1 Oras cia, en kolano mamagal Roma, i ngahnyo Agustus. I ncapnga parenta mali farumi batang ta i nkawasana, bo farumi smatna rfasunge ngahnyori. 2 Taga bahnga tane pamarenta Roma rfasunge smatna oras ta Kirenius ndadi gubernur mali batang Siria. 3 Farumi smatna nane rfan lali riri bendar ta si hma re hnyeri tantuba rtetemo bo rfasunge ngahnyori. 4 Laina bena re Yusuf. I nfan mali Nasaret ta i ntetemona mali batang Galilea, gabe i nfan lali Daute ni bendar ta mali batang Yudea, ta ngahnyo Betlehem. Yusufe nfan lali mana, ningalena i cia kolano Daute ntu re bbu i. 5 Yusuf i re na tunangan ta bo nfasawa ica Maria, rfan farerer bo rfasunge ngahnyori pulina. Oras tina, Maria reni badan.

6 Oras ta si mali Betlehem, ga ni oras Maria ntuca bo ntub. 7 Maria ntuca ntub waica man i, wai ta uwati. Fola tina i nopi i re obat waica, taga nfatuli i mali aiwanina rari an gagaona, ningalena farumi ebai ta manana bakbaka re smate to.

8 Doram cia, en smat ta rjaga riri dombana mali gagaw ta ni mom mali batang ta ndahle bendar Betlehem. 9 Garayanna si dem Jou ni malaekatca nfaemi lali sili. Fare, Jou ni plangnona ntabak si, gabe si damcaitna gaole. 10 Ga malaekat cia nua si, "Mati famcaitna! Flonga famafia. Ya ilafo mali tane bo ifabinga abar ta mafia lali mewi. Abar mafia tae npei farumi smat ta rlongana wlorina sangnang. 11 Abar mafia cia laitane: Wol tae, Smat ta bo nfasalamate smatca ntube to. I ntub mali Betlehem, kolano Daute ni bendarca. I cia smatna dololaw i Kristus, Kolano ta Jou Lahatalla njaji bo nfasalamate mew. I to Jouca. 12 Lomanta mew osta ffayala I re fafayal tae: mew osta fem wai isa dopi i re obat. Wai cia si rfatuli i mali aiwanina rari an gagaona."

13 Nu fola tina, n'garayan be en hawe malaekat mali sorogai malina lalna gaole rfaem si, si rfarerer re malaekat isa cia rfamamagal Jou Lahatalla, laitane,

14 "Tfamamagal re tcuba Jou Lahatalla ta i mali sorogai!

Ga mali dunia tae, Jou Lahatalla osta npo wlow ta tengtengan lali smat ta rpei Jou Lahatalla wlona sangnangna."

15 Rfola rfamamagal Jou Lahatalla laina, malaekat tina rlolai hawe lali sorogai. Gabe smat ta rjaga dombana rfauo si du laitane, "Mali bo ite tfan lali Betlehem bo tem ahai ta Jouca nua it nanaina."

16 Gabe si damalela be rfan Betlehem. Pulinana, si rfadukduk re Maria re Yusuf. Si dem i bena wai nena cia namtuli mali aiwanina rari an gagaoca. 17 Oras ta si dem wai cia, si rfabinga smat ta mana farumi ahai ta malaekatca nua si bo wai ciana. Malaekatna rfabinga Yesuse ntube to

18 Farumi smat ta manana ndadi rherang oras ta rlonga smat ta rjaga domba tina dafetangna. 19 Ga Maria nisinge ndumi ta ndadi i tina mali i wlo fare i nfikir famafia ndumi tina. 20 Fola tina, smat ta rjaga dombana rlolai hawe lali riri dombana. Si rfamamagal fare rcuba Jou Lahatallana rfola pa, ningalena farumi ta si rlonga fare dem tina, laisa ta malaekatna duna.

21 Oras ta wai cia ni umur wol piwai, I nane nduk sunat, rderera agama Yahudina riri fatfatona. Fare si rfangahnyo I, Yesus, laisa ngasan ta malaekatna dua Maria oras ta i re ni badan paubena. 22 Yesuse ntube hola mnuwona wol yafafat, Maria i re Yusuf nane rfan Yerusalem bo rfaberesi riri badan rderera fatfato ta mali Musa ni kitab silim tasa. Gabe si rfan mali bendar Yerusalem fare dut Yesus bo rpo I lali Jouca, 23 laisa re fatfato ta rlefo mali Musa ni kitab silim tasa laitane,

"Ga wai man ta uatna, i nane rpo i lali Jouca, bo ndadi Jouca ni i."

24 Fare si bena rpo mani tekukur pasang pusa penepa mani pombo ta wawayo subena silu bo ndadi sadaka aiwani, rderera fatfato mali Musa ni kitab silim tasa.

25 Oras cia mali Yerusalem, en smat isa ngahnyo Simeon. I cia ntubna molang mali Jou Lahatalla uhngona fare i nlonga be Jou Lahatalla. Fare i ntotoman oras ta Jou Lahatalla bo nfasalamate smat Israelna. Fare Jou ni Rohca nfarerer re i. 26 Jou ni Rohca nfabinga i, i osta nmat pa gabe laisa i nem Mesias paube, Kolano ta Jou Lahatalla njaji bo nfasalamate smatca. 27 Gabe oras ta Yusuf i re Maria bo rcung Ebai Sombayang Mamagalca ni kintalna, gabe Jou ni Rohca ncula Simeone nfan mana. Simone i lali bo nem Yusuf i re Maria bo rpo Yesus lali Jou Lahatalla i, rderera fatfato ta mali Musa ni kitab silim tasa.

28 Oras ta Simeone nem Wai cia, i nyali ga n'gopi, fare nfamamagal Jou Lahatalla. I nu,

29 "Ya Jou,

popiseina Jou mjaji ya, ga tane Jou nim jaji tina ndadi i mali ya i,

ya ta jaga ipei ahai ta Jou msulana.

Gabe tane, biare to ya imat re wlokna tengtengan.

30 Ningalena ya ikema re mtak pilu smat ta Jou Lahatalla ncula i bo nfasalamate smatca.

31 Smat ta bo nfasalamate smat cia,

Jou Lahatalla npake i bo smat mali farumi sukuna bisa rcalamat.

32 Smat cia osta laisa planganna, bo smatna rderera i. Gabe smat na rderera I to, osta smatna rfamamagal fare rcuba Jou Lahatalla ni smatna, smat Israel."

33 Rlonga Simeone nu laina, Yusuf i re Maria ndadi rherang. 34 Gabe Simeone ncombayang bo Jou Lahatalla npo ni mafiana lali Yusuf i, Maria fare wai cia. Fare nua Maria, Wai cia hnye, "Poko be Wai tae, smat Israelna lal ta rdela pa gabe rduk sal mali Jou Lahatalla i, ga lal bena smat Israel ta nesana si rdela gabe rduk salamat. Wai tae ndadi fafayal i, I imali Jou Lahatalla i mali, ga smatna lal ta dailowi pa. 35 Gabe laisa I nlafo, smatna dailowi pare dailo pa osta bo tto wlorina. Ga aw Maria, osta wlomna ncusa ningalena Wai tae, laisa smatna rcuceo nam pega isa lali ulamna."

36 Mali Ebai Sombayang Mamagal ciana mana en bena maping isa nangolo to, ngahnyo Hana. I cia nabi i, ta jaga nfalafo Jou Lahatalla ni fatnaw lali smatna. Hana tae hma ngahnyo Fanuel ta rderera sogaro Asyer. I nfasaw bahnga to nfarerer re ni uat cana taun faifit. 37 Ga i ni uatca nmate to, gabe i nbalo. I ni umurna taun yafawai re pifat. I bahnga paube nfateam Ebai Sombayang Mamagalcana. Dorame re wol i ncuba be Jou Lahatalla. I jaga npuasa fare ncombayang. 38 Oras ta Simeon re Yusuf fare Maria rmau-mautingna, Hana nlafo mana fare i nmulaine ncuba Jou Lahatalla. Fare nfabinga Wai cia lali farumi smat ta si manana ta rtotoman Kolano ta Jou Lahatalla njaji bo nfasalamat smat Israelnaca.

39 Laina Yusuf i re Maria rpei fola ndumi okosesi ta rderera Jou Lahatalla ni fatfato mali Musa ni kitab silim tasana, si farumi duwe lali riri ebai i mali bendar Nasaret, mali batang Galilea. 40 Fare, Yesuse wol de wol nbang i be nmamagal fare ndadi ncicoal. I ma ndadi smat ta nto okosesina lal, fare Jou ni mafiana mamagal lali I ina.

41 Etnga be taun, Yesuse hma re hnye tasa rfan lali Yerusalem bo rderera agama Yahudina riri Wol Mamagalca ta si du Paska. Wol mamagal cia si rlolam oras ta Jou Lahatalla ni mafia nfabebas hma re bburi ta ntubana oras ta rfasusa si mali Mesirna. 42 Oras ta Yesuse ni umur taun yafasa re failu, I hma re hnye tasa rfan lali Yerusalem rderera wol mamagalca laisa biasa be. Oras ciana, si dut Yesus. 43 Laina wol mamagal cia nmaralapis, Yesuse hma re hnye tasa rmulaine duwe lali Galilea. Si rto pa Yesus I mali Yerusalem sube, 44 Ningalena si du nama Yesuse nfan nfarerer re smate nesa ta rfanna. Laina si rfanna wol pusa to, taga si diyawa Yesus mali si tenori re ramarina fare smat ta rfayala sina ta orasca rfanfan tina. 45 Ga si rduk I pa. Gabe si rlolai hawe lali Yerusalem bo diyawa I pulina. 46 Ni wol pitol, taga si rduk I mali Ebai Sombayang Mamagalca po talilna. I ntotolang guru agama Yahudina rfapaluno I, nlonga fare nfafautno si. 47 Farumi smat ta rlonga Yesuse ni nmautingna, si rdadi rherang, ningalena I ntaif fare I ncanglo ahai ta rfautno I na fatutua ndumi. 48 Dem tina, Yesuse hma re hnye tasa ndadi rherang. Gabe I hnye nua I, "Yesus, apa i re mama damcaitna gaole, ame kningo Awna lali re mali. Pesaga Aw mpeo apa i re mama laitanena?"

49 Yesuse nua si, "Apa aw re mama mati fningo Yana. Ningalena apa aw re mama fto to, Ya tane nane Ya mali Hmakca ni Ebaica." 50 I nu laina, ga si rtaif pa ni ngalena.

51 Fola tina, Yesuse nuwe lali Nasaret nfarerer re si, fare I ma nlonga be hma re hyena. Ga I hnye nlololam ahai ta Yesuse nuna gabe wlona nfaututan tina ni ngale ahai. 52 Yesuse nbang i be nmamagal fare nto okosesina lal. Jou Lahatalla nbange n'gogoru i, fare ni mafiana foloi mali smat ta rcangnang re Ina. Yesuse i re guru agamana mali Ebai Sombayang Mamagalca