1 Oras cia, smat Yahudina riri Wol Mamagal Roti ta rpake Ragi Paca ndahle to. Wol cia ta si du Paska, wol ta si rlolam oras ta Jou Lahatalla ni mafia nfabebas hma re bburi ta ntuba oras ta rfasusa si mali Mesirna. 2 Imam ta rfaboboko re guru agama Yahudi ta rto ndumi musa ni kitab silim tasa, rfauwo si bo rpun famat Yesus ni lalingna rgogogan si, ningalena si damcait smat lalo ta rlokolo Yesusna.

3 Isa mali Yesus ni murit yafasa re silu tasa, i ngahnyo Yudas Iskariot. Oras cia, setane ni kolanoca ncung Yudase wlona. 4 Gabe Yudase nfan lali imam ta rfabobokona fare ta rjaga Ebai Sombayang Mamagalcana bo nua si, bo nwage Yesus lali sili. 5 Si rcenga fare rfajaji bo rpo tiwi lali Yudas i. 6 Yudase ma nailow. Fare mulain oras cia, i niyawa oras ta mafia bo bisa npo Yesus lali sili, re smat laloca nto pa. Yudas nwage Yesus re nfatan i

7 Gabe nlafo i to ni orasna, smat agama Yahudina bo rpei si riri Wol Mamagal Roti Ta Npake Ragi Paca. Wol cia, smat Yahudina nane rkati domba Paska bo rlolam oras Jou Lahatalla nfabebas hma re hburi ta ntuba ta rfasal si mali batang Mesirna. 8 Gabe Yesuse ncula Petrus re Yohanes, I nu laitane, "Ffane to, ffasiap an Wol Mamagal Paskaca, bo ite tceli farerer."

9 Gabe smat silu tasa rfautno Yesus, "Manca gagaw ta Aw mu bo amam kfasiapna?"

10 Yesuse nua si, "Oras ta mew fsung bendar Yerusalem, mew osta ffadukduk re smat isa ta npapa tampayang lolo waya. Mew fderera i denabe i ncung mali ni ebaica. 11 Fare fua smat ta ni ebaica laitane, ‘Nimam Guruca ncula kfautan, manca gagaw ta Guruca bo npake i bo rceli dan an wol mamagal Paska farerer re I ni murit-muritnaca?’ 12 Gabe smat cia osta nfafcule mew gagaw isa puis ta nmamagal re farumi okosesina ene to mana. Mew ffasiape to anna mana."

13 Rlonga Yesuse nu hola laina, Petrus i re Yohanese rfan, fare rduk tina laisa re ta farumi Yesuse nua sina. Gabe si rfasiap an Wol Mamagal Paskaca.

14 Gabe ni orase to bo rceli mali Wol Mamagal cia, Yesuse ntotolang nceli farerer re I ni susulana. 15 Yesuse nua si, "Mali wol mamagal Paska tae, Ya ilokolona gaole ikan an wol mamagal farerer re mew ta ikangela paube tane. 16 Ningalena Ya ikuwa mew: morco tane Ya iseli ikan an wol mamagal mantanena denabe wol mamagal Paska tae ndadi i ndumi to taga tfadukduk hawe mali oras ta Jou Lahatalla nkawasa ndadi kolano mali I ni smatnana."

17 Fola tina, Yesuse nyal cawan isa lolo anggur fare nu tarima kase nais Jou Lahatalla i, taga I nua ni murit-muritna, "Fyal tane, bo mew smat isa-isa fdom. 18 Flonga famafia ta Ya iku tane, mantane bo lali, Ya osta idom panto anggur tane. Ga lomane oras Jou Lahatalla nkawasa ndadi Kolano mali I ni smatna, taga Ya idom hawe."

19 Gabe Yesuse nyal rotina, taga nu tarima kase nais Jou Lahatalla i. I nfawog-wogla rotina fare npo lali sili, I nu, "Roti tane, Ya nik badanca ta Ya ipo lali mewi. Fan tane bo flolam Ya!" 20 Laina bena rceli hola, Yesuse npo cawan ta lolo anggurca lali I ni murit-muritna. I nu, "Anggur ta pumul cawan tae, Ya nik laflaf ta maraepa bo fatutua Jou Lahatalla ni jaji ta pona. Gabe Ya nik laflaf ta maraepa tina ndadi nfatuo, Jou Lahatalla ni jaji bo smatna ndadi i to.

21 Ga flonga famafia, smat ta bo nwage Yaca, oras tae nceli nfarerer re it mantane. 22 Fatutua Smate Ntu ta mali sorogai malica osta nmat laisa re ta Jou Lahatalla nfato ntuba tona, ga nbodito to smat ta nwage Smate Ntu ta mali sorogai malica, i osta nduk salsal ta tebteb." Yesuse nceli farerer re I ni murit-muritna

23 Rlonga tina, Yesuse ni murit-muritna mulaine rfaututan, ise mali sili ta osta npei lainaca.

24 Gabe, Yesuse ni murit-muritna mulaine rfakotale ise ta ndadi smat ta nmamagal foloi mali farumi si. 25 Gabe Yesuse nua si, "Kolano-kolano mali bangsa-bangsa ta rfayala Jou pana, si rfaboboko riri rayatna re cicoal, makse laina si dailow smatna du, ‘Si tina rlokolo rgali si riri rayatna.’ 26 Ga mew mati fiyawa kawasa bo ffaboboko fparenta smatna. Ise mali mewi tane ta bo ndadi smat ta nmamagal mali Jou Lahatalla uhngo, i nane nfanene i laisa smat ta ni ngale paisa pana. Gabe ise ta bo ndadi nfaboboko, i cia nane laisa smat ta jaga nleleane smat. 27 Co mew ffikir ise ta nmamagalna foloi, smat ta ntotolang ncelica, pare ta nleleane ica? Smat ta ntotolang ncelica? Ga Ya mfalaina pa, oras ta Ya mali fapaluwno mewna, Ya ta ileleane mew.

28 Oras ta Ya iduk kangelana, mew jaga farerer re Ya. 29 Gabe tina, Ya bo ipo mew kawasa bo fkawasa laisa re Ya nik Apa npo kawasa mali Ya ina. 30 Re laina, oras ta Ya ikawasa idadi Kolano mali Ya nike smatna, mew osta fseli re fdom mali mejaca farerer re Ya. Gabe, mew osta ftotolang puis kolano gagaoca bo furuse suku yafasa re silu ta mali Israel tasa."

31 Yesuse nua Simon Petrus, "Simon, Simon, co mlonga! Setanna riri kolanoca ndor lali Jou Lahatalla i, bo ntohnga mew bo mew mati fdela Yana to. Tina laisa re smat ta rtapis gandum rfara mali ni gicoca. 32 Ga Ya isombayang bo aw mdela Ya, bo nim ta mdelana mati mnyangisna. Aw osta mtaul Ya, ga oras ta mdela Yana cicoal hawe, aw nane mfacicoal tenom re ramamna wlorina bena bo si rdela Ya."

33 Simon Petruse nua Yesus, "Jou, makse ya isung bui, ya isiap. Ya ma isiape imat farerer re Aw!"

34 Ga Yesuse nua i: "Mlonga famafia ta Ya ikuwa aw tane, Petrus, doram tae tataleca rkuku paube, aw faicole to, mu mfayala Ya pana."

35 Fola tina, Yesuse nua I ni murit-muritna laitane, "Ta ntuba, oras ta Ya isula mew fabinga Abar Mafia mali Jou Lahatalla ina, ga Ya iku mati ffut tiwi gagaona, tas fare sandalna. Oras cia, mew fsusa ahai?"

Si rcanglo, "Enpa, amam ksusa paisa pa."

36 Gabe Yesuse nua si, "Ga oras tae laina pa, ise ta ni tiwi gagao ma tas, nane i nut, fare ise ta ni eta pa, i nane nwage ni jubaca bo bisa ngon eta fapusa. 37 Ya ikuwa mew, ahai ta Jou Lahatalla njaji mali I ni kitabca bo Yana, meman bo ndadi i to. Tane ta rlefo mali I ni kitabcana,

‘Smatna du, I cia smat mayai i.’

Ningalena ahai ta rlefo bo Ya na, tane, farumi tina bo ndadi i."

38 Gabe Yesuse ni murit-muritna duwa I, "Guru, co mem, tane en eta silu."

Yesuse nua si, "Laona to."

39 Gabe Yesuse ncapang nfanenowe bendar cia, re biasa, I nfan lali popo Zaitun. Ni murit-muritna ma rderera I. 40 Oras si rlafo mali gagaw cia, Yesuse nua si, "Mew fsombayange to, bo mati setanca nyakule mew fpei dosana."

41 Gabe Yesuse nfalaspa i mali sili sal pana meter yafatol laona. Fare naftiba pupuo tasa nap taga ncombayang, 42 "Ya Apa, laisa Apa mailow, Apa mfalaspa farumi kangela tane mali Ya i. Ga mati mderera ta Ya iku nana, mderera be ta Apa nuna." 43 Gabe malaikat isa mali langitca, nfaemi lali Yesus i bo npo I cicoal. 44 Yesuse wlona kangelana gaole fare I ncombayangna ta tutuwo. Ni sagige ta marapawil nap nyinyencana laisa re laflafna. Yesuse ncombayang mali popo Zaitun

45 Gabe ncombayange hola, Yesuse nosal taga nfulasi lali ni murit-muritna. I nem si damtowal ningalena damgai re wlorina kangela. 46 Gabe, Yesuse nua si, "Pesaga mew famtuli? Fpaling fare fsombayang, bo mati setanca nyakule mew fpei dosana."

47 Oras ta Yesuse nmauting sube, smatna lal ta rlafona, fare murit ta ngahnyo Yudas, isa mali Yesuse ni murit yafasa re silu tasa, i ta i potao molang. Yudase ndahle Yesus bo nfatan I. 48 Ga Yesuse nua Yudas, "E Yudas, aw mfatan Ya tane, aw bo mwage Smate Ntu ta mali sorogai malica?"

49 Oras ta Yesuse ni murit-murit ta nesana dem ahai ta osta ndadi tina, si du, "Guru, ga amam nane kpake eta bo ktota si beto?" 50 Fare isa mali Yesuse ni murit-muritna ntota imam mamagalca ni smat karajan isa kanyo welana denabe morit.

51 Ga Yesuse nu, "ffola to!" Gabe, Yesuse nkawce smatca kanyona fare nfamafia i kanyona.

52 Gabe Yesuse nua imam ta rfabobokona, fare ta rfaboboko rjaga Ebai Sombayang Mamagalcana, fare simosimo Yahudi ta rlafo bo rwagfo Ina. I nu, "Mew ffikir Ya tane smat mayai ya, denabe mew ffut eta re ai bo fwagfo Yana? 53 Naga, wol de wol Ya mali hapaluwno mew mali Ebai Sombayang Mamagalca ni kintalna lolo, ga mew fwagfo ya mana pa. Ga inanai to. Tane to i ni orasna mew bo fwagfo Ya, re hawe ni orase to bo setan-setanna riri kolanoca nfafcule i ni kawasa dororamna."

54 Gabe, smat ta rlafo tina, si rwagfo Yesus taga dute rcapnga I mali tina. Si dut I rfan lali imam mamagalca ni ebai i, ga oras cia, Petrus en nderera si nalaspa. 55 Mali imam mamagalca ni kintalna hapaluan, smatna rpei yap fare si rtotolang jel yapca. Petrus bena ntotolang farerer re si. 56 En leleyane maping isa, nem Petrus ntotolang ndahle yapca. I ntarokira Petrus famafia, gabe nua smat ta manana, "Smat tae bena nfarerer re Yesus."

57 Ga Petruse npida, nu "Enpa, ya ifayala I pa!"

58 Ga mnu pana, en smate nesa isa nem Petrus gabe i nu, "Awe ma jaga mfarerer re sil bena!" Ga Petruse nu, "Enpa, ya pa cia!"

59 Fare mnuona laisa tok bahnga, holana, smate nesa isa hawe nu re nfacicoal i, "Fatutua to, smat tae bena nfarerer re Yesus, ningalena i bena smat Galilea i."

60 Ga Petruse npida, i nu "Enpa, ya ito pa ahai ta aw mu tina." Gabe oras tina to, tataleca ma nkuku. Petruse nu nfayala Yesus pa

61 Gabe, Jou Yesuse ntoi i lali Petrus i. Gabe Petruse nlolam ta Yesuse nua ina, doram cia tataleca nkuku paube, i npida faicole to, nu i nfayala Yesus pa. 62 Nlolam tina, Petruse nfan natalil fare ntangisna nmasisewle.

63 Gabe smat ta rtahan Yesusna, rmulaine rfamaimai Yesus. Si rpun I, 64 si rpitane mtana rpake kaing fare rfautno I, "Gabe aw fatutua nabi ta mut Jou Lahatalla ni fatnaw, co mu ise ta npun Aw tae?" 65 Fare lal sube maumauting ta si du bo rfamaimai Ina.

66 Oras ta dororam i sube, simosimo Yahudina, fare imamna riri ta nfabobokoca, re guru agama Yahudi ta rto Musa ni kitab silim tasa, farumi rfayalo si bo durus Yesuse ni halna. Si tina ngahnyori Mahkama Agama. Gabe en ta dut Yesus bo nbo si. 67 Gabe mana, si rfautno I, "Co Aw mfabinga amam. Gabe Aw tane fatutua Mesias, Kolano ta Jou Lahatalla njaji ta ntuba be?"

Yesuse ncanglo, "Makse Ya ifabinga mew, ga mew osta fdela pa. 68 Fare makse Ya ifautno mew, ga mew osta fsanglo pa. 69 Gabe mulain oras tae, Smate Ntu ta mali sorogai malica ntotolange to mali gagaw ta daragaica, mali Jou Lahatalla ta nkawasa molangca ni welana."

70 Rlonga tina, si farumi du, "Gabe laina, Aw tane Lahatalla ntu Aw?"

Yesuse ncanglo si, "Mewe to ta fu lainana."

71 Gabe si du, "Ite tlonga to I ni mautingna, I npei I ni dirica laisa Jou Lahatalla! Gabe, ite matina to tiyawa saksi hawena, ningalena ite eto to I ncal gabe nane nmat!"