya smat ta nik ngale pa, ga ya nik Jouca hnye nlafo mali ya i to. 44 Nanai, oras ta ya ilonga nim tabeana, ya ntuk ta pumul hnyaok tae ngangala, ningalena i ncangnang. 45 Awe msangnange to, ningalena aw mdela ahai ta Jouca nu tina bo ndadi i."

46 Gabe Maria nu laitane,

"Ya ifamamagal Jou.

47 Ya wlokna sangnangna gaole, ningalena Jou Lahatalla ta nfasalamat ya.

48 Ningalena, I ntarokira ya,

ya tane smat ta nik ngale paisa pa, ya tane ipei be ahai ta I nculana.

Mulain oras tae, farumi smatna bo du ya tane maping ta isangnangna gaole,

49 ningalena Jou Lahatalla ta nkawasa npo ta mafiana mali ya i.

I to ta nmafia re nbirahi.

50 Jou Lahatalla nfafcule ni masiena lali smat ta rdela Ina mali ntu re hbu ta isa denabe ntu re bbu ta nesana.

51 I ni kawasana mamagal gabe npei okosesi ta mafia re birahi.

I nfalelang smat ta rcombongna denabe okosesi ta bo rpeina ndadi i pa.

52 I nfadurea kolanona mali riri kawasana,

taga nlange smat ta riri ngale paisa pana.

53 I npo okosesi ta mafia lali smat ta rcusana denabe nlafo si,

ga lali smat ta rkayangna I ncula si rfan re mati dut fapaisana.

54 I n'gali smat Israelna, smat ta I nfisang si tona bo rpei ahai ta I nculana,

I n'gali si, ningalena I nlolam I ni jaji bo nfaem I ni masiena,

55 mali ite hma re hbur tantuba tina, Abrahame i re ntu re hbuna.

Jaji tina Jou Lahatalla nu ntuba to, fare tina myangis pa denabe lali."

56 Mana, Maria ntetemo Elisabet sal pana ngah sitol. Fola tina, Maria nuwe lali ni ebai i.

57 Ni orasna bo nlafo ito Elisabete ntuca bo ntub, i ntu ta ntubca man i. 58 Smat ta mali Elisabete laporina fare teno re ramana rlonga Jou ca nfaeme ni masiena mamagal lali Elisabet i, denabe I npo wai isa, gabe farumi si rcenga farerer re i.

59 Oras wai cia ni wol piwai, wai cia bo rcunat i rderera agama Yahudi ni fatfatona. Gabe smat ta rdahle sina fare teno re ramana rlafo rfayalo si mana. Si bo rfangahnyo wai cia Zakharia laisa hma ngahnyona. 60 Ga i hnye nailow pa. I nu, "Matina! Nane fangahnyo i Yohanes".

61 Gabe si duwa i, "Ga mali farumi mew ta fatenow fare faramaw tane, isa ngahnyo Yohanes pa." 62 Gabe, si rfatailo lali Zakharia i bo rfautan "Ntum tae bo tfangahnyo i ise?"

63 Zakharia nfatailo ndor fapaisa bo nlefo gabe i nlefo mautingna tane, "I ngahnyo Yohanes". Gabe farumi smat ta si manana ndadi rherang.

64 Oras cia to, Zakharia ndadi nmauting hawe, fare i nfamamagal Jou Lahatalla. 65 Farumi smat ta rteteam rdahle manana rdadi rherang fare damcait. Gabe farumi ta ndadi i tina, smatna dafetang denabe mali farumi batang Yudea ta nmapei lolasna. 66 Farumi smat ta rlonga abar ciana dututa mali wlori, "Osta ndadi ahai wai cia gabe laisa i nmamagal?" Si dututa lainana, ningalena si rto Jou ni kawasana nfarerer re wai cia.

67 Fola tina, Jou ni Rohca nkawasa Zakharia, Yohanese hma. Fare Zakharia nfabinga ahai ta Jou Lahatalla nua i na,

68 "Mali bo tfamamagal Jou Lahatalla, smat Israelna rir Jou i! Oras tae I nlafo bo n'gali I it smat Israel, bo nfabebas it.

69 I ncula Smat* isa ta ncicoal bo nfasalamat it.

Smat cia Kolano Daute ntu re hbu i.

Kolano Daut cia tantuba, smat ta jaga npei ahai ta Jou Lahatalla nculana.

70 Jou Lahatalla njaji ntuba to,

gabe Jou ni nabina ta rfabinga ni jajina laitane:

71 Jouca bo nfabebas it

mali rir lawanna fare mali smat ta rkawasa ta riri le itna.

72 Jouca npei laina, ningalena I nlolam ta I jaji mali ite hma re hbur tantubana.

I nlolam I ni jaji ta mafia re birahi tina ni lalingna nfaem I ni gogoruna lali sili.

73 Jaji ta Jou Lahatalla nu tina fare ncasi mali Abraham i, ite hmar re hbur ta ntubaca,

74 I njaji, I bo nfabebas it mali smat ta rlawang it na.

Fare laina, ite osta tbasamna tamcait panto bo tfamamagal Ina.

75 Fare ite ttub ta mnuwo tae, ite ttubna tpei be okosesi ta Lahatalla ni mauna, fare ttub na tpei be okosesi ta tutuo mali Jou Lahatalla uhngo."

76 Fola tina Zakharia nua Yohanes,

"Ga aw, ya ntuk aw,

osta smatna bo du aw tina Jou Lahatalla ta tigo molangca ni nabi ta jaga nfalafo I ni fatnaw lali smatna.

Si du laina ningalena aw mlafo ntuba mali dunia tae aw re Jou cana, bo mfasiap smatna wlorina bo dailow I.

77 Aw ta bo mfabinga Jou Lahatalla ni smatna,

I bo nfasalamat si fare ni lalingna bo nampung si mali riri dosana.

78 Ite rir Jou Lahatalla nmasie it, nlafo mali sorogai mali bo nfasalamat it.

I nlafo tina, osta ndadi laisa wolca bo ncana,

79 bo npo plangan.

I cia nlafo bo nfaplangno smat ta rtub pumul dororam cana,

fare smat ta rtub re rbasamna damcait.

I bo nlafo it bo ite tto laling ta ttub ta npei ite wlorina tengtengan."

80 Zakharia ntu cia wol de wol nbang i be nmamagal, fare Jouca npei wlona ga nbang i be ncicoal. Denabe i nmamagal, i nteteam mali padang gurun, gagaw ta namliley fare laspa mali pnu i, denabe i nfafcule smat Israelna, taga i nfateam gagaw cia.