1 Bahnga tane, Yesuse nfafcule mali Ebai Sombayang Mamagalca. Fare I nfabinga Abar Mafia mali Jou Lahatalla i. Oras ta Yesuse nfafculena, imam ta rfabobokona, guru agama ta rto ndumi Musa ni kitab silim tasa, re simosimo agama Yahudina rlafo puli tina. 2 Si rfautno Yesus, "Co Aw mfabinga am, farumi ta mpei tina, Aw mduk kawasa manca mali? Fare ise ta npo kawasa tina mali Awi?"

3 Yesuse nua si, "Ya bena bo ifautno mew. Co mew fuwa Ya. 4 Ise ta npo kawasa lali Yohanes i denabe ncisope smatna? Jou Lahatalla, pare smatna?"

5 Rlonga laina, si rfauwo laitane, "Laisa ite tu, ‘Jou Lahatalla ta npo kawasa,’ I osta bo nua it, ‘Pesaga mew fdela Yohanes pana?’ 6 Ga laisa ite tu, ‘Smatna ta rpo kawasa,’ farumi smat tane osta rtig famat it re pat, ningalena si rdela, Yohanes tae nabi ta jaga nfalafo Jou Lahatalla ni fatnaw."

7 Gabe si duwa Yesus, "Amame kto pa ise ta npo kawasa lali Yohanes i."

8 Gabe Yesuse nua si, "Gabe mew ffabinga Ya pa, Ya ma ifabinga mew pa, ise ta npo Ya kawasa ipei farumi tina."

9 Yesuse nafetang andeande isa lali smat lalo tina laitane, "En smat isa npei bet anggur, taga i nfauwo re smat isa hawe ta bo nkarajan mali bet tinaca re bo njaga betnaca. Hola tina, i nfan lali batang nesa taga nteteamna mnu pulina. 10 Oras anggurna neta bo rfakati to, i ncula ni smat karajan isa lali smat ta rjaga bet ciana, bo si rpo ina lowloat mali betca ni okosesina. Ga smat ta rjaga bet ciana rpun smat cia, taga rcula i nuwe re nut paisa pa. 11 Fola tina, smat ta na bet cia ncula ni smat karajan ta nesana hawe. Ga i ma nduk punpun, re rfamaimai i, re dua i nuwe re nut paisa pa. 12 Gabe, smat ta na bet cia ncula ni smat karajan ta nesana hawe, ga i ma si rpun i denabe nyabate ndumi, taga rtigea i mali bet tina natalil.

13 Gabe smat ta na bet cia nu laitane, ‘Ya nane ipei ahai e? Mafiana ya isula ntukca, ta ya igogoru ica. Osta si rhormati i.’

14 Ga oras smat ta rjaga bet ciana dem smat ta na bet cia ntuca, si rfauwo, re du, ‘I tae to ta ndadi ina waris bet taneca. Gabe, mali ite tpun famat i, bo bet tane ndadi ite rar.’ 15 Gabe si rdasi natalil mali bet tina taga rpun famat i."

Gabe nafetange hola andeande cia, Yesuse nfautno smat ta manana, "Tane, smat ta na bet cia bo npei ahai lali smat ta rjaga bet ciana? 16 Osta I nlafo bo npun famat si. Hola tina, i npo lali smate nesa bo rjaga ina bet cia."

Rlonga Yesus nu laina, si rtaif Yesus nfatailo si laisa smat ta rjaga bet tina ta rpun rfamat ta na bet cia ntuca. Gabe si tina du, "Matina! Mati fpun famat i na."

17 Ga Yesuse nyelyelo si fare nu, "Makse mew fu mati fpun famat ina, ga mfalaisa re ta rlefoe to mali Jou ni Kitab taena,

‘Pat ta smatna rpei ebai rpake pana,

tina ndadi laisa pat fandasi ta mafia re cicoalna gaole.’

18 Ise ta npawil i puis pat tina, i osta namjakam. Re ise ta pat tina ntabi i, i osta nbange namjakam."

19 Guru agama Yahudi ta rto ndumi Musa ni kitab silim tasa re imam ta rfabobokona, si rtaif andeande ta Yesus nu i nanaica nu smat ta rcula si rjaga bet ciana, I nu tina ntelmo si. Gabe tina, si rmario bo rwafo Yesus ga si damcait smat lalo ta en manana.

20 Guru agama Yahudi ta rto ndumi Musa ni kitab silim tasa, re imam ta rfabobokona, si diyawa laling bo rwafo Yesus, gabe si rtarokira be I. Gabe si rcula smat sifis rning-ningo I. Si tina rdarawa rdadi smat mafia, bo si diyawa Yesuse na sal. Si rmaulango I nmautingna ncal bo si bisa rfabinga lali gubernur ta ni kawasa nuruse smatca. 21 Gabe si mulaine rfautno Yesus laitane, "Guru, amame kto, farumi ta Guru mu re ta mfafcule tina fatutua. Guru ma mlokolo pa miyawa uhngom mali smatna. Langisa Guru mfafcule be ta tutuona, mfalaisa ttub tderera Jou Lahatalla wlonana. 22 Gabe tane, amam bo kfautno Guru, laisa tderera animam agamaca ni fatfatona, bisa pare bisa pa amam kpalas pajak lali kolano mamagal Romacana?"

23 Ga Yesuse nto si wlori ta bo rdarawa Ina, gabe I nua si laitane, 24 "Co ffaemo Ya tiwi ta mew jaga fpake fpalas pajakna. Ise ni gambar re ise ngahnyo mana?"

Si rcanglo, "Kolano mamagal Romaca ni gambar re ngahnyo!"

25 Gabe Yesuse nua si, "Gabe laina, fpo to lali Kolanoca ahai ta mew nane fpo ina, re fpo to lali Jou Lahatalla i ahai ta mew nane fpo lali Jou Lahatalla ina!"

26 Rlonga ahai ta Yesuse nu tina, si ndadi rherang gabe liori pa. Ningalena, si rduk I na salna pa mali smat lalo tina uhngorina.

27 Hola tina, en smat sifis agama Yahudi mali fatfato Sadukina, rlafo lali Yesus i. Fatfato Saduki tane ta rdela pa, smat ta rmatna osta rpaling hawena. Gabe si rfautno Yesus laitane, 28 "Guru, tantuba nabi Musa nparenta, man ise be ta nfasawe to ga nmat ntu pa, i tenona faisa nane nfasawa re i ni balo cia bo teno ta nmat cia en ntu bena. 29 Ga bahnga ndadi i laitane: en smat man sifit rfatenow. Ta uwatica nfasaw re maping isa ga nmat ntu pa. 30 Gabe maping cia nfasaw hawe re teno ta papapo ica, ga i ma nmat ntu pa. 31 Laina bena re silu tasa papaporica, re laina to denabe smat sifit tasa rfasawa i ndumi. Si farumi rmat nturi pa. 32 Ni morco napna, maping cia ma nmat. 33 Gabe, tane amam bo kfautan, lomanta mali wol kiamatca, oras ta Jouca nfapaling hawe farumi smat, ta manca molang mali si smat sifit tasa ta ndadi maping cia ni uwatica? Ningalena, smat sifit ta rfatenow tasa farumi rfasaw re i!"

34 Gabe Yesuse nua si, "Smat ta rtub mali dunia tae rfasaw, 35 ga smat ta Jou Lahatalla nu pantase rtub hawena, si tina lomane I bo nfapaling si, re si tina rfasaw panto. 36 Ningalena, si rtub laisa re malaekatna re si rmat panto. Si tina rdadi Jou Lahatalla Ntu, ningalena I ta nfapaling si hawe. 37 Gabe laisa smat ta rmat ga rpaling hawena, nabi Musa nfabinga to tina, oras ta i mali mom sogana lapo ta lolob. Oras cia, Jou Lahatalla nu lali nabi Musa i laitane, ‘Ya tane to Jou Lahatalla ta Abraham, Ishak, re Yakub jaga rcuba.’ 38 Oras Jou Lahatalla nu laina, Abraham, Ishak, Yakub rmate to. Ga makse si rmate to, si rtub hawe to re Jou Lahatalla. Re laina, fatutua, Jou Lahatalla cia smat ta rmatna riri Jou i pa, ga smat ta rtubna riri Jou i."

39 Rlonga tina, guru agama Yahudi sifis ta rto ndumi Musa ni kitab silim tasa du laitane, "Guru, Guru msanglo tina fatutuana gaole." 40 Mana mali, si damcaite to rfautan ahai lali Yesus ina.

41 Gabe Yesuse nua si laitane, "Ta smatna jaga du, Mesiasca, Kolano ta Jou Lahatalla njaji ica, I cia kolano Daute ntu re hbu i. Ga I be Kolano Daute ntu re hbu Ina? 42 Ningalena kolano Daut bahnga nu Jou Lahatalla ni jaji bo Mesias tina mali Kitab Mazmur laitane,

‘Jou Lahatalla en nu lali ya nik Jouca laitane:

Mtotolange to mali gagaw ta daraga i, mali Ya nik wela tane.

43 Denabe Ya ifakala ndumi nim lawanna.’

44 Gabe laisa kolano Daute nu Mesias cia i ni Jou i, enpa Mesias cia kolano Daute ntu re hbu i be pa?"

45 Oras ta smat laloca rlonga sube Yesuse ni mautingna, Yesuse nua I ni murit-muritna, 46 "Mew nane wlomew yaneto re guru agama Yahudi ta rto ndumi Musa ni kitab silim tasa, si tina laisa rfan, rlokolo rpake kabaya mlanga ta rfaem si smat ta riri ngale, fare si rlokolona gaole smatna rhormati si mali smat lalo uhngori. Laisa mali ebai sombayang re mali rame seli, si tina rlokolona gaole rtotolang potao mali gagaw ta daragana. 47 Si ma rlokolo rdarawa balona bo jale riri ebaina. Taga si laisa rcombayang mnuna gaole bo smatna rto si tina smat mafia. Si tane osta bo rduk sal-sal ta tebteb."